ជនជាតិដើមភាគតិចមកពីព្រះវិហារនិងមណ្ឌលគិរី ស្នើជាថ្មីឲ្យរដ្ឋាភិបាលដកដីសម្បទានពីក្រុមហ៊ុន

ជនជាតិដើមភាគតិចមកពីព្រះវិហារនិងមណ្ឌលគិរី ស្នើជាថ្មីឲ្យរដ្ឋាភិបាលដកដីសម្បទានពីក្រុមហ៊ុន
- ថ្ងៃចេញផ្សាយ ៨-មករា-២០១៥
ជនជាតិដើមភាគតិចនៅស្រុកត្បែងមានជ័យ ខេត្តព្រះវិហារ និងស្រុកកែវសីមា ខេត្តមណ្ឌលគិរី ស្នើជាថ្មីម្ដងទៀតឲ្យរដ្ឋាភិបាលដកដីដែលបានធ្វើសម្បទានទៅឲ្យ ក្រុមហ៊ុនឡានហ្វេង ក្រុមហ៊ុនរូយហ្វេង និងក្រុមហ៊ុនប៊ិញភឿក១ មកវិញ ដោយចោទថាក្រុមហ៊ុនទាំងនោះធ្វើការអភិវឌ្ឍន៍មិនគោរពច្បាប់ភូមិបាល ឈូសឆាយកម្ទេចចម្ការដំណាំវិលជុំរបស់ពួកគេ ។ការអំពាវនាវនេះធ្វើឡើងក្នុងសន្និសីទសារព័ត៌មានមួយនៅស្នាក់ការរបស់អង្គការ Ngo Forum នាព្រឹកថ្ងៃព្រហស្បតិ៍នេះ ។តំណាងជនជាតិដើមភាគតិចគួយមកពីភូមិស្រែព្រាង ស្រុកត្បែងមានជ័យ ខេត្តព្រះវិហារ លោក អ៊ុក ពឿន ថ្លែងថា ក្រុមហ៊ុនឡានហ្វែង និងក្រុមហ៊ុនរូយហ្វេង មិនដែលគោរពច្បាប់ទេ ដោយគាត់អះអាងថាក្រុមហ៊ុននេះបានចូលធ្វើការឈូសឆាយដីស្រែចម្ការ របស់ប្រជាពលរដ្ឋ និងបំផ្លាញទំនៀមទម្លាប់ និងជីវិតរស់នៅរបស់ជនជាតិដើមភាគតិច ។តំណាងជនជាតិដើមភាគតិចព្នងមកពីភូមិចក់ចារ ស្រុកកែវសីមា ខេត្តមណ្ឌលគិរី លោក ភៅ អាន រៀបរាប់ថា ចាប់តាំងពីក្រុមហ៊ុនវៀតណាមប៊ិញភឿក១ចូលទៅឈួសឆាយព្រៃសហគមន៍ និងដំណាំស្រែចម្ការរបស់ពួកគាត់ ធ្វើឲ្យស្ថានភាពប្រជាពលរដ្ឋនៅទីនោះមានភាពដុនដាប ព្រោះសហគមន៍ជនជាតិដើមភាគតិចទាំងនោះគិតតែចេញទៅតវ៉ាដើម្បីដីធ្លី របស់ខ្លួន មិនបានប្រកបមុខរបរអ្វីនោះទេ ។ លោកបន្តថា ប្រសិនបើរដ្ឋាភិបាលមិនជួយដោះស្រាយពួកគេទេ នោះគេនឹងបន្តតវ៉ារហូត ហើយឈប់គាំទ្របក្សកាន់អំណាច ។ក្នុងសេចក្តីថ្លែងការណ៍រួមរបស់ជនជាតិដើមភាគតិចមកពីខេត្តទាំងពីរ នេះឲ្យដឹងថា អាជ្ញាធរ ខេត្តព្រះវិហារ និងខេត្តមណ្ឌលគិរី មិនដែលជួយការពារពលរដ្ឋទេ ផ្ទុយទៅវិញគឺការពារក្រុមហ៊ុនដែលទទួលបានសម្បទានដីសេដ្ឋកិច្ច ដោយមកគំរាមចាប់ដាក់គុក សំឡុត បំភិតបំភ័យ ចោទប្រកាន់សហគមន៍ជនជាតិដើមភាគតិច ដែលពួកគេការពារដី និងព្រៃឈើរបស់ខ្លួន ។ សេចក្តីថ្លែងការណ៍រួមឲ្យដឹងថា ក្រុមហ៊ុនប៊ិញភឿក១ នៅខេត្តមណ្ឌលគិរី និងក្រុមហ៊ុនឡានហ្វេង និងរូយហ្វេង នៅខេត្តព្រះវិហារ នៅតែបន្តលួចឈួសឆាយដីសហគមន៍ទាំងយប់ទាំងថ្ងៃរាល់ថ្ងៃ ។VODមិនអាចសុំការអត្ថាធិប្បាយពីអ្នកនាំពាក្យ ទីស្តីការគណៈរដ្ឋមន្ត្រី លោក ផៃ ស៊ីផាន និងអ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី លោក ទិត្យ សុធា បានទេដោយទូរសព្ទមិនមានអ្នកទទួល ។ប្រធានផ្នែកដីធ្លីនៃសមាគមការពារសិទ្ធិមនុស្សអាដហុក លោក ឡាត់ គី មានប្រសាសន៍ថា រដ្ឋាភិបាលត្រូវតែចាត់ការចំពោះក្រុមហ៊ុនណាដែលមិនគោរពច្បាប់ ព្រោះក្រុមហ៊ុនគ្រាន់តែជាភាគីមួយចូលមកវិនិយោគប៉ុណ្ណោះ ដូច្នេះក្រុមហ៊ុនត្រូវតែគោរពសិទ្ធិម្ចាស់ប្រទេស ។ លោកបន្តថា ចំពោះអាជ្ញាធរថ្នាក់ក្រោមត្រូវអនុវត្តតាមអនុសាសន៍របស់ថ្នាក់ដឹកនាំ ខ្លួន មិនមែនការពារឲ្យតែក្រុមហ៊ុនដើម្បីលាភសក្ការៈនោះទេ ៕ដកស្រង់ចេញពី វិទ្យុសម្លេងប្រជាធិបតេយ្យ (VOD) ចេញផ្សាយថ្ងៃទី០៨ ខែមករា ឆ្នាំ២០១៥ ។