-
សកម្មជនសិទ្ធិមនុស្ស និងដីធ្លី រងការបាញ់ប្រហារពីជនមិនស្គាល់មុនពេលមកដល់រាជធានីភ្នំពេញ
- ថ្ងៃចេញផ្សាយ ២៤-មីនា-២០១៤
នៅម៉ោង ៨យប់ថ្ងៃសៅរ៍នេះ ក្រុមអង្គការសង្គមស៊ីវិល ព្រះសង្ឃ សហគមន៍ដីធ្លី និងគ្រួសាររងគ្រោះដោយសារការបាញ់ប្រហារនៅផ្លូវវ៉េងស្រេង ដែលធ្វើដំណើរចេញពីស្រុកជីក្រែង ខេត្តសៀមរាប រងការបាញ់ប្រហារពីជនមិនស្គាល់មុខ នៅដែលពួកគាត់ធ្វើដំណើរតាមរថយន្តក្រុង មកដល់គល់ស្ពានជ្រោយចង្វាយ ខណ្ឌដូនពេញ រាជធានីភ្នំពេញ។ព្រះតេជគុណ លួន សុវ៉ាត ដែលរៀបចំកម្មវិធីបុណ្យរំលឹកខួប៥ឆ្នាំនៃការបណ្តេញចេញដោយបង្ខំ នៅសហគមន៍ជីក្រែង ស្រុកជីក្រែង ខេត្តសៀមរាប មានសង្ឃដីកាថា បន្ទាប់ពីបញ្ចប់ពិធីបុណ្យ នៅថ្ងៃនេះ ក្រុមសហគមន៍ដីធ្លីនៅរាជធានីភ្នំពេញ ព្រះសង្ឃ មន្ត្រីអង្គការសង្គមស៊ីវិល និងក្រុមគ្រួសារជនរងគ្រោះដោយសារការបាញ់ប្រហារនៅផ្លូវវ៉េងស្រេង ព្រមទាំងគ្រួសារអ្នកជាប់ឃុំទាំង២១នាក់ សរុបចំនួន ៤៥នាក់ បានធ្វើដំណើរមកកាន់រាជធានីភ្នំពេញវិញ។ព្រះអង្គបន្តថា លុះមកដល់ជាយរាជធានីភ្នំពេញ មានជនមិនស្គាល់មុខពីរនាក់ ស្លៀកសំលៀកបំពាក់ឈុតខ្មៅ ជិះម៉ូតូវីវ៉ា បានបើកគៀងរថយន្តក្រុងដែលពួកគាត់ជិះ ហើយបានជិះម៉ូតូតាមរហូតដល់ស្ពានជ្រោយចង្វារ និងបានបាញ់សំដៅមករថយន្តចំនួនមួយគ្រាប់។ព្រះតេជគុណ លួន សុវ៉ាត បន្តថា ក្នុងហេតុការណ៍បាញ់ប្រហារនេះ ពុំបណ្តាលឲ្យនរណាម្នាក់រងរបួសឡើយ ហើយជនមិនស្គាល់មុខនោះ បានជិះម៉ូតូគេចខ្លួនបាត់ស្រមោល។ករណីនេះ ព្រះអង្គចាត់ទុកថា ជាការគំរាមកំហែង និងប៉ុនប៉ងមនុស្សឃាតដោយចេតនាមួយ ទៅលើសកម្មជនសិទ្ធិមនុស្ស ដីធ្លី ព្រះសង្ឃ និងក្រុមគ្រួសារជនរងគ្រោះដោយសារការបាញ់ប្រហារនៅផ្លូវវេងស្រេង។ទាក់ទងនឹងករណីនេះដែរ ប្រជាសហគមន៍បឹងកក់ បានដាក់ពាក្យបណ្តឹងទៅអាជ្ញាធរខណ្ឌដូនពេញរួចហើយ នៅម៉ោងជិត៩យប់នេះ ដើម្បីស្វែងរកចាប់ខ្លួនជនដៃដល់យកទៅផ្តន្ទាទោសតាមច្បាប់។នៅក្នុងរថយន្តនោះ មានសកម្មជនដីធ្លីនៅតំបន់បឹងកក់ បុរីកីឡា ថ្មគោល ព្រះសង្ឃ មន្ត្រីអង្គការសង្គមស៊ីវិល គ្រួសារអ្នកជាប់ឃុំទាំង២១នាក់ និងគ្រួសារជនរងគ្រោះដោយសារការបាញ់ប្រហារនៅផ្លូវវ៉េងស្រេង។ការបាញ់ប្រហារនេះ បានធ្វើឡើងបន្ទាប់ពីសកម្មជនដីធ្លី និងព្រះសង្ឃ ជាង១០០នាក់ និងអង្គការនានា នៅរាជធានីខេត្ត នៅថ្ងៃសៅរ៍នេះ បានប្រមូលផ្តុំគ្នា នៅស្រុកជីក្រែង ខេត្តសៀមរាម ធ្វើពិធីរំឭកខួប៥ឆ្នាំនៃការបណ្តញចេញទាំងបង្ខំ រឿងជម្លោះដីធ្លីទំហំជាង៤រយហិកតា។ បន្ទាប់ពីបញ្ចប់ពិធីបុណ្យ ពួកគាត់បានចេញសេចក្តីថ្លែងការណ៍រួម ដោយអំពាវនាវរួមគ្នា ឲ្យរដ្ឋាភិបាល ឈប់យកអាវុធ ជាវិធានការដោះស្រាយបញ្ហា ដើម្បីធានាសិទ្ធិពលរដ្ឋ ដែលមានចែងក្នុងរដ្ឋធម្មនុញ្ញ៕ដកស្រង់ចេញពីវិទ្យុសម្លេងប្រជាធិបតេយ្យ(VOD) ចុះថ្ងៃទី២២ ខែមិនា ឆ្នាំ២០១៤។