-
សាលាឧទ្ធរណ៍ច្រានចោលសាលក្រមប្រឆាំងសកម្មជនខេត្តពោធិ៍សាត់ លោក គុជ វេង
- Issue Date 26-Jun-2015
កាលពីថ្ងៃទី២៤ ខែមេសា ឆ្នាំ២០១៣ សាលាដំបូងខេត្តពោធិ៍សាត់ បានកាត់ទោសឲ្យលោក គុជ វេង ជាប់ពន្ធនាគារ១ឆ្នាំ និងបង់ប្រាក់សំណង៤៥០០ដុល្លារ។ តុលាការបានចោទលោកពីបទឆបោកប្រាក់ចំនួន៤៥០០ដុល្លារ ពីដើមបណ្តឹងអ្នកស្រី អ៊ុំ ធារី ពាក់ព័ន្ធនឹងការសន្យាថានាំប្តីរបស់អ្នកស្រីឲ្យបានចូលធ្វើជានគរបាលមានស័ក្តិ២។ ប៉ុន្តែតុលាការបានសម្រេចឲ្យគុជ វេង ជាប់ពន្ធនាគារតែ៣ខែកន្លះប៉ុណ្ណោះ ហើយនៅសល់ប៉ុន្មានព្យួរទោស។ប្រធានចៅក្រមសាលាឧទ្ធរណ៍ លោក ប្លង់ សំណាង បានប្រកាសសាលដីកាថា លោក គុជ វេង មិនមានវត្តមាននៅពេលមានហេតុការណ៍កើតឡើង ដូចការចោទប្រកាន់របស់ដើមបណ្តឹង។ លោកបន្តថាសាលាឧទ្ធរណ៍ច្រានចោលការចោទប្រកាន់ និងការទាមទារសំណងរបស់ភាគីដើមបណ្តឹង។ លោកបន្ថែមថាលោក គុជ វេង ជាមនុស្សបរិសុទ្ធ។ក្រោយការប្រកាសសាលដីកា ដើមបណ្តឹងអ្នកស្រី អ៊ុំ ធារី មានប្រសាសន៍ថាអ្នកស្រីនឹងប្តឹងករណីនេះទៅតុលាការកំពូល។ឆ្លើយតបនឹងដើមបណ្តឹង លោក គុជ វេង មានប្រសាសន៍ថាលោកមិនខ្លាចនឹងការប្តឹងទៅតុលាការកំពូលនោះទេ ដោយអះអាងថាលោកជាមនុស្សបរិសុទ្ធ និងមិនបានប្រព្រឹត្តដូចការចោទប្រកាន់។ លោកបន្តថាសាលាដំបូងខេត្តពោធិ៍សាត់ មិនបានផ្តល់ភាពយុត្តិធម៌សម្រាប់រូបលោក ដែលធ្វើឲ្យលោកជាប់ពន្ធនាគារជាង៣ខែ។ លោកថាលោកនឹងពិភាក្សាជាមួយមេធាវី ថាតើលោកនឹងប្តឹងទាមទារសំណងជំងឺចិត្តពីសាលាដំបូងខេត្តពោធិ៍សាត់ ឬយ៉ាងណា។លោក ចាន់ សុជាតិ ដែលជាមេធាវីរបស់គុច វេង ធ្លាប់លើកឡើងថាលោក គុជ វេង បានអនុវត្តទោស៣ខែកន្លះរួចមកហើយ នៅតែមិនទាន់បង់ប្រាក់សំណងជូនដើមបណ្តឹង។ លោកបញ្ជាក់ថាការប្តឹងទៅសាលាឧទ្ធរណ៍នេះ គឺដើម្បីលុបចោលការចោទប្រកាន់នានាមកលើរូបលោក និងដើម្បីរួចពីការបង់សំណង៤៥០០ដុល្លារ៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី ២៦ ខែ មិថុនា ឆ្នាំ២០១៥។