-
កិច្ចប្រជុំកំពូល រវាងគណបក្សប្រជាជនកម្ពុជា និងគណបក្សសង្គ្រោះជាតិ បញ្ចប់ហើយ
- ថ្ងៃចេញផ្សាយ ១៦-កញ្ញា-២០១៣
លោកនាយរដ្ឋមន្ត្រី ហ៊ុន សែន និងលោក សម រង្ស៊ី នៅរសៀលថ្ងៃចន្ទនេះ បានឯកភាពគ្នាក្នុងការកែទម្រង់គជប ស៊ីជម្រៅ និងបន្តការចរចាជាមួយគ្នាបន្តទៀតលើបញ្ហាដែលនៅសេសសល់ បើទោះជាចំណុចមួយចំនួន មិនទាន់បានយល់ព្រមក៏ដោយ។ ជំនួបរវាងគណបក្សប្រជាជនកម្ពុជា និងគណបក្សសង្គ្រោះជាតិ បានបញ្ចប់នៅម៉ោងប្រមាណជា២រសៀលនេះ ដោយបានចាប់ផ្តើមចាប់ពីម៉ោង៩និង១០នាទីព្រឹកនេះ។ ជំនួបរយៈពេលជិត៥ម៉ោងនេះ ត្រូវបានភាគីទាំងពីរ លើកឡើងថា មានការឯកភាពគ្នា និងពេញចិត្តនឹងការពិភាក្សាផ្លាស់ប្តូរគ្នា ទើបធ្វើឲ្យមានភាគីទាំងពីរ ត្រូវចំណាយពេលយូរបែបនេះ។ រដ្ឋមន្ត្រីប្រតិភូអមនាយករដ្ឋមន្ត្រី លោកប្រាក់ សុខុន ថ្លែងប្រាប់អ្នកសារព័ត៌មានថា ភាគីទាំងពីរបានឯកភាពក្នុងការគោរពតាមព្រះរាជសារព្រះមហាក្សត្រ ចុះថ្ងៃទី១៦ខែកញ្ញានេះ ដោយអំពាវនាវឲ្យមានការបញ្ឈប់ហិង្សារវាងបាតុករ និងសមត្ថកិច្ច បន្តការចរចាគ្រប់កម្រិត ដើម្បីដោះស្រាយបញ្ហា និងមានស្មារតីថ្មីមួយ ដើម្បីផលប្រយោជន៍ជាតិ។ មិនតែប៉ុណ្ណោះភាគីទាំងពីរ ក៏បានឯកភាពបង្កើតយន្តការមួយកែទម្រង់ការបោះឆ្នោតនៅពេលខាងមុខ។លោក យឹម សុវណ្ណ អ្នកនាំពាក្យគណបក្សសង្គ្រោះជាតិ មានប្រសាសន៍ថា ភាគីទាំងពីរ បានឯកភាពគ្នាក្នុងការកំណែទម្រង់គជប រួមមានកំណែទម្រង់សមាសភាព គជប ច្បាប់គណបក្សនយោបាយ ច្បាប់ហិរញ្ញវត្ថុ និងបញ្ជីឈ្មោះបោះឆ្នោតថ្មី ។ លោកបន្តថា លោក ហ៊ុន សែន ក៏បានគាំទ្រឲ្យមានបញ្ជីឈ្មោះបោះឆ្នោតថ្មីផងដែរ។លោក យឹម សុវណ្ណ បញ្ជាក់ថា ចំណុចមួយចំនួន ដែលភាគីទាំងពីរ មិនទាន់ឯកភាពគ្នាគឺ ការបង្កើតគណៈកម្មការចម្រុះ តែគណបក្សសង្គ្រោះជាតិ នៅមានជំហរបង្កើតដដែល។ចំណែកគណបក្សប្រជាជនកម្ពុជា មិនយល់ព្រម ដោយលើកឡើងថា ការង្កើតគណៈកម្មាការចម្រុះនេះ គឺខុសច្បាប់ ហើយគណបក្សប្រជាជនកម្ពុជា មិនអាចត្រឡប់ក្រោយបានទេ។ លោកប្រាក់ សុខុន បន្តថា កំណែទម្រង់គជប គឺមានទាំងកំណែទម្រង់ដំណើរការបោះឆ្នោតតែម្តង ដូចជាការផ្លាស់ប្តូរប្រតិទិននៃការបោះឆ្នោតនៅសប្តាហ៍ទី៤ ក្នុងខែកក្កដា ការចុះឈ្មោះបោះឆ្នោតនៅខែតុលា និងបញ្ហាហែរក្បួនគណបក្សជាដើម។ លោកប្រាក់ សុខុន មានប្រសាសន៍ថា បើទោះគណបក្សសង្គ្រោះជាតិ មិនចូលរួមប្រជុំសភាក៏ដោយ តែតំណាងរាស្ត្រគណបក្សប្រជាជនកម្ពុជា នឹងចូលរួមនៅថ្ងៃទី២៣ខែកញ្ញាដដែល។លោក យឹម សុវណ្ណ បញ្ជាក់ថា ភាគីទាំងពីរនៅមានពេល៧ថ្ងៃទៀត ចរចាលើបញ្ហាផ្សេងៗ ធ្វើយ៉ាងម៉េចឲ្យភាគីទាំងសងខាងទទួលយកបាន។ ចំណែកមហាបាតុកម្ម គឺមាននៅថ្ងៃស្អែកបន្តទៀត។ ទោះជាយ៉ាងណា ភាគីទាំងពីរ មិនបានបញ្ជាក់ថាតើមានការពិភាក្សាពីការបែងចែកអំណាចយ៉ាងណាសម្រាប់ក្បាលម៉ាស៊ីនរដ្ឋសភា ឬមានការពិភាក្សាណាមួយទាក់ទងនឹងការដឹកនាំរដ្ឋាភិបាលនៅឡើយទេ។ ក្នុងជំនួបនៅព្រឹកថ្ងៃចន្ទនេះ គណៈប្រតិភូគណបក្សប្រជាជនកម្ពុជា ៦រូបរួមមានអនុប្រធានទី១ព្រឹទ្ធសភា លោក សាយ ឈុំ រដ្ឋមន្ត្រីក្រសួងមហាផ្ទៃលោក ស ខេង រដ្ឋមន្ត្រីប្រតិភូអមនាយករដ្ឋមន្ត្រី លោកប្រាក់ សុខុន រដ្ឋលេខាធិការក្រសួងមហាផ្ទៃ លោក សក់ សេដ្ឋា នាយករងខុទ្ទកាល័យ គណបក្សជាជនកម្ពុជាលោក សោម សឿន និងលោក ឈាង វុន។ ចំណែក ខាងគណបក្ស សង្គ្រោះជាតិមានលោក កឹម សុខា ជាអនុប្រធាន លោក ប៉ុល ហំម លោក យឹម សុវណ្ណ លោក អេង ឆៃអ៊ាង លោក សុន ឆ័យ និងលោក គួយ ប៊ុនរឿន៕ អត្តបទដកស្រង់ពីវិទ្យុសំលេងប្រជាធិបតេយ្យ(VOD) ផ្សាយថ្ងៃទី១៦ ខែកញ្ញា ឆ្នាំ២០១៣។