-
អ្នកកាសែតម្នាក់ត្រូវបានគំរាមសម្លាប់បន្ទាប់ពីសរសេរអត្ថបទពាក់ព័ន្ធការកាប់ឈើ
- ថ្ងៃចេញផ្សាយ ៤-មិថុនា-២០១៤
ក្រុមមន្ត្រីតុលាការបានបញ្ជាក់កាលពីម្សិលមិញថា អ្នកកាសែតម្នាក់បានដាក់ពាក្យបណ្ដឹងទៅសាលាដំបូងខេត្តពោធិ៍សាត់ ចោទប្រកាន់ថា ទាហានម្នាក់បានគំរាមសម្លាប់គាត់កាលពីថ្ងៃអាទិត្យ បន្ទាប់ពីគាត់បានសរសេរអត្ថបទជាច្រើនភ្ជាប់ទាហានរូបនេះទៅនឹងការជួញដូរឈើប្រណីតខុសច្បាប់។ ទាំងកងយោធពលខេមរភូមិន្ទ និងសាលាដំបូងខេត្តបានលើកឡើងថា ពួកគេនឹងស៊ើបអង្កេតករណីនេះ។លោក សាក់ រុំ អ្នកយកព័ត៌មានឲ្យកាសែតការពិតជាកាសែតក្នុងស្រុក នៅស្រុកភ្នំក្រវាញ ដែលលោកក៏បានសរសេរព័ត៌មានឲ្យកាសែតនគរវត្តផងដែរ បានមានប្រសាសន៍ថា លោកបានដាក់ពាក្យបណ្ដឹងកាលពីថ្ងៃច័ន្ទ។លោក សាក់ រុំ បានមានប្រសាសន៍ថា “នៅម៉ោង៨និង៥នាទីយប់ថ្ងៃអាទិត្យ លោកសួស ទូច និងបុរសបួននាក់ទៀតស្លៀកពាក់ស៊ីវិលបានមកផ្ទះរបស់ខ្ញុំ ហើយបានគំរាមសម្លាប់ខ្ញុំ ប្រសិនបើខ្ញុំបន្តសរសេរអត្ថបទអំពីការជួញដូរឈើប្រណីតរបស់ពួកគេទៀត”។លោកបានមានប្រសាសន៍ថា ” លោក សួស ទូច បានប្រាប់ខ្ញុំឲ្យប្រុងប្រយ័ត្នចំពោះសេចក្ដីរាយការណ៍របស់ខ្ញុំ ពីព្រោះពីមុនខ្ញុំធ្លាប់រាយការណ៍ពីសកម្មភាពជួញដូរឈើប្រណីតរបស់ពួកគេ និងចែករំលែកអត្ថបទមួយចំនួនឲ្យកាសែតនគរវត្តផងដែរ”។ លោកបានបន្ថែមថាទាហានរូបនេះមានកាំភ្លើងក្នុងដៃ។លោក នាក់ សុវណ្ណ ក្រឡាបញ្ជីរបស់លោក តន់ សីហតេជះ ព្រះរាជអាជ្ញាអមសាលាដំបូងខេត្ត បានបញ្ជាក់ថា ពួកគាត់បានទទួលពាក្យបណ្ដឹងនេះហើយ ហើយនឹង ” បញ្ជូនពាក្យបណ្ដឹងនេះទៅព្រះរាជអាជ្ញាអមសាលាដំបូងខេត្តដើម្បីស៊ើបអង្កេតនៅចុងសប្ដាហ៍នេះ”។លោកបានបន្ថែមថា ” ពាក្យបណ្ដឹងនេះចោទប្រកាន់ទាហានរូបនេះពីបទប្រមាថជាសាធារណៈ ដោយធ្វើការគំរាមសម្លាប់ ហើយចូលក្នុងផ្ទះរបស់ខ្ញុំដោយគ្មានការអនុញ្ញាត”។លោក សួស ទូច មិនអាចទាក់ទងសុំអត្ថាធិប្បាយបានទេ ហើយថ្នាក់លើរបស់លោកបាននិយាយថា ពួកគេបានដឹងពីករណីនេះហើយ និងកំពុងធ្វើការស៊ើបអង្កេត។លោកឧត្តមសេនីយ៍ត្រី ឈុំ សេងហ៊ន នាយសេនាធិការកងពលតូចអន្តរាគមន៍លេខ១៤ នៃកងយោធពលខេមរភូមិន្ទ បានមានប្រសាសន៍ថា យើងនឹងសហការជាមួយនគរបាលប្រសិនបើតុលាការកោះហៅគាត់”។លោកបានបន្ថែមថា ” យើងមិនដឹងថា តើគាត់ជាអ្នកជួញដូរឈើប្រណីតមែន ឬមិនមែនឡើយ ប៉ុន្តែគាត់មិនអាចគំរាមសម្លាប់អ្នកកាសែតទេ”។លោកឧត្តមសេនីយ៍ទោ គឹម សេងង៉ុន មេបញ្ជាការកងពលតូចអន្តរាគមន៍លេខ១៤នៃកងយោធពលខេមរភូមិន្ទ បានមានប្រសាសន៍ថា លោក សួស ទូច នឹងត្រូវកោះហៅមកសាកសួរនៅថ្ងៃនេះ។លោកបានមានប្រសាសន៍ថា ” ខ្ញុំនឹងសាកសួរពីមូលហេតុដែលសេចក្តីរាយការណ៍នោះចោទប្រកាន់គាត់ [ពីបទជួញដូរ] និងសួរគាត់ពីមូលហេតុដែលគាត់មានកាំភ្លើង” នៅពេលគាត់និយាយជាមួយអ្នកយកព័ត៌មាន។ ខ្ញុំនឹងមិនលម្អៀងទេ។ ប្រសិនបើគាត់បានប្រព្រឹត្តដូចការចោទប្រកាន់មែន គាត់ត្រូវប្រឈមមុខផ្លូវច្បាប់”។អង្គការសិទ្ធិមនុស្សក្នុងស្រុកអាដហុក បានលើកឡើងថា ពួកគេក៏នឹងស៊ើបអង្កេតពាក្យបណ្ដឹងនេះដែរ។ លោក ហួង សុធា អ្នកសម្របសម្រួលអង្គការអាដហុកប្រចាំខេត្តនេះបានមានប្រសាសន៍ថា ” វាជាការរំលោភសិទ្ធិមនុស្សធ្ងន់ធ្ងរ ពីព្រោះអ្នកកាសែតឬប្រជាពលរដ្ឋគួរត្រូវបានអនុញ្ញាតឲ្យរាយការណ៍អំពីព័ត៌មានពិត”។នៅឆ្នាំនេះមានករណីគំរាមអ្នកកាសែតជាច្រើនដែលសរសេរអត្ថបទអំពីការកាប់ឈើខុសច្បាប់។ កាលពីខែមេសា ក្លឹបអ្នកកាសែតកម្ពុជាបានចេញសេចក្ដីថ្លែងការណ៍សម្ដែងកង្វល់ជុំវិញករណីអ្នកកាសែតបីនាក់ក្នុងខេត្តព្រះវិហារ ពោធិ៍សាត់និងខេត្តកំពង់ចាម ដែលត្រូវបានយាយីនៅពេលយកព័ត៌មានអំពីការកាប់ឈើខុសច្បាប់៕ ដកស្រង់ចេញពីការសែតខេមបូ ឌាដេលី (The Cambodia Daily News) ចុះថ្ងៃទី០៤ ខែមិថុនា ឆ្នាំ២០១៤។