-
ពលរដ្ឋមានទំនាស់ដីធ្លីនៅកំពង់ស្ពឺមកទាមទាររកដំណោះស្រាយពីធនាគារ ANZ
- ថ្ងៃចេញផ្សាយ ១៤-សីហា-២០១៤
ប្រជាពលរដ្ឋជាង១០០នាក់មកពីសហគមន៍ថ្គង់ និងឱរ៉ាល់ក្នុងខេត្តកំពង់ស្ពឺ ដែលមានទំនាស់ដីធ្លីជាមួយក្រុមហ៊ុនភ្នំពេញស៊ូហ្គ័រ របស់លោក លីយ៉ុងផាត់ ឡើងមកតវ៉ាទាមទាររកដំណោះស្រាយមុខធនាគារ ANZ នៅភ្នំពេញ ដោយធនាគារនេះធ្លាប់ជាអ្នកផ្ដល់ហិរញ្ញប្បទានទៅក្រុមហ៊ុន។ក្រុមអ្នកតវ៉ាឲ្យដឹងថា គោលបំណងនៃការជួបជុំនៅថ្ងៃនេះ គឺទាមទារឲ្យធនាគារនេះ កំណត់ថ្ងៃប្រជុំជាមួយតំណាងសហគមន៍ដូចដែលពួកគាត់ធ្លាប់បានសំណូមពរ ។កាលពីថ្ងៃទី១៣ ខែសីហាម្សិលមិញនេះ សហគមន៍ខេត្តកំពង់ស្ពឺបានចេញសេចក្ដីប្រកាសព័ត៌មាន ឲ្យដឹងថា កាលពីថ្ងៃទី១ ខែសីហា ឆ្នាំ២០១៤ តំណាងសហគមន៍ឱរ៉ាល់ និងសហគមន៍ថ្គង់ក្នុងខេត្តកំពង់ស្ពឺដែលបានរងផលប៉ះពាល់ជាអវិជ្ជមាន ដោយចម្ការអំពៅដែលបានទទួលហិរញ្ញប្បទានពី ធនាគារ អេ អិន ហ្សិត (ANZ) បានដាក់បណ្ដឹងទៅកាន់ការិយាល័យកណ្ដាលរបស់ធនាគារនេះ ។សេចក្ដីប្រកាសព័ត៌មានបន្តថា បណ្ដឹងដែលត្រូវបានផ្ដិតមេដៃដោយសហគមន៍ជាង៣០០នាក់នោះ ទាមទារឲ្យខាងធនាគារឆ្លើយតប និងរៀបចំកិច្ចប្រជុំមួយក្នុងរយៈពេលមួយសប្ដាហ៍ តែមិនទាន់មានការឆ្លើយតបរហូតដល់ពេលបច្ចុប្បន្ន ។នាវេលាម៉ោងប្រមាណ១១និង២០នាទីថ្ងៃព្រហស្បតិ៍នេះ ខាងធនាគារអនុញ្ញាតឲ្យតំណាងសហគមន៍៣រូបចូលទៅពិភាក្សាខាងក្នុង ធនាគារ តែពុំទាន់ទទួលបានលទ្ធផលនៅឡើយទេ ។កាលពីថ្ងៃចន្ទទី៧ខែកក្កដាកន្លងទៅ អង្គការសមធម៌កម្ពុជា និងអង្គការអាយឌីអាយ(IDI) នៅសហរដ្ឋអាមេរិក បានចេញលិខិតរួមមួយដោសរសេរថា ធនាគារ ANZ ផ្តាច់ទំនាក់ទំនង ពាណិជ្ជកម្ម ជាមួយក្រុមហ៊ុនស្ករអំពៅនៅកម្ពុជាឈ្មោះ ភ្នំពេញស៊ូហ្គ័រ ដោយពុំបានដោះស្រាយផលប៉ះពាល់យ៉ាងធ្ងន់ធ្ងរ ដែលកើតឡើងលើប្រជាពលរដ្ឋរាប់រយគ្រួសារ ក្នុងស្រុកថ្គង និងស្រុកឱរ៉ាល់ ខេត្តកំពង់ស្ពឺ។អង្គការទាំង២នេះក៏បានរកឃើញថា ចម្ការអំពៅនេះ ជាប់ពាក់ព័ន្ធនឹងការប្រើប្រាស់កម្លាំងពលកម្មលើកុមារ ការចាប់ខ្លួនដោយបំពាន និងការគំរាមកំហែងអ្នកភូមិ ព្រមទាំងមានលក្ខខណ្ឌការងារគ្រោះថ្នាក់ បណ្តាលឲ្យកម្មករជាច្រើននាក់បាត់បង់ជីវិត។នាយកគ្រប់គ្រងអង្គការ អាយ ឌី អាយ (IDI) លោក ដេវី ប្រេដ ត្រូវបានដកស្រង់សម្ដីមកសរសេរក្នុងលិខិតនាថ្ងៃ៧ ខែកក្កដានោះថា ធនាគារ ANZ មានកាតព្វកិច្ចទទួលខុសត្រូវចំពោះប្រជាពរដ្ឋ ដែលដីធ្លីរបស់ពួកគេ ត្រូវបានរំលោភយក ដោយបន្ថែមថា ប្រសិនបើ ក្រុមហ៊ុន ភ្នំពេញស៊ូហ្គ័រ បដិសេធក្នុងការសងសំណងចំពោះផលប៉ះពាល់នេះ ធនាគារ ANZ គួរតែផ្តល់សំណងដល់ជនរងគ្រោះទាំងនោះ។នៅឆ្នាំ២០១០ និងឆ្នាំ២០១១ ក្រុមហ៊ុនភ្នំពេញស៊ូហ្គ័រ (Phnom Penh Sugar Co.LTD) របស់លោក លី យ៉ុងផាត់ បានទទួលដីសម្បទានសេដ្ឋកិច្ចពីរាជរដ្ឋាភិបាល ទំហំប្រហែល៩ពាន់ហិកតា នៅក្នុងស្រុកថ្ពង និងជាង១៣,៧៥២ហិកតា នៅស្រុកឱរ៉ាល់ ខេត្តកំពង់ស្ពឺ៕ដកស្រង់ចេញពី វិទ្យុសម្លេងប្រជាធិបតេយ្យ ចេញផ្សាយថ្ងៃទី១៤ ខែសីហា ឆ្នាំ ២០១៤ ។