-
អ្នកបុរីកីឡាតវ៉ាសុំចូលរួមការពិភាក្សារវាងមន្ត្រីសាលារាជធានី សង្គមស៊ីវិល និងក្រុមហ៊ុន
- ថ្ងៃចេញផ្សាយ ៥-កញ្ញា-២០១៤
ប្រជាសហគមន៍បុរីកីឡាប្រមាណ២០នាក់ នៅព្រឹកថ្ងៃសុក្រនេះ តវ៉ានៅមុខសាលារាជធានីភ្នំពេញ ដើម្បីសុំចូលរួមក្នុងការពិភាក្សារកដំណោះស្រាយបញ្ហាដីធ្លីរវាង មន្ត្រីសាលារាជធានី សង្គមស៊ីវិល និងក្រុមហ៊ុន។ប្រជាសហគមន៍លើកឡើងថាពួកគាត់ជាជនរងគ្រោះពិតប្រាកដ ដូច្នេះការពិភាក្សាត្រូវតែមានការចូលរួមពីពួកគាត់។ក្រោយពីការតវ៉ា ចាប់ពីម៉ោង៨ព្រឹក តំណាងរបស់ពួកគេចំនួន១០នាក់ត្រូវបានអនុញ្ញាតឲ្យចូលរួមការប្រជុំ នោះ។ នៅព្រឹកនេះ មន្ត្រីសាលារាជធានី តំណាងក្រុមហ៊ុនផានអ៊ីម៉ិច ជួបជាមួយមន្ត្រីសង្គមស៊ីវិលមកពីអង្គការ៥ រួមមានលេខាធិការដ្ឋានក្រុមការងារពិសេសសិទ្ធិលំនៅឋាន មជ្ឈមណ្ឌលសិទ្ធិមនុស្សកម្ពុជា សមាគមធាងធ្នោត សមាគមអាដហុក និងអង្គការលីកាដូ។កន្លងទៅអាជ្ញាធររាជធានីភ្នំពេញបានប្រកាសឲ្យអ្នកបុរីកីឡាទាំង ១៦៤គ្រួសារដែលមិនទាន់ទទួលបានដំណោះស្រាយសមរម្យករណីជម្លោះផ្ទះ និងដី ឲ្យត្រៀមឯកសារ ឬប័ណ្ណបញ្ជាក់ពីកម្មសិទ្ធិ ដើម្បីដោះស្រាយនៅពេលឆាប់ៗខាងមុខ។ប្រជាសហគមន៍បុរីកីឡាមានជម្លោះអូសបន្លាយច្រើនឆ្នាំមកនេះជាមួយ ក្រុមហ៊ុនផានអ៊ីម៉ិច ដោយពលរដ្ឋចោទក្រុមហ៊ុនថាសន្យាសាងសង់អគារចំនួន១០ឲ្យប្រជាពលរដ្ឋ រស់នៅជាថ្នូរនឹងការយកដីនោះទៅអភិវឌ្ឍ។ តែក្រុមហ៊ុនសង់បាន៨អគារ ក៏បញ្ឈប់ទៅវិញ ដោយអះអាងថាក្រុមហ៊ុនមិនមានលទ្ធភាព៕ដកស្រង់ចេញពី វិទ្យុសម្លេងប្រជាធិបតេ្យ ចេញផ្សាយថ្ងៃទី០៥ ខែកញ្ញា ឆ្នាំ ២០១៤ ។