-
កម្លាំងសមត្ថកិច្ចរារាំងក្បួនដង្ហែកម្មកររោងចក្រអូសេអង់ដែលគ្រោងមកក្រសួងការងារ
- ថ្ងៃចេញផ្សាយ ៥-មិថុនា-២០១៤
កម្លាំងសមត្ថកិច្ច នៅព្រឹកថ្ងៃព្រហស្បតិ៍នេះ រារាំងកម្មកររោងចក្រអូសេអង់ដែលគ្រោងដង្ហែក្បួនមកសុំអន្តរាគមន៍នៅក្រសួងការងារពាក់ព័ន្ធនឹងការទាមទារប្រាក់ឈ្នួលអំឡុងពេលព្យួរការងារ។នៅម៉ោងជិត៨ព្រឹកនេះ កម្មករប្រមាណជា៤០០នាក់ នៅរោងចក្រអូសេអង់ ស្ថិតនៅភូមិព្រៃទា សង្កាត់ចោមចៅ ខណ្ឌពោធិ៍សែនជ័យ បានដង្ហែក្បួនជាលើកទី២ មកកាន់ក្រសួងការងារបន្ទាប់ពីកិច្ចចរចាពហុភាគីរវាងថៅកែរោងចក្រ កម្មករ និងមន្ត្រីក្រសួងការងារ កាលពីថ្ងៃម្សិលមិញនេះបានបរាជ័យ។តំណាងកម្មករ និងជាប្រធានសហជីពប្រចាំរោងចក្រអូសេអង់ លោក ឆេង ឈាន់ ប្រាប់VODឲ្យដឹងថា ក្បួនដង្ហែរបស់កម្មករត្រូវបានអាជ្ញាធរ រារាំងចំនួនពីរលើកនៅព្រឹកនេះ នៅចំណុចមុខរោងចក្រ និងផ្លូវបំបែកមហាវិថី សហព័ន្ធរុស្ស៊ី។ លោកថា ក្រោយការរារាំងនេះ កម្មករបានសម្រេចអង្គុយនៅនឹងកន្លែងដោយលើកបដាទាមទារ ខណៈដែលមន្ត្រីក្រសួងការងារ បានចុះមកសម្របសម្រួលឲ្យមានកិច្ចចរចាជាថ្មីនៅព្រឹកនេះ និងប្រាប់ឲ្យកម្មកររង់ចាំដំណោះស្រាយ។ យ៉ាងណាក៏ដោយ រហូតមកទល់ម៉ោងជិត៩ព្រឹកនេះ គឺពុំមានហិង្សាណាមួយកើតឡើងនោះទេ។កម្មកររោងចក្រកាត់ដេរសម្លៀកបំពាក់អូសេអង់ហ្គាមិន (Ocean Garment) ប្រមាណ១៥០០នាក់ បានផ្តើមធ្វើកូដកម្មនៅមុខរោងចក្រ កាលពីថ្ងៃទី២៣ ខែឧសភា បន្ទាប់ភាគីរោងចក្រ ប្រកាសព្យួរការងាររបស់កម្មករ ចាប់ពីថ្ងៃទី២៦ ខែឧសភា ដល់ថ្ងៃទី២៦ ខែមិថុនា ដោយមិនបានជូនដំណឹងក្នុងពេលកំណត់ត្រឹមត្រូវតាមច្បាប់ គ្រាន់តែអះអាង គ្មានអ្នកបញ្ជាទិញ និងផ្តល់ប្រាក់១៥ដុល្លារម្នាក់ សម្រាប់រយៈពេលព្យួរការងារនេះ៕ដកស្រង់ចេញពីវិទ្យុសម្លេងប្រជាធិបតេយ្យ (VOD) ចុះថ្ងៃទី០៥ ខែមិថុនា ឆ្នាំ២០១៤។