-
គណបក្សសង្គ្រោះជាតិសម្រេចលុបចោល វេទិកាសាធារណៈរបស់ខ្លួន នៅស្រុកអន្លង់វែង ខេត្តឧត្តមានជ័យ
- ថ្ងៃចេញផ្សាយ ៩-មិថុនា-២០១៤
ក្រោយពីមានការរារាំងពីសំណាក់សមត្ថកិច្ចខេត្តឧត្តរមានជ័យ នៅចំណុចព្រៃស្អាក គណបក្សសង្គ្រោះសម្រេចលុបចោលកម្មវិធីវេទិកាសាធារណៈរបស់ខ្លួន ដែលគ្រោងធ្វើនៅទីរួមស្រុកអន្លង់វែងនៅព្រឹកថ្ងៃអាទិត្យនេះ។ក្រុមការងារគណបក្សសង្គ្រោះជាតិ លោកហុង សុខហួរ ប្រាប់ VOD ឲ្យដឹងថា ខាងក្រុមការងារ ក៏ដូចជាថ្នាក់ដឹកនាំរបស់ខ្លួន សម្រេចលុបចោលវេទិកាសាធារណៈនេះ បន្ទាប់ពីឃើញមានការដាក់ពង្រាយកម្លាំងសមត្ថកិច្ច ដើម្បីរារាំងកម្មវិធីនេះ។ លោកយល់ឃើញថា នេះជាការគម្រាមកំហែងដល់ប្រជាពលរដ្ឋ ហើយក៏ជារូបភាពមួយដ៏អាក្រក់នៅក្នុងលទ្ធិប្រជាធិបតេយ្យ។តាមអ្នករាយការណ៍ព័ត៌មានរបស់ VOD ដែលចុះទៅយកព័ត៌មាននៅស្រុកអន្លង់វែងឲ្យដឹងថា សមត្ថកិច្ចដែលដាក់ពង្រាយនៅតាមដងផ្លូវនៅចំណុចព្រៃស្អាក មានប្រដាប់ដោយអាវុធ ដំបងឆក់ និងខែល។ លោក បានរាយការណ៍បន្ថែមថា តាមប្រភពពីប្រជាពលរដ្ឋដែលធ្វើដំណើរឆ្លងកាត់ តំបន់ព្រៃស្អាក ឲ្យដឹងថា នៅចម្ងាយប្រហែលមួយរយម៉ែត្រពី កន្លែងដែលសមត្ថកិច្ចឈរជើងនោះ មានប្រជាពលរដ្ឋប្រមាណ២០០នាក់ ខ្លះមានកាន់ដំបង ខ្លះកាន់វិទ្យុទាក់ទង ហើយលើឡានរបស់ពួកគេមានចាក់មីក្រូ ដែលប្រជាពលរដ្ឋគិតថា ជាការរំខានដល់ការធ្វើដំណើររបស់មន្ត្រីគណបក្សសង្គ្រោះជាតិ ដែលចុះទៅស្រុកអន្លង់វែងនោះ។ជាមួយគ្នានៅស្រុកអន្លង់វែង ក៏មានប្រជាពលរដ្ឋប្រមាណមួយរយនាក់ មានកាន់ដំបង និង ចាក់មីក្រូនៅលើឡាន ក្នុងរូបភាពដូចគ្នានឹងប្រជាពលរដ្ឋដែលឈរជើងនៅកណ្ដាលព្រៃស្អាកនោះផងដែរ។អ្នកយកព័ត៌មានVOD បានសាកសួរកម្លាំងសមត្ថកិច្ចដែលឈរជើងនៅតំបន់ព្រៃស្អាក ពីវត្តមានរបស់ប្រជាពលរដ្ឋទាំងនោះ ប៉ុន្តែសមត្ថកិច្ចម្នាក់លោក សឿន ហៃ បានឲ្យដឹងថា លោកមិនដឹងថា ប្រជាពលរដ្ឋទាំងនោះមកពីខាងណា និងក្នុងគោលបំណងអ្វីទេ។លោកបូ សាវី ក៏បានរាយការណ៍ឲ្យដឹងបន្ថែមទៀតថា តាមព័ត៌មានដែលលោកបានសាកសួរពីក្រុមការងារគណបក្សសង្គ្រោះជាតិឲ្យដឹងថា ប្រជាពលរដ្ឋដែលប្រមូលផ្ដុំគ្នានៅក្នុងព្រៃស្អាក ជាអ្នកដកហូត ទូរស័ព្ទដៃ និងអាយផេត របស់អ្នកតំណាងរាស្ត្រជាប់ឆ្នោតគណបក្សសង្គ្រោះជាតិ លោកប៉ុល ហំ និងលោក អ៊ុជ ឆយយុទ្ធ។តាមគម្រោង ប្រធាន និងអនុប្រធានគណបក្សសង្គ្រោះជាតិ លោកសម រង្ស៊ី និងលោក កឹម សុខា នឹងទៅធ្វើវេទិកាសាធារណៈនៅស្រុកអន្លង់វែង ខេត្តឧត្តរមានជ័យនាព្រឹកនេះ ហើយនៅពេលល្ងាចលោកនឹងអញ្ជើញទៅធ្វើវេទិកានៅក្រុងសំរោង ខេត្តឧត្តរមានជ័យបន្តទៀត៕ ដកស្រង់ចេញពីវិទ្យុសម្លេងប្រជាធិបតេយ្យ (VOD) ចុះថ្ងៃទី០៨ ខែមិថុនា ឆ្នាំ២០១៤។