-
សហគមន៍ព្នងខេត្តមណ្ឌលគិរីគ្រោងធ្វើបាតុកម្មលើកទី៣ប្រឆាំងក្រុមហ៊ុនសម្បទាន
- ថ្ងៃចេញផ្សាយ ៨-តុលា-២០១៤
សហគមន៍ព្នងនៅខេត្តមណ្ឌលគិរី គ្រោងធ្វើបាតុកម្មលើកទីបីប្រឆាំងក្រុមហ៊ុនសម្បទានដែលបានធ្វើឲ្យ ប៉ះពាល់ជីវភាពរស់នៅសហគមន៍និងធនធានធម្មជាតិ ប្រពៃណីវប្បធម៌ អត្តសញ្ញាណជនជាតិដើមភាគតិច។ គម្រោងធ្វើបាតុកម្មនេះកើតមានឡើងបន្ទាប់ពីក្រុមអាជ្ញាធរខេត្តមិន បានផ្ដល់លទ្ធផលស្វែងដំណោះស្រាយសមស្របអាចឲ្យអ្នកភូមិទទួលយកបាន។ជាងបីសប្ដាហ៍កន្លងទៅនេះសមាជិកសហគមន៍ប៊ូស្រា ៨៥០គ្រួសារ រង់ចាំលទ្ធផលដំណោះស្រាយការតវ៉ារបស់ពួកគាត់តាមការសន្យារបស់ អាជ្ញាធរខេត្តមណ្ឌលគិរី បន្ទាប់ពីពួកគាត់បានធ្វើបាតុកម្មពីរលើកនៅមុខសាលាឃុំប៊ូស្រា និងមុខសាលាស្រុកពេជ្រាដា កាលពីពាក់កណ្ដាលខែកញ្ញា។ក្រោយបាតុកម្មទាំងពីរលើកអាជ្ញាធរស្រុកពេជ្រាដា បានរៀបចំកម្មវិធីចុះដោះស្រាយបញ្ហាតវ៉ាជូនសហគមន៍ប៊ូស្រា ចាប់ពីថ្ងៃទី២៦ ខែកញ្ញា រួមមាន៖ ជម្លោះដីធ្លីរវាងប្រជាពលរដ្ឋ ៥គ្រួសារជាមួយក្រុមហ៊ុន ណាវ៉ា រ៉ាស៊ី (Nava Rasy)។ ករណីក្រុមហ៊ុនដាក់ឡាក់ (DaklaK) ជីកប្រឡាយកាត់ផ្លូវប្រជាពលរដ្ឋ។ ករណីប្រជាពលរដ្ឋធ្វើស្រែចម្ការនៅប៉ុស្តិ៍៦ ហើយកម្លាំងការពារមិនអនុញ្ញាត និងបញ្ហាបុគ្គលិកក្រុមហ៊ុន អិល.ខេ.អិល នៅតំបន់នោះគំរាមបាញ់សម្លាប់ប្រជាពលរដ្ឋជាដើម។តំណាងសហគមន៍ លោក មើល ចេវ ថ្លែងថា មិនមានលទ្ធផលណាមួយគួរកត់សំគាល់ក្នុងការចុះដោះស្រាយបញ្ហាជូន ប្រជាពលរដ្ឋ ជាពិសេសការសន្យាលុបប្រឡាយរបស់ក្រុមហ៊ុនដាក់ឡាក់ ជីកកាត់ផ្លូវធ្វើដំណើររបស់ពលរដ្ឋក៏ត្រូវពន្យារពេលដែរ។លោកបន្តថា អ្នកភូមិនឹងប្រមូលផ្តុំគ្នាធ្វើបាតុកម្មបន្តទៀតនៅថ្នាក់ស្រុក ឬខេត្តដើម្បីជំរុញឲ្យអាជ្ញាធរដោះស្រាយការតវ៉ារបស់ពលរដ្ឋ៖ «តាម ពិតគេដោះស្រាយជាលក្ខណៈបុគ្គល ប៉ុន្តែប្រជាពលរដ្ឋគាត់អត់ទទួលស្គាល់ទេតាមសហគមន៍ហ្នឹង គឺតស៊ូមតិម្ដងទៀតនៅសាលាខេត្តចុងក្រោយនេះ។សហគមន៍កំពុងពិភាក្សា គ្នាដាក់កំណត់ថ្ងៃដើម្បីឲ្យប្រជាពលរដ្ឋដឹង»។តំណាងសហគមន៍មកពីភូមិចំនួន៧ ក្នុងឃុំប៊ូស្រា កាលពីសប្ដាហ៍មុននេះបានជួបប្រជុំគ្នាពីរលើកដើម្បីរៀបចំ យុទ្ធសាស្ត្រធ្វើបាតុកម្មលើកទីបី រួមមានការដាក់លិខិតជម្រាបជូនអាជ្ញាធរខេត្តស្ដីពីការធ្វើ បាតុកម្ម និងអំពាវនាវឲ្យសហគមន៍ជនជាតិដើមមកពីបណ្ដាស្រុកនានា ចូលរួមបាតុកម្មលើកទីបីទ្រង់ទ្រាយធំនៅក្រុងសែនមនោរម្យ នៅចុងខែតុលា ឬដើមខែវិច្ឆិកា។តំណាងសហគមន៍មួយរូបទៀត គឺលោក ក្រោះ សុខ រៀបរាប់ដែរថា បាតុកម្មនៅក្រុងសែនមនោរម្យ អាចនឹងមានការបិទផ្លូវដើម្បីតវ៉ាឲ្យអាជ្ញាធរដោះស្រាយការទាមទារ របស់ពលរដ្ឋឲ្យមានប្រសិទ្ធភាព។លោកបន្តថា ការសន្យារបស់មន្ត្រីអាជ្ញាធររហូតមកទល់នឹងថ្ងៃទី៧ ខែតុលា មិនមានសញ្ញាវិជ្ជមានណាមួយឲ្យប្រជាពលរដ្ឋទទួលយកបានឡើយ៖ «ម្នាក់ៗ នៅតែមានគំនិតថា យើងនៅតែធ្វើបន្តគម្រោងបាតុកម្ម គាត់ចង់ឲ្យយើងរៀបចំឲ្យស្រួលដើម្បីឲ្យយល់ថា បាតុកម្មនេះខ្លាំងជាងមុន។ មួយទៀតយើងចង់ឲ្យស្របទៅតាមច្បាប់បាតុកម្មដែរ ហើយបណ្ដាញផ្សេងតាមយើងដឹងខាងដាក់ដាំស្អីគាត់សួរយើងត្រូវការ គាត់អត់ បើយើងធ្វើខាងមុខនេះ»។កាលពីពាក់កណ្ដាលខែកញ្ញា សហគមន៍ប៊ូស្រា ចេញសេចក្ដីថ្លែងការណ៍ជំរុញឲ្យរាជរដ្ឋាភិបាលអន្តរាគមន៍ដោះស្រាយ ជម្លោះដីធ្លី ការបាត់បង់ធនធានធម្មជាតិពង្រឹងការអនុវត្តច្បាប់ និងការគោរពសិទ្ធិជនជាតិដើមភាគតិចនៅភូមិចំនួនប្រាំពីរ រួមមាន៖ ភូមិពូលុ ពូចារ ពូទឺត ឡាំមេះ ប៊ូស្រា ពូរាំង និងភូមិពូទឹល។តំណាងអ្នកភូមិបាននាំយកលិខិតថ្លែងការណ៍ដាក់ជូនស្ថាប័នព្រឹទ្ធ សភា រដ្ឋសភា ក្រសួងវប្បធម៌ ក្រសួងកិច្ចការនារី ស្ថានទូតអាមេរិក តំណាងសហគមន៍អឺរ៉ុប ការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅ កម្ពុជា។ ដោយឡែកស្ថានទូតវៀតណាម និងស្ថានទូតចិន មិនទទួលលិខិតថ្លែងការណ៍នោះទេ។ទាក់ទិនគម្រោងធ្វើបាតុកម្មលើកទីបីរបស់សហគមន៍ប៊ូស្រានេះ អភិបាលរងខត្តមណ្ឌលគិរី លោក ស្វាយ សំអៀង និងអភិបាលស្រុកពេជ្រាដា លោក នួន សារ៉ន នៅថ្ងៃទី៧ ខែតុលា បដិសេធមិនអធិប្បាយដោយសារហេតុផលលោកទាំងពីរជាប់ប្រជុំ។ ក៏ប៉ុន្តែកន្លងទៅនេះ ក្នុងការសន្យាជាមួយពលរដ្ឋលោកទាំងពីរបានអះអាងថា បញ្ហាដែលកើតឡើងក្រោមសមត្ថកិច្ចរបស់អាជ្ញាធរខេត្តពួកគេនឹងធ្វើ ការដោះស្រាយជូនពលរដ្ឋ។ ចំណែកបញ្ហាណាទាក់ទិនសមត្ថកិច្ចអាជ្ញាធរថ្នាក់ជាតិ អាជ្ញាធរខេត្តនឹងរាយការណ៍ទៅក្រសួងមហាផ្ទៃ ដើម្បីចាត់វិធានការបន្ត។របាយការណ៍អង្កេតរបស់សមាគមអាដហុក (Adhoc) ខេត្តមណ្ឌលគិរី បច្ចុប្បន្ននេះសហគមន៍ប៊ូស្រា មិនទាន់ទទួលបានការលើកទឹកចិត្តដូចការសន្យារបស់មន្ត្រីអាជ្ញាធរ មូលដ្ឋាននោះនៅឡើយ។ ដោយឡែកអាជ្ញាធរថ្នាក់ជាតិក៏មិនបានឆ្លើយតប ឬបញ្ចេញប្រតិកម្មណាមួយទាក់ទិនសេចក្ដីថ្លែងការណ៍របស់សហគមន៍នោះ ដែរ។ប្រធានកម្មវិធីដីធ្លីធនធានធម្មជាតិសមាគមការពារសិទ្ធិមនុស្ស អាដហុក លោក ឡាត់ គី សំដែងទុទ្ទិដ្ឋិនិយមចំពោះមន្ត្រីរាជរដ្ឋាភិបាល ក៏ដួចជាអាជ្ញាធរមូលដ្ឋានក្នុងការអនុវត្តតួនាទីការពារសុវត្ថិភាព ជូនប្រជាពលរដ្ឋ ជាពិសេសជនជាតិដើមភាគតិចងាយរងគ្រោះ។លោកថ្លែងថា បញ្ហាប្រឈមរបស់ពលរដ្ឋតម្រូវឲ្យមានការស្រាវជ្រាវទប់ស្កាត់ផល ប៉ះពាល់ប្រជាពលរដ្ឋ ក៏ប៉ុន្តែទំនងបទបញ្ហាប្រមុខរាជរដ្ឋាភិបាលទាក់ទិនបញ្ហានេះមិន ត្រូវបានមន្ត្រីថ្នាក់ក្រោមយកចិត្តទុកដាក់អនុវត្តឲ្យមាន ប្រសិទ្ធភាពនោះឡើយ។ យ៉ាងណាលោកអំពាវនាវផងដែរឲ្យសមត្ថកិច្ចផ្ដល់ឱកាសឲ្យសហគមន៍បញ្ចេញ មតិ និងមិនត្រូវធ្វើទុក្ខបុកម្នេញគំរាមកំហែងសិទ្ធិតស៊ូមតិដោយ សន្តិវិធីរបស់សហគមន៍ឡើយ។ ចំណែកសហគមន៍ក៏ត្រូវប្រកាន់ខ្ជាប់នូវការតស៊ូមតិបែបអហិង្សា ដើម្បីបំពេញសិទ្ធិតវ៉ារបស់ខ្លួនតាមផ្លូវច្បាប់។លោក ឡាត់ គី៖ «ការស្វែងរកដំណោះស្រាយ បើកាលណាដំណោះស្រាយអត់បានទទួលអ៊ីចឹងយុទ្ធនាការក្នុងការស្វែងរក ដំណោះស្រាយ ទោះបីលើកទីបី លើកទីបួន លើកទីប្រាំទៀតវាជារឿងតម្រូវការដែលជាសេរីភាពរបស់ពួកគាត់។ នេះជាមូលដ្ឋានក្នុងការប្រើប្រាស់សិទ្ធិរបស់ពួកគាត់ដើម្បីការពារ ធនធានពួកគាត់ឲ្យបានគង់វង្ស»។ក្រុមហ៊ុនសម្បទានសេដ្ឋកិច្ចចំនួន៥ ដែលសហគមន៍ប៊ូស្រា ធ្វើបាតុកម្មប្រឆាំង រួមមាន ក្រុមហ៊ុន អិល.ខេ.អិល (LKL) ក្រុមហ៊ុនខេ-ហ្វើស (K-First) ក្រុមហ៊ុនមេហ្គាហ្វើស (Mega-First) ក្រុមហ៊ុនសុខហ្វីន ខេស៊ីឌី (Socfin-KCD) និងក្រុមហ៊ុនដាក់ឡាក់។ ដោយឡែកសហគមន៍ប៊ូស្រា កំពុងសិក្សាពីលទ្ធភាពប្តឹងក្រុមហ៊ុនសុខហ្វីន ខេស៊ីឌី ដែលជាក្រុមហ៊ុនមួយរបស់បារាំង តាមផ្លូវតុលាការប្រទេសបារាំង ដោយសារតែក្រុមហ៊ុននេះធ្វើឲ្យគ្រួសារទាំងឡាយនៃសហគមន៍ប៊ូស្រា បាត់បង់របរចិញ្ចឹមជីវិតបែបប្រពៃណី និងកំពុងរស់នៅក្នុងសភាពក្រីក្រ។អ្នកភូមិមួយចំនួនត្រូវបណ្ដេញចេញដោយគ្មានសំណង ឬស្ទើរគ្មានសំណង គ្រួសារទាំងនោះរងការខូចខាតផ្នែកសម្ភារៈធ្ងន់ធ្ងរ និងជាងនេះទៅទៀត អ្នកភូមិរងនូវការឈឺចាប់ផ្លូវចិត្តដោយសារក្រុមហ៊ុនបំផ្លាញព្រៃ អារក្ខនិងព្រៃដូនតាពួកគេអស់ជាច្រើន៕ដកស្រង់ចេញពី វិទ្យុអាស៊ីសេរី ចេញផ្សាយថ្ងៃទី០៨ ខែតុលា ឆ្នាំ២០១៤។