-
តុលាការសម្រេចដោះលែងអ្នកទាំង២៣ ដោយកាត់តម្រឹមទោសនៅថ្ងៃទី៣០ខែឧសភា
- ថ្ងៃចេញផ្សាយ ៣០-ឧសភា-២០១៤
សាលាដំបូងរាជធានីភ្នំពេញ នៅព្រឹកថ្ងៃសុក្រនេះ សម្រេចដោះលែងលោក វន់ ពៅ និងអ្នកទាំង២២ផ្សេងទៀត ដែលបានជាប់ពន្ធនាគារជិត៥ខែ តាមរយៈការកាត់តម្រឹមទោសត្រឹមថ្ងៃទី៣០ខែឧសភា។តុលាការប្រកាសថា មនុស្ស១០នាក់ដែលជាប់ពាក់ព័ន្ធនឹងហិង្សានៅរោងចក្រយ៉ាកជីង ត្រូវបានកាត់ឲ្យជាប់ទោសចន្លោះពី២,៥ឆ្នាំទៅ៤,៥ឆ្នាំ។តែតុលាការ សម្រេចអនុវត្តទោសត្រឹមថ្ងៃទី៣០ខែឧសភា ដោយព្យួរទោសនៅសេសសល់។ចំណែកមនុស្ស១៣នាក់ផ្សេងទៀត ដែលជាប់ពាក់ព័ន្ធនឹងការបង្ក្រាបនៅផ្លូវវ៉េងស្រេងវិញ តុលាការកាត់ឲ្យជាប់ទោសចន្លោះពី១ឆ្នាំទៅ៤ឆ្នាំ តែតុលាការអនុវត្តទោសត្រឹមថ្ងៃទី៣០ខែឧសភានេះ។លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងមនុស្ស២៣នាក់ ផ្សេងទៀត ត្រូវបានអាជ្ញាធរចាប់ខ្លួន ក្នុងហេតុការណ៍ប៉ះទង្គិចនៅមុខរោងចក្រយ៉ាកជីង និងសួនឧស្សាហកម្មកាណាឌីយ៉ា ផ្លូវវ៉េងស្រេង កាលពីថ្ងៃទី០២ និងទី០៣ ខែមករា នៅពេលកម្មករទាមទារប្រាក់ឈ្នួលគោល១៦០ដុល្លារក្នុងមួយខែ។ អ្នកទាំងអស់ត្រូវបានចោទប្រកាន់ពីបទញុះញង់ឲ្យប្រព្រឹត្តអំពើបង្កឲ្យមានភាពវឹកវរធ្ងន់ធ្ងរ ដល់សន្តិសុខសង្គម។សវនាការកន្លងទៅ សាលាដំបូងរាជធានីភ្នំពេញ ក៏បានសម្រេចប្តូរបទចោទលើលោក វន់ ពៅ ទៅជាបទអ្នកផ្តើមគំនិតឲ្យមានហិង្សា និងមានស្ថានទម្ងន់ទោស និងបង្កឲ្យខូចខាតដោយចេតនា និងមានស្ថានទម្ងន់ទោស។ហិង្សានៅផ្លូវវ៉េងស្រេងករណីកម្មករទាមទារប្រាក់ឈ្នួល១៦០ដុល្លារ បានបណ្តាលឲ្យមនុស្សយ៉ាងហោចណាស់៥នាក់ស្លាប់ ២៣នាក់ត្រូវចាប់ខ្លួន និងជិត៤០នាក់រងរបួស៕ ដកស្រង់ចេញពីវិទ្យុសម្លេងប្រជាធិបតេយ្យ (VOD) ចុះថ្ងៃទី៣០ ខែឧសភា ឆ្នាំ២០១៤។