-
កម្មករនៅតាមរោងចក្រមួយចំនួននៅបន្តធ្វើកូដកម្ម ដើម្បីប្រាក់ឈ្នួលពលកម្មសមរម្យ
- ថ្ងៃចេញផ្សាយ ២-មករា-២០១៤
មន្ត្រីសហជីពម្នាក់ បានឲ្យដឹងថា នៅថ្ងៃសុក្រ ទី៣ ខែមករា ឆ្នាំ២០១៤នេះ នៅបណ្ដារោងចក្រមួយចំនួន នៅរាជធានីភ្នំពេញ និងខេត្ត បានបន្តធ្វើកូដកម្ម ដើម្បីតវ៉ាប្រាក់ឈ្នួលសមរម្យ១៦០ដុល្លារ និងទាមទារឲ្យមានការដោះលែងតំណាងរបស់ខ្លួន ដែលត្រូវចាប់ខ្លួនកាលពីថ្ងៃម្សិលមិញ។លោក សឿន ផល្លី មន្ត្រីសហជីពសេរីកម្មករនៃព្រះរាជាណាចក្រកម្ពុជារបស់លោក ជា មុន្នី បាន ប្រាប់VOD ថា នៅព្រឹកថ្ងៃសុក្រនេះ កម្មករនៅរោងចក្រជាច្រើន បានបន្តធ្វើកូដកម្ម ហើយភាគច្រើន ពួកគេតវ៉ាសុំដំឡើងប្រាក់ឈ្នួលពលកម្មសមរម្យ គឺ១៦០ដុល្លារ។លោក បន្តថា កម្មករនៅតំបន់សេដ្ឋកិច្ចពិសេសភ្នំពេញ ផ្លូវជាតិលេខ៤ ខណ្ឌពោធិសែនជ័យ ប្រមាណជាជាង ១០០០០នាក់ បានកំពុងតវ៉ានៅខាងមុខរោងចក្រ និងអ្នកខ្លះទៀត ឡើងមកបិទកំណាត់ផ្លូវជាតិលេខ ដើម្បីទាមទារដំឡើងប្រាក់ឈ្នួល ១៦០ដុល្លារ និងទាមទារឲ្យដោះលែងតំណាងរបស់ខ្លួន ដែលត្រូវបានចាប់ខ្លួនកាលពីថ្ងៃម្សិលមិញ ដោយកងទ័ពពិសេសឆ័ត្រយោង ៩១១ និងទាមទារប្រគល់ម៉ូតូរបកកង់បី ចំនួន៥គ្រឿងឲ្យពួកគេវិញ។លោកឲ្យដឹងទៀត ថា នៅរោងចក្រតាមផ្លូវវេងស្រេង ភាគច្រើនកម្មករបានធ្វើកូដកម្ម រោងចក្រធំចំនួនបី នៅសង្កាត់ទឹកថ្នា ផ្លូវសហព័ន្ធរុស្ស៊ី និងតំបន់ឬស្សីកែវ នៅកន្លែងខ្លះទៀត ក៏កម្មករកំពុងធ្វើការតវ៉ាផងដែរ ។នេះជាការតវ៉ាចូលដល់ថ្ងៃទី៩ ហើយដែលកម្មករ នៅរោងចក្រមួយចំនួន បន្តធ្វើកូដកម្ម ដើម្បីប្រាក់ឈ្នួលសមរម្យ ១៦០ដុល្លារ៕ អត្តបទដកស្រង់ពី៏វិទ្យុសំលេងប្រជាធិបតេយ្យ VOD ចុះនៅថ្ងៃទី០៣ ខែមករា ឆ្នាំ២០១៤