-
យុវជន៣នាក់របស់គណបក្សសង្គ្រោះជាតិត្រូវបានដោះលែងឲ្យនៅក្រៅឃុំ
- ថ្ងៃចេញផ្សាយ ២២-សីហា-២០១៤
សកម្មជនគណបក្សសង្គ្រោះជាតិទាំង៣រូប ដែលត្រូវបានសាលាដំបូងរាជធានីភ្នំពេញចោទទាក់ទងករណីហិង្សា ក្បែរទីលានប្រជាធិបតេយ្យកាលពីថ្ងៃទី១៥ កក្កដា នៅព្រឹកនេះ ត្រូវបានសាលាឧទ្ធរណ៍សម្រេចឲ្យនៅក្រៅឃុំ ដោយស្ថិតក្រោមការត្រួតពិនិត្យរបស់តុលាការ។លោក ហ៊ូ វ៉ាន មានប្រសាសន៍ក្រោយចេញពីសវនាការសាលាឧទ្ធរណ៍លើករណីយុវជនទាំងបីនាក់ ថា ការសម្រេចដាក់ឲ្យយុវជនទាំង៣នាក់នៅក្រៅឃុំដោយស្ថិតក្រោម ការត្រួតពិនិត្យរបស់តុលាការនេះ គឺជាយុត្តិធម៌មួយសម្រាប់ពួកគេ។ លោកថា សម្រាប់យុវជន៥នាក់ផ្សេងទៀតដែលនឹងត្រូវកោះហៅនាពេលខាងមុខនេះ គ្រាន់តែជាឥទ្ធិពលនៃនីតិវិធីប៉ុណ្ណោះ ប៉ុន្តែនឹងមិនមានបញ្ហាអ្វីចោទនោះទេ។សម្រាប់តំណាងរាស្ត្រជាប់ឆ្នោតខេត្តស្វាយរៀង លោក រៀល ខេមរិន្ទ្រ ដែលបានចូលរួមតាមដានក្នុងសវនាការនោះដែរ មានប្រសាសន៍ថា យុវជនទាំង៣រូបនេះ ត្រូវបានសាលាឧទ្ធរណ៍សម្រេចឲ្យនៅក្រៅឃុំ តែសម្រាប់សម្ភារ ដែលតុលាការរឹបអូស ដូចជា រថយន្ត ទូរស័ព្ទដៃជាដើមនោះ នឹងត្រូវបើកសវនាការសម្រេចម្តងទៀតនៅថ្ងៃទី២ ខែកញ្ញា ឆ្នាំ២០១៤ ខាងមុខ។បើតាមមេធាវីរបស់យុវជនទាំង៣នាក់នោះ លោក ជិន លីដា លើកឡើងថា ក្នុងការដោះលែងឲ្យស្ថិតនៅក្រៅឃុំ យុវជនទាំង៣នាក់ត្រូវបំពេញលក្ខខណ្ឌរបស់តុលាកាចំនួន៤ រួមមាន ទី១ មិនត្រូវចាកចេញទៅក្រៅប្រទេស ទី២ មិនត្រូវផ្លាស់ប្តូរទីលំនៅ ទី៣ ពេលតុលាការកោះហៅត្រូវតែចូលខ្លួនតាមការកោះ និងទី៤ ត្រូវដាក់ប្រាក់តម្កល់១០លានរៀលក្នុងម្នាក់។ អ្នកស្រី ង៉ូវ ភឿង ម្តាយរបស់យុវជនសង្គ្រោះជាតិគឺលោក នាង សុឃុន ដែលទើបតែត្រូវបានសម្រេចឲ្យនៅក្រៅឃុំ សម្តែងពីការសាទរលើការសម្រេចរបស់សាលាឧទ្ធរណ៍ថា អ្នកស្រីសប្បាយរីករាយណាស់ដោយបានឃើញកូនចេញពីមន្ទីរឃុំឃាំង បើទោះជាត្រូវស្ថិតនៅក្រៅឃុំក៏ដោយ។ពាក់ព័ន្ធនឹងការដោះលែងឲ្យនៅក្រៅឃុំនេះដែរ ប្រធានផ្នែកស៊ើបអង្កេតសិទ្ធិមនុស្សសមាគមអាដហុក លោក នី ចរិយា យល់ថា ការសម្រេចរបស់សាលាឧទ្ធរណ៍គ្រាន់តែជារឿងនយោបាយដូចទៅនឹងរឿង ចាប់ខ្លួនតំណាងរាស្ត្រគណបក្សសង្គ្រោះជាតិកន្លងមកដែរ។ លោកថា បើតាមផ្លូវច្បាប់អ្នកទាំង៣នោះគឺមិនមានទោសនោះទេ ដូច្នេះតុលាការគ្រាន់តែធ្វើឲ្យត្រឹមត្រូវតាមនីតិវិធីប៉ុណ្ណោះ។សកម្មជនគណបក្សសង្គ្រោះជាតិទាំង៣រូបដែលត្រូវបានសមត្ថកិច្ច ចាប់ខ្លួន កាលពីថ្ងៃទី២ ខែសីហានោះ រួមមាន លោក ឃិន ជំរឿន ប្រធានចលនាយុវជនគណបក្សសង្គ្រោះជាតិរាជធានីភ្នំពេញ និងជាសមាជិកក្រុមប្រឹក្សាជាប់ឆ្នោតខណ្ឌច្បារអំពៅ លោក សាន គីមហេង ប្រធានចលនាយុវជនគណបក្សសង្គ្រោះជាតិខណ្ឌទួលគោក និងជាសមាជិកក្រុមប្រឹក្សាជាប់ឆ្នោតខណ្ឌទួលគោក និងលោក នាង សុឃុន ហេរញ្ញិកចលនា យុវជនគណបក្សសង្គ្រោះជាតិខណ្ឌច្បារអំពៅ។ដោយឡែកមន្ត្រី និងសកម្មជនគណបក្សសង្គ្រោះជាតិ៥នាក់ផ្សេងទៀតត្រូវបានកោះហៅឲ្យចូល បំភ្លឺនៅសាលាដំបូងរាជធានីភ្នំពេញនាពេលខាងមុខ៕ដកស្រង់ចេញពី វិទ្យុសម្លេងប្រជាធិបតេយ្យ ចេញផ្សាយថ្ងៃទី២២ ខែសីហា ឆ្នាំ ២០១៤ ។