-
អ្នកគាំទ្រវិទ្យុសំបុកឃ្មុំ ពីរនាក់រងរបួស ក្នុងការបង្ក្រាបរបស់ក្រុមសន្តិសុខសាលាខណ្ឌដូនពេញ
- ថ្ងៃចេញផ្សាយ ៣១-មីនា-២០១៤
បុរសពីរនាក់ ក្នុងចំណោមប្រជាពលរដ្ឋជាង ១០០នាក់ ដែលជាអ្នកគាំទ្រប្រធានវិទ្យុសំបុកឃ្មុំ រងរបួសក្បាល ខណៈដែលក្រុមសន្តិសុខខណ្ឌដូនពេញជាច្រើនាក់ វាយបំបែកពួកគេមិនឲ្យប្រមូលផ្តុំគ្នា នៅក្បែរស្ពាននាគ ជិតទីលានប្រជាធិបតេយ្យ ដើម្បីទាមទារជាថ្មីម្តងទៀត នៅថ្ងៃចន្ទនេះ សុំដំឡើងហ្វ្រេកង់ទូរទស្សន៍ និងដំឡើងកម្លាំងផ្សាយវិទ្យុនៅតាមខេត្ត។ប្រជាពលរដ្ឋមកពីខេត្តកណ្តាល អ្នកស្រី អើង ង៉ោ ដែលមកចូលរួមបាតុកម្មអហិង្សា បានសម្តែងការខកចិត្តចំពោះកម្លាំងចម្រុះរដ្ឋាភិបាល និងក្រុមសន្តិសុខខណ្ឌដូនពេញជាច្រើននាក់ ដែលវាយបំបែកក្រុមបាតុករ មិនឲ្យដើរទៅកាន់ទីលានប្រជាធិបតេយ្យ។ប្រធានវិទ្យុសំបុកឃ្មុំ លោកម៉ម សូណង់ដូ ថ្លែងទៅកាន់អ្នកគាំទ្រលោកថា ការចូលរួម និងការសហការ របស់ប្រជាពលរដ្ឋ ជាផលវិជ្ជមានមួយ បង្ហាញទៅកាន់សហគមន៍អន្តរជាតិ។ លោកថា លោកនឹងបន្តធ្វើបាតុកម្ម ទាមទារឲ្យក្រសួងព័ត៌មានដំឡើងហ្វ្រេកង់ទូរទស្សន៍ និងដំឡើងកម្លាំងផ្សាយវិទ្យុ ឲ្យបានសម្រេចតាមបំណងរបស់ពលរដ្ឋ។សាលារាជធានីភ្នំពេញ មិនអនុញ្ញាត ឲ្យអ្នកគាំទ្រលោក ម៉ម សូណង់ដូ ធ្វើបាតុកម្មណាមួយនៅថ្ងៃនេះទេ។ប៉ុន្តែ លោកម៉ម សូណង់ដូ បញ្ជាក់ថា ការជម្នះធ្វើនេះ ជាឆន្ទៈ និងសិទ្ធិរបស់ប្រជាពលរដ្ឋ ដែលចង់មានស្ថានីយទូរទស្សន៍ និងវិទ្យុឯករាជ្យ។អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្ស អង្គការ លីកាដូ លោក អំ សំអាត យល់ថា រូបភាពកម្លាំងចម្រុះរដ្ឋសភិបាល និងក្រុមសន្តិសុខ វាយបង្ក្រាបប្រជាពលរដ្ឋមិនឲ្យជួបជុំ គឺជារំលោភរដ្ឋធម្មនុញ្ញ ហើយធ្វើឲ្យលិទ្ធិប្រជាធិបេតេយ្យនៅកម្ពុជាដើរថយក្រោយ។កាលពីថ្ងៃទី២៧ ខែមករា ឆ្នាំ២០១៤ លោក ម៉ម សូណង់ដូ ប្រធានវិទ្យុសំបុកឃ្មុំ និងអ្នកគាំទ្រ ធ្លាប់បានធ្វើបាតុកម្មម្តងរួចមកហើយ ដើម្បីទាមទារហ្វ្រេកង់ទូរទស្សន៍ និងដំឡើងកម្លាំងផ្សាយវិទ្យុសំបុកឃ្មុំបន្តទៅតាមខេត្ត នៅទីលានប្រជាធិបតេយ្យ និងហែក្បួនទៅមុនក្រសួងព័ត៌មាន ប៉ុន្តែត្រូវបានអាជ្ញាធររាជធានីភ្នំពេញ បោកគ្រាប់បែកផ្សែង ទៅលើក្រុមប្រជាពលរដ្ឋ ដើម្បីបំបែកការតវ៉ារបស់ពួកគេនៅមុខក្រសួងព័ត៌មាន ធ្វើឲ្យពលរដ្ឋជាច្រើននាក់ រងរបួសធ្ងន់ និងស្រាល៕ ដកស្រង់ចេញពីវិទ្យុសម្លេងប្រជាធិបតេយ្យ (VOD) ចុះថ្ងៃទី៣១ ខែមិនា ឆ្នាំ២០១៤។