-
សង្គមស៊ីវិលបួងសួងនៅព្រះអង្គដងកើសុំឲ្យដោះលែងមនុស្ស២៣នាក់
- ថ្ងៃចេញផ្សាយ ១២-កុម្ភៈ-២០១៤
តំណាងបណ្ដាញអង្គការសង្គមស៊ីវិល ជិត ២០០ស្ថាប័ន បានជួបជុំគ្នាធ្វើពិធីតាមបែបព្រះពុទ្ធសាសនា និងបួងសួងនៅព្រះអង្គដងកើ ស្នើឲ្យវត្ថុសក្ដិសិទ្ធិបន្ទន់ចិត្តថ្នាក់ដឹកនាំរដ្ឋាភិបាល ឬតុលាការ ឲ្យដោះលែងមនុស្សចំនួន ២៣នាក់ ពីពន្ធនាគារក្នុងខេត្តកំពង់ចាម។ ការប្រមូលផ្តុំនេះ សមត្ថកិច្ចចម្រុះរដ្ឋាភិបាល មិនបានពង្រាយកម្លាំងរារាំង ឬបង្ក្រាបដោយហិង្សាដូចពេលមុនទេ។តំណាងអង្គការមិនមែនរដ្ឋាភិបាល បណ្ដាញយុវជន ព្រះសង្ឃ សហគមន៍ដីធ្លី និងប្រជាពលរដ្ឋប្រមាណ ១០០នាក់ បានបន្តស្វែងរកយុត្តិធម៌ និងស្នើឲ្យរដ្ឋាភិបាលដោះលែងមនុស្សចំនួន ២៣នាក់ពីពន្ធនាគារ តាមរយៈធ្វើពិធីបន់ស្រន់ និងតាមបែបព្រះពុទ្ធសាសនានៅព្រះអង្គដងកើ ព្រឹកថ្ងៃសុក្រ ទី៧ ខែកុម្ភៈ។នាយិកាអង្គការសីលកា អ្នកស្រី ធីតា ឃិះ មានប្រសាសន៍ថា សកម្មភាពស្វែងរកយុត្តិធម៌ដល់អ្នកជាប់ឃុំទាំង ២៣នាក់ គឺតាមរយៈនិមន្តព្រះសង្ឃចំនួន ២៣អង្គ សូត្រមន្ត និងធ្វើពិធីបួងសួងផ្សេងទៀតនៅព្រះអង្គដងកើ ពីមុខព្រះបរមរាជវាំង។ អ្នកស្រីបន្តថា គោលបំណងនៃការធ្វើពិធីតាមបែបព្រះពុទ្ធសាសនានេះ គឺមានបំណងបួងសួងស្នើសុំឲ្យវត្ថុសក្ដិសិទ្ធិ ជួយបន្ទន់ចិត្តប្រមុខដឹកនាំរដ្ឋាភិបាល ឬតុលាការ ឲ្យដោះលែងអ្នកជាប់ឃុំទាំង ២៣នាក់ ឲ្យមានសេរីភាព ដោយគ្មានលក្ខខណ្ឌ៖ «យើងធ្វើពិធីច្រើនផ្លូវ គឺផ្លូវងងឹតក៏ធ្វើ ផ្លូវភ្លឺក៏ធ្វើ ដើម្បីធ្វើយ៉ាងណាឲ្យប្រាកដថា យុត្តិធម៌នៅប្រទេសកម្ពុជា។ មានជំនឿថា វត្ថុសក្ដិសិទ្ធិនៅក្នុងប្រទេសកម្ពុជា និងនៅក្នុងពិភពលោកយើងហ្នឹង ធ្វើយ៉ាងណាឲ្យមេដឹកនាំរដ្ឋាភិបាល និងប្រធានតុលាការ អនុវត្តទៅតាមច្បាប់ និងផ្តល់យុត្តិធម៌ដល់មនុស្សទាំង ២៣នាក់ ដែលកំពុងជាប់ពន្ធនាគារ»។អនុប្រធានផ្នែកស៊ើបអង្កេត និងជាប្រធានក្រុមមេធាវីសមាគមអាដហុក លោក ណៃ វ៉ង់ដា ក៏បានឲ្យដឹងក្នុងពិធីបួងសួង ដោយរំពឹងថា ថ្នាក់ដឹកនាំរដ្ឋាភិបាល និងតុលាការ នឹងពិចារណាផ្តល់យុត្តិធម៌ ឬដោះលែងមនុស្សចំនួន ២៣នាក់ ក្នុងពេលដ៏ខ្លីខាងមុខនេះ។ ព្រោះលោកយល់ថា ថ្មីៗនេះសមត្ថកិច្ចរដ្ឋាភិបាល បានបិទបញ្ចប់ការស៊ើបអង្កេតព្រឹត្តិការណ៍ផ្ទះអាវុធ ដែលបានសម្លាប់មនុស្ស និងចាប់ខ្លួនមេដឹកនាំសមាគម សកម្មជនសិទ្ធិមនុស្ស និងកម្មករ ទាំង ២៣នាក់នេះហើយ៖ «ឲ្យមន្ត្រីតុលាការ និងមន្ត្រីរដ្ឋាភិបាល លោកយល់នូវយុត្តិធម៌ ហើយធ្វើការដោះលែងមនុស្សទាំង ២៣នាក់ពីពន្ធនាគារ។ ហើយឈប់ប្រើអំពើហិង្សា និងអំពើព្រៃផ្សៃមកលើពលរដ្ឋខ្លួនឯង»។មនុស្សទាំង ២៣នាក់ ដែលជាប់ក្នុងពន្ធនាគារត្រពាំងផ្លុង និងមាត់ឃ្មង់ ត្រូវបានកម្លាំងចម្រុះរដ្ឋាភិបាល ចាប់ខ្លួននៅក្នុងព្រឹត្តិការណ៍បង្ក្រាបដោយហិង្សាទៅលើការប្រមូលផ្តុំធ្វើបាតុកម្មទាមទារប្រាក់ខែគោល ១៦០ដុល្លារ របស់ក្រុមកម្មករនៅរាជធានីភ្នំពេញ កាលពីថ្ងៃទី២ និងទី៣ ខែមករា។ភរិយា លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ដែលកំពុងជាប់ឃុំស្ថិតក្នុងចំណោមមនុស្សទាំង ២៣នាក់ បានឲ្យដឹងថា ស្វាមីរបស់គាត់ដែលមានជំងឺប្រចាំកាយមុនពេលត្រូវកម្លាំងកងពលតូចពិសេសទ័ពឆត្រយោង៩១១ វាយសំពងលើរាងកាយ មុនបញ្ជូនទៅពន្ធនាគារនោះ ពេលនេះអាការៈជំងឺកាន់តែធ្ងន់ធ្ងរ។អ្នកស្រីបន្តថា ស្វាមីគាត់ទំនងជាត្រូវស្លាប់ក្នុងពន្ធនាគារ បើតុលាការ ឬស្ថាប័នពាក់ព័ន្ធមិនអនុញ្ញាតឲ្យចេញព្យាបាលជំងឺនៅមន្ទីរពេទ្យទេ៖ «ជំងឺរ៉ាំរ៉ៃរបស់គាត់ធ្ងន់ធ្ងរ គឺជំងឺក្រពះ និងពោះវៀន គឺរលាកធ្ងន់ធ្ងរមែនទែន។ ហើយសព្វថ្ងៃនេះ គាត់រាក និងក្អួតចង្អោរខ្លាំងជារៀងរាល់ថ្ងៃ។ ហើយអ្វីដែលគាត់ព្រួយបារម្ភនោះ គឺមួយរយៈពេលមុន គឺគាត់ឈឺស្ពឹកមួយចំហៀងខ្លួន គាត់ភ័យបារម្ភគាត់ស្លាប់មួយចំហៀងខ្លួន។ ដល់ពេលឥឡូវនេះ គាត់ឈឺធ្ងន់ធ្ងរមែនទែន ហើយគាត់ភ័យខ្លាចខ្លួនគាត់ស្លាប់នៅក្នុងពន្ធនាគារ»។បញ្ហានេះដែរ លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខាវឌូ (CCAWDU) ថ្លែងថា បញ្ហាអ្នកជាប់ឃុំទាំង ២៣នាក់ នឹងអាចមានការតវ៉ាទ្រង់ទ្រាយធំបន្តទៀតនាថ្ងៃខាងមុខ បើរដ្ឋាភិបាល ឬតុលាការ មិនព្រមដោះលែងទេនោះ៖ «បើយើងយោងទៅលើអង្គហេតុការប្រព្រឹត្ត ឬក៏ផ្លូវច្បាប់ ជាពិសេស លោក វន់ ពៅ គឺត្រូវដោះលែងដោយគ្មានលក្ខខណ្ឌ មានន័យថា សកម្មភាពរបស់គាត់ប្រព្រឹត្តនៅពេលនោះ ដែលត្រូវនាយទាហានចំនួន ៣នាក់ និងក្រុមហ៊ុនចោទនោះ គឺមិនត្រឹមត្រូវទេ ព្រោះគាត់បានទៅហាមគេកុំឲ្យវ៉ៃគ្នា តែទៅចោទប្រកាន់គាត់ថា ជាអ្នកប្រើអំពើហិង្សា។ អាហ្នឹងវាខុសទាំងស្រុង។ ឥឡូវ ក្រុមហ៊ុនបានដកពាក្យបណ្ដឹងវិញហើយ»។ពិធីប្រមូលផ្តុំ ឬជួបជុំធ្វើពិធីបួងសួងរបស់មន្ត្រីសង្គមស៊ីវិល ព្រះសង្ឃ និងពលរដ្ឋនៅព្រះអង្គដងកើ ព្រឹកថ្ងៃសុក្រ ទី៧ ខែកុម្ភៈ កម្លាំងប្រដាប់អាវុធចម្រុះរដ្ឋាភិបាល មិនបានពង្រាយកម្លាំងរារាំង ឬបង្ក្រាបរាប់រយនាក់ដូចពេលមុនទេ។ ប៉ុន្តែ មានដាក់ពង្រាយកម្លាំងបង្កប់ស្លៀកពាក់ស៊ីវិល និងកម្លាំងសន្តិសុខប្រមាណ ១០នាក់ រង់ចាំឃ្លាំមើល។សាលាឧទ្ធរណ៍ នៅថ្ងៃទី១១ ខែកុម្ភៈ គ្រោងនឹងបើកសវនាការលើបណ្ដឹងសុំនៅក្រៅមន្ទីរឃុំឃាំងលើជនជាប់ចោទទាំង ២៣នាក់។ មនុស្សទាំង ២៣នាក់ ត្រូវតុលាការចោទពីបទបង្កហិង្សា និងបំផ្លិចបំផ្លាញទ្រព្យសម្បត្តិរោងចក្រកាត់ដេរ ក្នុងពេលជួបជុំធ្វើបាតុកម្មទាមទារដំឡើងប្រាក់ខែគោល ១៦០ដុល្លារ កាលពីដើមខែមករា៕ដកស្រង់ចេញពីវិទ្យុអាស៊ីសេរី (RFA) ចុះថ្ងៃទី០៧ខែកុម្ភៈ ឆ្នាំ២០១៤។