-
មជ្ឈមណ្ឌលសិទ្ធិមនុស្សកម្ពុជាព្រួយបារម្ភពីការរឹតបន្តឹងសេរីភាពបញ្ចេញមតិ
- ថ្ងៃចេញផ្សាយ ១៣-តុលា-២០១៣
មជ្ឈមណ្ឌលសិទ្ធិមនុស្សកម្ពុជា ព្រួយបារម្ភពីការរឹតបន្តឹងសេរីភាពនៃការជួបជុំ និងបញ្ចេញមតិរបស់ក្រុមសង្គមស៊ីវិលនៅកម្ពុជា ខណៈការជួបប្រជុំមួយចំនួននៅពេលថ្មីៗនេះត្រូវបានរារាំង និងបង្ក្រាប។លិខិតរបស់មជ្ឈមណ្ឌលសិទ្ធិមនុស្សកម្ពុជា(CCHR) កាលពីថ្ងៃទី១១ ខែតុលា បានឲ្យដឹងថា មជ្ឈមណ្ឌលនេះព្រួយបារម្ភចំពោះការឆ្លើយតបជាអវិជ្ជមានរបស់អាជ្ញាធរ ទៅនឹងសំណើ ឬលិខិតរបស់ក្រុមសង្គមស៊ីវិលក្នុងគោលបំណងធ្វើបាតុកម្មដោយអហិង្សាក្នុងក្រុងភ្នំពេញជាបន្តបន្ទាប់។លិខិតដដែលបន្ថែមថា កន្លងមកអាជ្ញាធរកម្ពុជាបានព្យាយាមរឹតត្បិតការជួបប្រជុំ និងការបញ្ចេញមតិរបស់សង្គមស៊ីវិល និងប្រជាពលរដ្ឋ ដូចជា ទិវាសិទ្ធិលំនៅដ្ឋាន និងទិវាគ្រូបង្រៀនពិភពលោក ជាដើម។ CCHR លើកឡើងទៀតថា ការរៀបចំធ្វើបាតុកម្មឲ្យមានសន្តិភាព និងសណ្តាប់ធ្នាប់សាធារណៈ ជាកាតព្វកិច្ចរបស់រដ្ឋាភិបាល មិនមែនមានតួនាទីជាអ្នករឹតត្បិតនោះទេ។នៅថ្ងៃអាទិត្យនេះ ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន ប្រកាសលុបចោលគម្រោងដង្ហែក្បួនទាមទារដំឡើងប្រាក់ខែឲ្យគ្រូបង្រៀនភ្លាមៗ ក្រោយមានការប៉ះទង្គិចនៅទីលានប្រជាធិបតេយ្យ។ លោកថា ការសម្រេចចិត្តលុបចោលគម្រោងដង្ហែក្បួនទៅកាន់ក្រសួងអប់រំ យុវជន និងកីឡា និងទីស្តីការគណៈរដ្ឋមន្ត្រីហើយនៅថ្ងៃនេះ ដើម្បីរក្សាសុវត្ថិភាពអ្នកចូលរួម។កាលពីថ្ងៃទី២២ ខែកញ្ញា ឆ្នាំ២០១៣ ប្រជាសមហគមន៍មានជម្លោះដីធ្លី ធ្វើកូដកម្មអត់អាហារ នៅរមណីយដ្ឋានវត្តភ្នំ ដើម្បីទាមទារយុតិធម៌រឿងការបណ្តេញចេញ ត្រូវបានកងកម្លាំងចម្រុះវាយបង្ក្រាបបណ្តាលឲ្យប្រជាពលរដ្ឋ អ្នកសារពត៌មាន និងអ្នកឃ្លាំមើលការរំលោភសិទ្ធិមនុស្សអន្តរជាតិ សរុបជាង១០នាក់រងរបួសធ្ងន់ និងស្រាល។អត្ថបទដកស្រង់ពីវិទ្យុសម្លេងប្រជាធិបតេយ្យ (VOD)ចុះផ្សាយថ្ងៃទី១៣ ខែតុលា ឆ្នាំ២០១៣៕