-
ពលរដ្ឋ៥នាក់រងបួសក្នុងពេលតវ៉ារឿងដីធ្លីមុខសាលារាជធានីភ្នំពេញ
- ថ្ងៃចេញផ្សាយ ២៩-កក្កដា-២០១៤
ពលរដ្ឋរងគ្រោះដោយសារដីធ្លីប្រមាណ ២០០នាក់ មកពីសហគមន៍ ៤ មានសហគមន៍បឹងកក់ បុរីកីឡា ថ្មគោល និងសហគមន៍ព្រៃទា បាននាំគ្នាមកតវ៉ាមុខសាលារាធានីភ្នំពេញ ស្នើសុំអោយអភិបាលរាជធានីភ្នំពេញ លោក ប៉ា សុជាតិវង្ស ជួយពន្លឿននីតិវិធី និងដំណោះស្រាយដីជូនពួកគាត់អោយបានឆាប់រហ័ស ដូចដែលធ្លាប់បានសន្យាកន្លងមក។ក្នុងការតវ៉ានៅមុខសាលារាជធានីភ្នំពេញ នៅព្រឹកថ្ងៃទី២៨ កក្កដា ការប៉ះទង្គិចគ្នាមួយបានកើតឡើង ហើយបានបណ្ដាលអោយស្ត្រី ១នាក់សន្លប់ និងមនុស្ស ៤នាក់ ទៀតរងរបួស ខណៈដែលក្រុមសន្តិសុខខណ្ឌដូនពេញ និងកងសមត្ថកិច្ចប្រដាប់ដោយខែលនិងដំបង ប្រហែលមួយរយនាក់ ព្យាយាមរារាំងអ្នកតវ៉ាដីធ្លីមិនអោយឆ្លងថ្នល់ទៅមុខសាលារាជធានី ភ្នំពេញ។ស្ត្រីពីរនាក់មកពីសហគមន៍បុរីកីឡា គឺលោកស្រី ខែម ស្រី ត្រូវបានសន្តិសុខសាលាខណ្ឌដូនពេញ ប្រើដំបងឆក់ ឆក់អោយសន្លប់ និងលោកស្រី ប្រាក់ សុផា រងរបួសធ្ងន់ត្រង់កំភួនដៃខាងឆ្វេង ហើយលោកស្រី បូ ឆវី មកពីសហគមន៍បឹងកក់ រងបួសធ្ងន់ត្រង់ថ្ពាល់ខាងស្ដាំ។ ចំណែកលោក ច័ន្ទ ពុទ្ធិសក្តិ និងលោក ដួង ឆឺត រងរបួសស្រាល ដោយកងសន្តិសុខលោតធាក់ពីក្រោយ៕ដកស្រង់ចេញពី វិទ្យុអាស៊ីសេរី ចុះថ្ងៃទី ២៨ កក្កដា ឆ្នាំ២០១៤។