-
សាលារាជធានី សុំគោលការណ៍ពីក្រសួងមហាផ្ទៃ ចំពោះគម្រោងដង្ហែក្បួនបាតុកម្មរបស់CNRP នៅថ្ងៃអាទិត្យ
- ថ្ងៃចេញផ្សាយ ២-មករា-២០១៤
សាលារាជធានី សុំគោលការណ៍ពីក្រសួងមហាផ្ទៃ ចំពោះគម្រោងដង្ហែក្បួនបាតុកម្មរបស់CNRP នៅថ្ងៃអាទិត្យ មន្ត្រីជាន់ខ្ពស់សាលារាជធានីភ្នំពេញ ប្រាប់តំណាងគណបក្សសង្គ្រោះជាតិ(CNRP)ថា ខ្លួននឹងសុំគោលការណ៍ពីក្រសួងមហាផ្ទៃ ចំពោះការជូនដំណឹងរបស់គណបក្សសង្គ្រោះជាតិ ស្តីពីការដង្ហែក្បួនមហាបាតុកម្មដោយសន្តិវិធី នៅតាមដងផ្លូវរាជធានីភ្នំពេញ នៅថ្ងៃអាទិត្យសប្តាហ៍នេះ ដើម្បីទាមទារឲ្យមានកំណែទម្រង់ការបោះឆ្នោត និងឲ្យរៀបចំការបោះឆ្នោតទ្បើងវិញ ក្នុងពេលឆាប់ៗនេះ។កាលពីថ្ងៃទី៣០ ខែធ្នូ ឆ្នាំ២០១៣ បេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិបីរូប រួមមាន លោក ម៉ៅ មុនីវណ្ណ លោក ហូរ វ៉ាន់ និងលោក គួយ ប៊ុនរឿន បានជូនដំណឹងជាលាយលក្ខណ៍អក្សរទៅអភិបាលរាជធានីភ្នំពេញ ពីការដង្ហែក្បួនមហាបាតុកម្ម ចន្លោះពីថ្ងៃទី១ ដល់ថ្ងៃទី៥ ខែមករា ដែលដឹកនាំដោយប្រធាន និងអនុប្រធានគណបក្ស លោក សម រង្ស៊ី និងលោក កឹម សុខា និងមានបាតុកររាប់ម៉ឺននាក់ចូលរួម។លោក ហូរ វ៉ាន់ ឲ្យដឹងថា ក្នុងកិច្ចប្រជុំមួយនៅសាលារាជធានី នៅព្រឹកថ្ងៃព្រហស្បតិ៍នេះ អភិបាលរងរាជធានីភ្នំពេញ លោក ឃួន ស្រេង បានលើកទ្បើងពីបញ្ហាសុវត្ថិភាព សន្តិសុខ និងចំនួនបាតុកររាប់ម៉ឺននាក់ ដែលតម្រូវឲ្យសាលារាជធានី សុំគោលការណ៍ពីក្រសួងមហាផ្ទៃ។រដ្ឋមន្ត្រីក្រសួងមហាផ្ទៃ លោក ស ខេង ប្រាប់VOD ថា លោកនឹងពិនិត្យសំណើរបស់គណបក្សសង្គ្រោះជាតិ នៅរសៀលថ្ងៃនេះ។ លោកថា កន្លងមក បាតុករ និងកម្លាំងសមត្ថកិច្ច សហការគ្នាបានល្អ ក្នុងការថែរក្សាសន្តិសុខ និងសណ្តាប់ធ្នាប់។ ប៉ុន្តែ លោកអំពាវនាវដល់បាតុករជៀសវាងការប្រើអំពើហិង្សា និងបិទផ្លូវ ដែលនឹងប៉ះពាល់ដល់អ្នកធ្វើដំណើរ និងប្រយោជន៍សាធារណៈ៕អត្តបទដកស្រង់ពីវិទ្យុសំលេងប្រជាធិបតេយ្យ VOD ចុះផ្សាយនៅថ្ងៃទី០២ ខែមករា ឆ្នាំ២០១៤