-
លោក កឹម សុខា៖ ត្រូវតែដោះលែងតំណាងកម្មករ និងសកម្មជនសង្គមស៊ីវិល
- ថ្ងៃចេញផ្សាយ ២-មករា-២០១៤
មេដឹកនាំគណបក្សសង្គ្រោះជាតិ ដែលជាគណបក្សជាប់ឆ្នោត ក្នុងសភាអាណត្តិទី៥ បានអំពាវនាវទៅកាន់អាជ្ញាធរ តុលាការរាជធានីភ្នំពេញ ឲ្យដោះលែងតំណាងកម្មករ និងសកម្មជនសង្គមស៊ីវិល ដែលត្រូវកងទ័ពពិសេសឆ័ត្រយោង៩១១ ចាប់ខ្លួនកាលពីថ្ងៃម្សិលមិញ។ថ្លែងនៅចំពោះហ្វូងប្រជាពលរដ្ឋប្រមាណជា៣០០នាក់ នៅខាងមុខតុលាការ រាជធានីភ្នំពេញខណៈពួកគាត់កំពុងបិទកំណាត់ផ្លូវ និងហ៊ុំព័ទ្ធតុលាការនេះ លោក កឹម សុខា អនុប្រធានគណបក្សសង្គ្រោះជាតិ បានថ្លែងថា គេមិនត្រូវឃុំខ្លួនជនស្លូតត្រង់ ដែលជាតំណាងកម្មករ និងសកម្មជនសង្គមស៊ីវិលនោះទេ។លោកបន្តថា គេត្រូវដាក់ទោសទៅលើជនប្រដាប់អាវុធដែលបានវាយកម្មករ និងសកម្មជនសង្គមស៊ីវិល ជាជាងឃុំខ្លួនជនរងគ្រោះ។លោក កឹម សុខា ក៏បានឲ្យដឹងដែរថា លោកបានបញ្ចូនរបាយការណ៍ ករណីបង្ក្រាបកម្មករដោយកងទ័ព ទៅអង្កការសិទ្ធិមនុស្ស អសប រួចហើយ។គួរបញ្ជាក់ថា កាលពីម៉ោងប្រមាណ១២ថ្ងៃត្រង់ ថ្ងៃទី០២ ខែមករា ម្សិលមិញនេះ អាជ្ញាធរបានចាប់ខ្លួនមនុស្ស ១៥នាក់ មានព្រះសង្ឃ៥អង្គ ក្នុងនោះមាន លោក វន់ ពៅ លោក ថេង សាវឿន លោក ពុទ្ធិស័ក្កិ និងកម្មករ ព្រមទាំងព្រះសង្ឃ៥អង្គ នៅក្នុងការប៉ះទង្គិចគ្នាមួយរវាងកម្លាំងទ័ពឆ័ត្រយោង៩១១ និងក្រុមកម្មករ នៅមុខរោងចក្រយ៉ាកជីន ក្នុងខណ្ឌពោធិសែនជ័យ រាជធានីភ្នំពេញ។តែទោះជាយ៉ាងណា នៅម៉ោងជិត១២យប់ថ្ងៃដដែល ព្រះសង្ឃ ៥អង្គត្រូវបានដោះលែងវិញ។ ការតវ៉ារបស់កម្មករ គឺទាមទារដំឡើងប្រាក់ឈ្នួលពលកម្មសមរម្យ ១៦០ដុល្លារ៕ អត្តបទដកស្រង់ពីវិទ្យុសំលេងប្រជាធិបតេយ្យ VOD ចុះផ្សាយនៅថ្ងៃទី០៣ ខែមករា ឆ្នាំ២០១៤