-
យុវជនបក្សសង្គ្រោះជាតិ៣នាក់ត្រូវឃុំខ្លួនបណ្ដោះអាសន្ននៅគុកព្រៃស
- ថ្ងៃចេញផ្សាយ ៤-សីហា-២០១៤
យុវជនគណបក្សសង្គ្រោះជាតិ ៣រូប ត្រូវបញ្ជូនទៅឃុំខ្លួនបណ្ដោះអាសន្ននៅពន្ធនាគារព្រៃស នៅរសៀលថ្ងៃទី២ ខែកក្កដា ដើម្បីរង់ចាំស៊ើបអង្កេត។ ពួកគេត្រូវចោទប្រកាន់ពីបទព្រហ្មទណ្ឌ ពាក់ព័ន្ធនឹងអំពើហិង្សានៅក្បែរទីលានប្រជាធិបតេយ្យ កាលពីថ្ងៃទី១៥ ខែកក្កដា។អង្គការសង្គមស៊ីវិល ដែលឃ្លាំមើល ចាត់ទុកករណីនេះថា ជាសម្ពាធនយោបាយទៅលើគណបក្សប្រឆាំងពីសំណាក់គណបក្សកាន់អំណាច ដើម្បីចាប់បង្ខំគណបក្សនេះអោយទទួលយកកិច្ចព្រមព្រៀងចូលសភា។យុវជនគណបក្សសង្គ្រោះជាតិ ទាំងបីរូបនោះ ត្រូវចោទប្រកាន់ពីបទចោទមួយចំនួន ក្នុងនោះមានបទចូលរួមកុបកម្ម បទហិង្សាដោយចេតនា និងប្រមាថមន្ត្រីរាជការ។លោកមេធាវី សំ សុខគង់ មានប្រសាសន៍ថា ដោយសារចៅក្រមកាន់សំណុំរឿងពុំមានវត្តមាននៅតុលាការ ទើបមានការសម្រេចឃុំខ្លួនជាបណ្ដោះអាសន្ន រង់ចាំចៅក្រមកាន់សំណុំរឿង គឺលោក កែវ មុនី ស៊ើបអង្កេតនៅដើមសប្ដាហ៍ក្រោយ។ លោកមេធាវី សំ សុគង់ បញ្ជាក់ថា ក្រុមមេធាវីបានព្យាយាមសុំអោយអ្នកទាំង ៣នាក់ បាននៅក្រៅឃុំដែរ ប៉ុន្តែត្រូវព្រះរាជអាជ្ញាបដិសេធ។ លោក សុគង់ កត់សម្គាល់ថា ការឃាត់ខ្លួន និងឃុំខ្លួនកូនក្ដីលោកនៅពេលនេះ គឺបានធ្វើខុសនីតិវិធី៖ «ចៅក្រមស៊ើបសួរមិនបានប្រើប្រាស់នូវ នីតិវិធី ដែលមានចែងក្នុងនីតិវិធីក្រមព្រហ្មទណ្ឌទេ គឺថាមិនបានចេញដីកាកោះហៅគាត់អោយចូលមកបំភ្លឺ ហើយប្រសិនបើគាត់មិនចូលខ្លួនហ្នឹង គឺអាចចេញដីកានាំខ្លួន ឬចាប់ខ្លួន»។យុវជនទាំងបីរូបនោះរួមមាន លោក ឃិន ជំរឿន ប្រធានចលនាយុវជនគណបក្សសង្គ្រោះជាតិ លោក នាង សុឃុន ជាហិរញ្ញិកចលនាយុវជនគណបក្សសង្គ្រោះជាតិ ក្នុងខណ្ឌច្បារអំពៅ និងលោក សាន គឹមហេង ជាប្រធានចលនាយុវជនគណបក្សសង្គ្រោះជាតិ ខណ្ឌទួលគោក។ ពួកគេត្រូវនគរបាលចាប់ខ្លួនបន្តបន្ទាប់គ្នានៅថ្ងៃទី២ ខែសីហា និងត្រូវបញ្ជូនទៅស្នងការដ្ឋាននគរបាលរាជធានីភ្នំពេញ បន្ទាប់មកទៅតុលាការ និងចុងក្រោយ ត្រូវបញ្ជូនទៅឃុំខ្លួនបណ្ដោះអាសន្ននៅពន្ធនាគារព្រៃស រង់ចាំការសាកសួរ។គណបក្សសង្គ្រោះជាតិ បានចេញសេចក្ដីថ្លែងការណ៍ភ្លាមៗនៅថ្ងៃដដែលនេះ ដោយថ្កោលទោសចំពោះការចាប់ខ្លួននេះ និងអំពាវនាវអោយដោះលែងអ្នកទាំងនោះដោយគ្មានលក្ខខណ្ឌ។ លើសពីនេះ គណបក្សនេះបានបញ្ជាក់ទៅគណបក្សប្រជាជនកម្ពុជា អោយបញ្ឈប់ការគំរាមកំហែង។ស្របគ្នានឹងការចាប់ខ្លួនសកម្មជននេះ សាលាដំបូងរាជធានីភ្នំពេញ ក៏បានកោះហៅសមាជិកគណបក្សសង្គ្រោះជាតិ ចំនួន ៩នាក់ ក្នុងនោះមាន លោក កឹម សុខា ផង ឲ្យចូលខ្លួនទៅបំភ្លឺនៅសាលាដំបូងរាជធានីភ្នំពេញ នៅថ្ងៃទី១១ សីហា សាកសួរអំពីការដឹកនាំធ្វើបាតុកម្មកាលពីថ្ងៃទី១៥ សីហា។អនុប្រធានគណបក្សសង្គ្រោះជាតិ លោក កឹម សុខា ថ្លែងថា ករណីនេះជាការគំរាមកំហែងនយោបាយ។ យ៉ាងណា គណបក្សលោកនឹងនៅតែប្រកាន់ជំហរមិនផ្លាស់ប្ដូរទេ ចំពោះការទាមទារដើម្បីផលប្រយោជន៍ជាតិជាមួយគណបក្សប្រជាជនកម្ពុជា៖ «យើង មានការគោលការណ៍ យើងចង់អោយមានការកែទម្រង់ ស្អីដែលយើងទាមទារដោយអប្បបរមានោះ យើងនៅតែទាមទារដដែល មិនអាចទៅក្រោមហ្នឹងទៀតទេ ទោះបីមានការគំរាមកំហែងក៏ដោយ ព្រោះនេះជាប្រយោជន៍របស់ប្រជាជន»។ចំពោះអ្នកឃ្លាំមើលករណីនេះ លោក អំ សំអាត ចាត់ទុកករណីនេះថាជាសម្ពាធផ្នែកនយោបាយដែរនោះ បានអំពាវនាវអោយគណបក្សទាំង២ ពិភាក្សាគ្នាដោយសន្តិវិធី ដើម្បីចៀសវាងបញ្ហាចម្រូងចម្រាសដែលអាចកើតឡើងដោយបញ្ហានេះ៖ «រឿង អ្វីៗនឹងកើតជាយថាហេតុបន្តទៀត យើងអត់មើលឃើញទេ ចឹងយើងសង្គមស៊ីវិល យើងចង់ឃើញគណបក្សទាំង២ឈរលើឧត្តមប្រយោជន៍ជាតិ ប្រយោជន៍ពលរដ្ឋជាធំ ហើយធ្វើការដោះស្រាយ»។ទាក់ទងនឹងករណីអំពើហិង្សានៅក្បែរទីលានប្រជាធិបតេយ្យ កាលពីថ្ងៃទី១៥ កក្កដា បេក្ខជនតំណាងរាស្ត្រគណបក្សប្រឆាំង ៧នាក់ និងសកម្មជនម្នាក់ ដែលត្រូវរដ្ឋាភិបាលចាប់ឃុំខ្លួនចំនួន ១សប្ដាហ៍ ត្រូវបានចោទប្រកាន់ពីបទដឹកនាំកុបកម្ម បទញុះញង់ឲ្យប្រព្រឹត្តបទឧក្រិដ្ឋ និងបទផ្ដើមគំនិតក្នុងអំពើហិង្សា ប៉ុន្តែត្រូវដោះលែងមកវិញនៅថ្ងៃទី២២ កក្កដា នៅក្រោយមានកិច្ចព្រមព្រៀងបញ្ចប់ភាពជាប់គាំងនយោបាយ៕ដកស្រង់ចេញពី វិទ្យុអាស៊ីសេរី ចុះថ្ងៃទី ០២ ខែសីហា ឆ្នាំ២០១៤។