-
អ្នកបាត់បង់ដីទ្រហោយំមុខរដ្ឋសភាទទូចឲ្យរដ្ឋាភិបាលរកយុត្តិធម៌រឿងបណ្តេញចេញ
- ថ្ងៃចេញផ្សាយ ៦-តុលា-២០១៤
អ្នកបាត់បង់ដីធ្លីមួយចំនួនដែលចូលរួម ប្រារព្ធទិវាសិទ្ធិលំនៅឋានពិភពលោក នៅថ្ងៃចន្ទនេះ ទ្រហោយំមុខមន្ទីររដ្ឋសភា ដោយទទួចឲ្យថ្នាក់ដឹកនាំកំពូលនៃគណបក្សនយោបាយដែលឈ្នះអាសនៈក្នុងសភា នាអាណត្តិទី៥នេះ អន្តរាគមន៍រកយុត្តិធម៌រឿងបណ្តេញចេញ។អ្នកស្រី ណាំ ស៊ីម អាយុ៧០ឆ្នាំមកពីខេត្តកណ្តាល ប្រកាសតាមឧបករណ៍បំពងសំឡេងមុខរដ្ឋសភា នៅថ្ងៃទី៦ខែតុលាឆ្នាំ២០១៤នេះថា គ្រួសារគាត់ត្រូវបានសមត្ថកិច្ចបាញ់ចំដើមទ្រូង រងរបួសធ្ងន់ ក្នុងជម្លោះដីធ្លី កាលពីឆ្នាំ២០០៩។ ស្ត្រីរូបនោះបន្តថា បទល្មើសនៃការបាញ់ប្រហារនោះ ត្រូវតុលាការ បង្គាប់ឲ្យជនដៃដល់បង់ជម្ងឺចិត្ត២០លានរៀល។អ្នកស្រី ណាំ ស៊ីម ឲ្យដឹងទៀតថា មកដល់ពេលនេះជិត១៤ឆ្នាំហើយ ជនដៃដល់មិនទាន់បានប្រគល់ ប្រាក់សំណងឲ្យកូនគាត់ជាជនរងគ្រោះទេ ចំណែកដីស្រែនិងផ្ទះសម្បែងក៍ត្រូវគេរឹបអូសដែរ។ស្ត្រីរងគ្រោះរឿងដីធ្លីម្នាក់ទៀត មកពីស្រុកស្ទឹងហាវ ខេត្តព្រះសីហនុ គឺអ្នកស្រី ឡុច ទូច អះអាងថា សមត្ថកិច្ចចាប់គាត់វាយខ្នោះទាំងមានជម្ងឺ ដោយមិនបង្ហាញដីកាចាប់ខ្លួន នៅពេលគាត់ និងពលរដ្ឋផ្សេងទៀត ចេញមុខប្រឆាំងនឹងមន្ត្រីអ្នកមានអំណាច ដើម្បីការពារដីរបស់ពួកគេ។ ស្ត្រីរូបនោះ អះអាងទៀតថា មកដល់ពេលនេះ អ្នកភូមិជាជនរងគ្រោះ កំពុងស្នាក់នៅវត្តមួយក្នុងរាជធានីភ្នំពេញ ដើម្បីស្វែងរកយុត្តិធម៌ រឿងបាត់បង់ដីធ្លីនេះ។ក្រោយពីមានសំឡេងស្រែកទ្រហោយំ និងទាមទាររកយុត្តិធម៌ច្រើនម៉ោង ទាំងតំណាងរាស្ត្របក្សប្រឆាំងនឹងបក្សកាន់អំណាចបានចេញមកលើកទឹកចិត្ត ក្រុមអ្នកតវ៉ានៅមុខរដ្ឋសភា។តំណាងរាស្ត្រគណបក្សសង្គ្រោះជាតិលោក ស្រី កែ សុវណ្ណរតន៍ អះអាងថា រាល់បញ្ហាដែលបានលើកឡើងនៅពេលនេះ នឹងត្រូវយកទៅពិនិត្យដោយយកចិត្តទុកដាក់ ដើម្បីជំរុញឲ្យមានដំណោះស្រាយដោយតម្លាភាព។តំណាងរាស្ត្រមកពីគណបក្សប្រជាជនកម្ពុជា លោក ស្រី ឡោក ខេង អះអាងដែរថា សភាតំណាងរាស្ត្រអាណត្តិទី៥នេះនឹងពិនិត្យមើលពីឬសគល់នៃចំណុច ខ្វះខាត និងស្វែងរកយុទ្ធសាស្ត្រដោះស្រាយឲ្យចំគោលដៅ ដើម្បីឆ្លើយតមនឹងបញ្ហារបស់ពលរដ្ឋ។នាយកលេខាធិការដ្ឋាននៃក្រុមការងារពិសេសសិទ្ធិលំនៅឋាន លោក សៀ ភារម្យ ដែលតាមដានករណីនេះយល់ថា ការចេញមុខធានាអះអាងចំពោះមុខជនរងគ្រោះពេលនេះ បង្ហាញថា អ្នកនយោ បាយចាប់ផ្តើមដឹងថា ម្ចាស់ឆ្នោតមិនអាចបោកបានងាយៗ ដូចពេលមុនៗទេ។ ប៉ុន្តែលោកជំរុញឲ្យម្ចាស់ឆ្នោតត្រូវបន្តតាមដានករណីនេះ ដើម្បីតម្រង់ទិសអ្នកនយោបា យឲ្យដើរតាមគន្លងប្រជាធិបតេយ្យ។ក្រុមអ្នកតវ៉ាជាង១០០នាក់ បានប្រមូលផ្តុំគ្នានៅអតីតសហគមន៍ដីក្រហមដែលត្រូវបណ្តេញចេញកាលពីជិត៦ឆ្នាំមុន។បន្ទាប់ពីក្រុមអ្នករងគ្រោះបានហែញត្តិទៅដាក់នៅរដ្ឋសភា និងខុទ្ទកាល័យនាយករដ្ឋមន្ត្រី។តាមញត្តិឲ្យដឹងថា ប្រជាពលរដ្ឋនៅរាជធានីភ្នំពេញច្រើនជាង១០ភាគរយត្រូវបានជម្លៀសចេញពី លំនៅដ្ឋានទាំងបង្ខំក្នុងរយៈពេល២ទសវត្សចុងក្រោយនេះ ដើម្បីយកដីឲ្យទៅក្រុមហ៊ុន បង្កើតកន្លែងច្រៀងរាំ និងហាងផឹកស៊ី ខណៈសហគមន៍ក្រីក្រដែលបានបណ្តេញចេញកំពុងរស់នៅក្នុងស្ថានភាព គ្រោះអត់ឃ្លាន៕ដកស្រង់ចេញពី វិទ្យុសម្លេងប្រជាធិបតេយ្យ ចេញផ្សាយថ្ងៃទី០៦ ខែតុលា ឆ្នាំ២០១៤។