អ្នកភូមិឡពាង៣នាក់ត្រូវសមត្ថកិច្ចចាប់ខ្លួនខណៈពួកគេហែក្បួនថ្មើរជើងមករកអន្តរាគមន៍មកភ្នំពេញ

អ្នកភូមិឡពាង៣នាក់ត្រូវសមត្ថកិច្ចចាប់ខ្លួនខណៈពួកគេហែក្បួនថ្មើរជើងមករកអន្តរាគមន៍មកភ្នំពេញ
- ថ្ងៃចេញផ្សាយ ១២-សីហា-២០១៤
ប្រជាពលរដ្ឋមានជម្លោះដីធ្លីនៅភូមិឡពាង ខេត្តកំពង់ឆ្នាំង ត្រូវបានសមត្ថកិច្ចចាប់ខ្លួនបីនាក់ នៅម៉ោង១១ និង៣០នាទីព្រឹកនេះ នៅត្រង់ចំណុចភូមិអូរូង ឃុំឈូកស ស្រុកកំពង់ត្រឡាច ខេត្តកំពង់ឆ្នាំង ខណៈពួកគេដើរហែក្បួនចេញពីភូមិមកកាន់រាជធានីភ្នំពេញនេះ ។តំណាងពលរដ្ឋដែលសមត្ថកិច្ចចាប់ខ្លួននោះមានលោក ស្ងួន ញ៉េន លោក ស្រ៊ុន ថា និង លោក គុច ហុក។ បន្ទាប់ពីចាប់ខ្លួនតំណាង៣នាក់នេះ ប្រជាពលរដ្ឋផ្សេងទៀតសម្រេចផ្អាកការហែក្បួនមកកាន់ភ្នំពេញ ដោយអះអាងថា ពលរដ្ឋមួយចំនួនរងរបួសពេលប៉ះទង្គិចជាមួយសមត្ថកិច្ច ចំណែកឆ្នាំងបាយ និង អង្ករ ដែលពួកគាត់ត្រៀមបរិភោគតាមផ្លូវត្រូវសមត្ថកិច្ចជាង១០០នាក់បំផ្លាញ ចោលអស់។ VOD មិនសុំការឆ្លើយតបពីស្នងការនគរបាលខេត្តកំពង់ឆ្នាំងបានឡើយទេ នៅថ្ងៃត្រង់ថ្ងៃអង្គារនេះ។កាលពីព្រឹកថ្ងៃអង្គារនេះ អ្នកមានជម្លោះដីធ្លីនៅភូមិឡពាង ខេត្តកំពង់ឆ្នាំងជាង៧០នាក់បានប៉ះទង្គិចជាមួយអាជ្ញាធរមូលដ្ឋានមួយ ប្រាវ ដោយពួកគេទម្លុះរបាំងការពាររបស់អាជ្ញាធរមូលដ្ឋាន ដែលរារាំងពួកគេមិនឲ្យចេញពីភូមិ ដើម្បីមកស្វែងរកកិច្ចអន្តរាគមន៍ពីស្ថាប័នធំៗនៅភ្នំពេញ។ប្រជាពលរដ្ឋដែលហែក្បួនជាពលរដ្ឋមកពីភូមិឡពាង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង ដែលមានទំនាស់ដីធ្លីជាមួយ ក្រុមហ៊ុន KDC របស់លោកស្រី ជា ខេង ភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពល ។ក្រុមអ្នកតវ៉ាអះអាងថា ជម្លោះដីធ្លីជាមួយក្រុមហ៊ុនលោកស្រី ជា ខេង នេះ បានអូសបន្លាយជិត១០ឆ្នាំមកហើយ ដែលធ្វើឲ្យតំណាងអ្នកភូមិយ៉ាងតិច៨នាក់ត្រូវ ក្រុមហ៊ុនចាប់ដាក់ពន្ធនាគារ ដោយសាតែចេញមុខការពារដីរបស់ខ្លួន។ ក្នុងនោះ៦នាក់ បានទទួលទោសរួចហើយ ពីរនាក់ផ្សេងទៀតកំពុងឃុំខ្លួន និង៨នាក់បន្ថែមទៀតកំពុងប្រឈមនឹងការចាប់ខ្លួន៕ដកស្រង់ចេញពី វិទ្យុសម្លេងប្រជាធិបតេយ្យ ចេញផ្សាយថ្ងៃទី១២ ខែសីហា ឆ្នាំ ២០១៤ ។