-
អ្នកភូមិឡពាង ព្រមានធ្វើបាតុកម្មធំនៅដើមខែក្រោយ ដើម្បីឲ្យតុលាការដោះលែងសកម្មជនដីធ្លីពីរនាក់
- ថ្ងៃចេញផ្សាយ ២៩-កក្កដា-២០១៤
អ្នកមានជម្លោះដីធ្លីនៅភូមិឡពាង ខេត្តកំពង់ឆ្នាំង ព្រមានធ្វើបាតុកម្មទ្រង់ទ្រាយធំនៅ នាដើមខែសីហា ដើម្បីទាមទារឲ្យតុលាការដោះលែងសកម្មជនដីធ្លីចំនួនពីរនាក់ឲ្យមាន សេរីភាពវិញ។សកម្មជនដីធ្លីពីរនាក់ នៅភូមិឡពាង ឃុំតាជេស ស្រុកកំពង់ត្រឡាច ត្រូវបានអាជ្ញាធររដ្ឋាភិបាលចាប់បញ្ជូនទៅតុលាការខេត្តនេះ កាលពីថ្ងៃទី២១ ខែកក្កដា ខណៈពួកគេមានជម្លោះជាមួយក្រុមហ៊ុន KDC របស់លោកស្រី ជា ខេង ភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពល ។តំណាងប្រជាពលរដ្ឋម្នាក់នៅភូមិឡពាង លោក ស្ងួន ញឿន ប្រាប់VODនៅថ្ងៃអង្គារនេះថា ពួកគាត់កំពុង សហការជាមួយសហគមន៍ដីធ្លីនៅទូទាំង២៤ខេត្ត/ក្រុង ដើម្បីប្រមូលផ្តុំធ្វើបាតុកម្មនៅមុខតុលាការខេត្ត ដោយទាមទារ ដោះលែងសកម្មជនដីធ្លីចំនួនពីរនាក់នោះ ព្រោះពួកគេ មិនមានកំហុសដូចការចោទប្រកាន់នោះទេ។លោក ស្ងួន ញឿន ឲ្យដឹងទៀតថា ចាប់ពីថ្ងៃទី២១ ខែកក្កដា ដល់២៩ខែកក្កដានេះ សមត្ថកិច្ចប្រមាណជាង១០០នាក់ នៅតែបន្តបិទផ្លូវលំ ដែលចូលទៅផ្ទះពលរដ្ឋ ដោយគំរាមមិនឲ្យពួកគេចេញទៅណានោះទេ។តំណាងអ្នកឡភូមិពាងម្នាក់ទៀត អ្នកស្រី នាង បក់ ឲ្យដឹងដែរថា បើតុលាការមិនដោះលែងសកម្មជនដីធ្លីពីរនាក់នោះទេ ពួកគាត់នឹងនាំគ្នាទៅធ្វើបាតុកម្មនៅមុខតុលាការ បើទោះជាមានការចាប់ខ្លួនពួកគាត់ដាក់ពន្ធនាគារបន្ថែមទៀតក៏ដោយ។VOD មិនអាចសុំការអត្ថាធិប្បាយពីប្រធានតុលាការខេត្តកំពង់ឆ្នាំង លោក តេង រតនា បានទេនៅថ្ងៃអង្គារនេះ ដោយអ្នកផ្សេងទទួលទូរស័ព្ទប្រាប់ថា ជាប់រវល់។មន្ត្រីស៊ើបអង្កេតនៅសមាគមការពារសិទ្ធិមនុស្សអាដហុក លោក ចាន់ សុវ៉េត មានប្រសាសន៍ថា តុលាការឃុំខ្លួនសកម្មជនដីធ្លីពីរនាក់ និងចោទប្រកាន់ពីបទហិង្សា និងបំផ្លិតបំផ្លាញទ្រព្យសម្បត្តិរបស់ក្រុមហ៊ុននោះជារឿងអយុត្តិធម៌។ លោកថា តុលាការគួរតែធ្វើការស៊ើបអង្កេតស្វែងរកភស្តុតាងឲ្យច្បាស់លាស់មុននិង ធ្វើការចោទប្រកាន់ និងឃុំខ្លួនសកម្មជន ទាំងនោះ។ទំនាស់ដីធ្លីរវាងក្រុមហ៊ុន KDC របស់លោកស្រីជា ខេង ភរិយាលោកស៊ុយ សែម រដ្ឋមន្ត្រីក្រសួងរ៉ែ និងថាមពល ជាមួយអ្នកភូមិឡពាង ភូមិសូរវង្ស ភូមិបឹងកក់ និងភូមិសំរោង បានចាប់ផ្តើមតាំងពីឆ្នាំ ២០០៦ ។ ពលរដ្ឋអះអាងថា ពួកគាត់បានស្វែងរកដំណោះស្រាយទៅអាជ្ញាធរគ្រប់ថ្នាក់ និងតុលាការផងដែរ តែរហូតមកទល់ពេលនេះនៅតែមិនមានដំណោះស្រាយ៕ដកស្រង់ចេញពី វិទ្យុសម្លេងប្រជាធិបតេយ្យ ចុះថ្ងៃទី ២៩ ខែកក្កដា ឆ្នាំ២០១៤។