-
កម្មកររោងចក្រស៊ីនហ្វាងនៅសង្កាត់ចោមចៅ ធ្វើបាតុកម្មដុតកង់រថយន្តទាមទារលក្ខខណ្ឌការងារ
- ថ្ងៃចេញផ្សាយ ២៨-សីហា-២០១៤
កម្មករប្រមាណ២៥០នាក់ មកពីរោងចក្រស៊ីនហ្វាង ខេមបូឌា ហ្គាមមែន ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ នៅព្រឹកថ្ងៃពុធនេះ បន្តធ្វើបាតុកម្មដុតកង់រថយន្ត ដើម្បីស្វែងរកដំណោះស្រាយការបញ្ឈប់កម្មករ និងលក្ខខណ្ឌការងារមួយចំនួនទៀត។អ្នកស្រី ឆេន វណ្ណា អាយុ៣៤ឆ្នាំ ជាប្រធានសហជីពនៅក្នុងរោងចក្រ និងត្រូវបានបញ្ឈប់កាលពីថ្ងៃទី០៧ខែឧសភាឆ្នាំ២០១៤ មានប្រសាសន៍ថាអ្នកស្រី និងកម្មករផ្សេងទៀត បានតវ៉ាតាំងពីថ្ងៃទី១៨ខែសីហា ដោយទាមទារឲ្យយកកម្មករបីនាក់ចូលធ្វើការវិញ រួមមានអ្នកស្រី អ្នកស្រី ហង្ស ដានី ជាប្រធានផ្នែក និងអ្នកស្រីសុត ចន្ធូ ជាសកម្មជនសហជីព ដែលត្រូវបានបញ្ឈប់អំឡុងពេលធ្វើបាតុកម្ម។ អ្នកស្រីបន្តថា កម្មករក៏ទាមទារលុយថ្លៃបាយថ្ងៃត្រង់ចំនួន២០០០រៀល លុយធ្វើដំណើរចំនួន១៥ដុល្លារ និងលក្ខខណ្ឌជាង១០ចំណុចផ្សេងទៀត ដូចជាការបញ្ឈប់គំរាមកំហែងសហជីព ការគោរពសិទ្ធិកម្មករ និងការផ្លាស់ប្តូរធុងញ៉ាំទឹកជាដើម។ អ្នកស្រីបន្តថា ភាគីរោងចក្រ មិនបានចេញមុខដោះស្រាយដោយថារង់ចាំថៅកែជនជាតិតៃវ៉ាន់ ត្រឡប់មកកម្ពុជាវិញ នៅថ្ងៃទី១២ខែកញ្ញា។លោក វង់ ថាវិន ដែលអះអាងថាជាលេខាថៅកែរោងចក្រ មានប្រសាសន៍ថា រូបលោកជាបុគ្គលិកថ្នាក់ក្រោម មិនអាចដោះស្រាយបញ្ហាទាក់ទងនឹងលុយកាក់បានទេ ដោយស្នើកម្មករឲ្យរង់ចាំការដោះស្រាយពីថៅកែរោងចក្រនៅថ្ងៃទី១២ខែ កញ្ញា។តែកម្មករថាពួកគាត់មិនអាចរង់ចាំបានទេ និងទាមទារដំណោះស្រាយឲ្យបានមុនពេលបើកប្រាក់ខែនៅថ្ងៃទី១០ខែកញ្ញាខាងមុខ។ភាគីរោងចក្របានស្នើឲ្យកម្មករធ្វើបាតុកម្មដោយសន្តិវិធី អហិង្សា និងស្របច្បាប់ កុំឲ្យមានការដុតកង់រថយន្ត ដើម្បីជៀសវាងប៉ះពាល់ដល់ស្ថានីយប្រេងនៅក្បែរនោះ និងអ្នកជិតខាង។លោក វង់ ថាវិនបញ្ជាក់ថា«ការធ្វើបាតុកម្មជាសិទ្ធិរបស់កម្មករ។ យើងមិនហាមឃាត់អីទេ តែកុំឲ្យតែដុតកង់ឡាន»។លោក ស៊ាង យ៉ូត មន្ត្រីដោះស្រាយវិវាទរបស់សម្ព័ន្ធសហជីពស៊ីខៅឌូ មានប្រសាសន៍ថា ថៅកែរោងចក្រគេចវេសមិនដោះស្រាយបញ្ហាជូនកម្មករ៕ដកស្រង់ចេញពី វិទ្យុសម្លេងប្រជាធិបតេយ្យ ចុះថ្ងៃទី ២៧ ខែសីហា ឆ្នាំ២០១៤។