-
ពលរដ្ឋ៣គ្រួសារនៅពោធិ៍សាត់ប្រឈមមុខការចាប់ខ្លួនក្នុងករណីជម្លោះដីធ្លីជាមួយក្រុមហ៊ុនទ្រីភាព
- ថ្ងៃចេញផ្សាយ ២៨-វិច្ឆិកា-២០១៤
ពលរដ្ឋ៣គ្រួសារនៅឃុំ ថ្មដា ស្រុកវាលវែង ខេត្ដពោធិ៍សាត់ អះអាងថា ប្រឈមមុខនឹងការចាប់ខ្លួនដោយកម្លាំងសន្តិសុខក្រុមហ៊ុនទ្រីភាព និងសមត្ថកិច្ចស្រុក ដោយសារពួកគាត់ព្យាយាមប្រឆាំងការឈូសឆាយលំនៅដ្ឋានរបស់ពួគាត់ពី សំណាក់កម្លាំងសន្តិសុខក្រុមហ៊ុនដែលបានធ្វើឡើងនៅព្រឹកថ្ងៃ ព្រហស្បតិ៍នេះ ។អ្នកស្រី សុខ ដា ដែលអះអាងជាប្រជាពលរដ្ឋម្នាក់នៅក្នុងចំណោមនោះមានប្រសាសន៍ថា សមត្ថកិច្ចគ្រោងចុះចាប់ពលរដ្ឋ៣គ្រួសារនេះ ដោយសារពួកគាត់ព្យាយាមរារាំងក្រុមហ៊ុនមិនឲ្យឈូសឆាយលំនៅដ្ឋានកាលពី ព្រឹកមិញ ។ អ្នកស្រីបន្តថា រហូតមកដល់ម៉ោង១១ថ្ងៃត្រង់នេះ កងកម្លាំងចម្រុះ និងសន្តិសុខក្រុមហ៊ុនដែលមានទាំងកាំភ្លើង ដំបង បានព័ទ្ធជុំវិញពួកគាត់ជាង១០នាក់ ហើយព្រមានចាប់ខ្លួនប្រសិនបើពួកគាត់បង្កការរារាំងការឈូសឆាយ ។ អ្នកស្រីថា ពលរដ្ឋទាំងនោះកំពុងព្រួយបារម្ភអំពីសុវត្ថិភាពរបស់ពួកគេ ។អ្នកស្រី សុខ ដា បន្ថែមទៀតថា កម្លាំងសមត្ថកិច្ច និងសន្តិសុខក្រុមហ៊ុនទាំងនោះ បានបិទផ្លូវនៅក្នុងតំបន់នោះ មិនអនុញ្ញាតឲ្យមានមនុស្សចេញចូលនោះទេ ។មេបញ្ជាការកងរាជអាវុធហត្ថ ខេត្តពោធិសាត់ លោក អន សុខុន បដិសេធការសាកសួរ ដោយលោកអះអាងថាកំពុងជាប់ប្រជុំ ខណៈVODមិនអាចស្វែងរកប្រភពផ្ទាល់ដើម្បីទាក់ទងសន្តិសុខក្រុមហ៊ុន សុំការបំភ្លឺអំពីការចោទប្រកាន់របស់ពលរដ្ឋបាន ។មន្ត្រីឃ្លាំមើលការរំលោភ សិទ្ធិមនុស្សរបស់សមាគមអាដហុកប្រចាំខេត្តពោធិ៍សាត់ លោក ភួង សុធា កាលពីពេលថ្មីៗនេះ បានឲ្យVODដឹងថា ពលរដ្ឋដែលបាត់បង់ដីធ្លី និងផ្ទះសម្បែងនោះបានមករស់នៅទីនោះច្រើនឆ្នាំមកហើយ ។ ករណីនេះ លោកចាត់ទុកវិធានការចុះឈូសឆាយលំនៅដ្ឋានរបស់ពលរដ្ឋដោយមិនបានផ្តល់ សំណងបែបនេះថា ជាការរំលោភសិទ្ធិមនុស្ស និងជំរុញឲ្យ មន្ត្រីរដ្ឋាភិបាលថ្នាក់លើអន្តរាគមន៍ទប់ស្កាត់ ជាបន្ទាន់ដើម្បីកុំឲ្យមានហិង្សាផ្ទុះឡើង។អ្នកភូមិអះអាងថា មកដល់ពេលនេះផ្ទះពលរដ្ឋ១០ខ្នងត្រូវបានរុះរើ ក្នុងនោះគ្រួសារកងទ័ព៩គ្រួសារបាត់បង់ដីស្រែចម្ការ៕ដកស្រង់ចេញពី វិទ្យុសម្លេងប្រជាធិបតេយ្យ(VOD) ចេញផ្សាយថ្ងៃទី២៧ ខែវិច្ឆិកា ឆ្នាំ២០១៤ ៕