-
អង្គការសិទ្ធិមនុស្សអន្ដរជាតិ៖ សេចក្ដីព្រាងច្បាប់បោះឆ្នោតកម្ពុជារំលោភលើសិទ្ធិមនុស្សជាមូលដ្ឋាន
- ថ្ងៃចេញផ្សាយ ១៧-មីនា-២០១៥
លោក Brad Adams នាយកប្រចាំតំបន់អាស៊ី នៃអង្គការឃ្លាំមើលសិទ្ធិមនុស្សអន្ដរជាតិបានឲ្យដឹងតាមរយៈសេចក្ដីថ្លែងការណ៍ ចុះថ្ងៃទី១៦មីនាថា សេចក្ដីព្រាងសេចក្ដីស្នើច្បាប់ស្ដីពីការបោះឆ្នោត និងសេចក្ដីព្រាងសេចក្ដីស្នើច្បាប់ គជប ដែលរៀបចំដោយគណបក្សជាប់ឆ្នោតទាំងពីរ បានដាក់កម្រិតសិទ្ធិសេរីភាពនៃការបញ្ចេញមតិ ព្រមទាំងការជួបជុំ ហើយជាពិសេស វាបានដាក់កម្រិតសិទ្ធិសេរីភាពរបស់អង្គការ សមាគមនានា។លោកបន្តថា ប្រសិនបើសេចក្ដីព្រាងច្បាប់ទាំងនេះត្រូវបានអនុម័តដោយគ្មានការកែប្រែ នោះការបោះឆ្នោតនៅកម្ពុជានាពេលអនាគត ទំនងជាគ្មានលក្ខណៈប្រជាធិបតេយ្យឡើយ។ នេះបើតាមលោក Brad Adams។នាយកប្រចាំតំបន់អាស៊ី នៃអង្គការអន្ដរជាតិមួយនេះ បានលើកឡើងទៀតថា វាមិនមែនជារឿងគួរឲ្យភ្ញាក់ផ្អើលទេ ដែលគណបក្សប្រជាជនកម្ពុជាបានដាក់បញ្ចូលបទបញ្ញត្តិទាំងនេះ ទៅក្នុងសេចក្ដីព្រាងច្បាប់។ ប៉ុន្តែគេត្រូវតែបន្ទោសគណបក្សសង្គ្រោះជាតិ ជាគណបក្សប្រឆាំង ដែលបានព្រមព្រៀងឲ្យមានការដាក់ទោសទណ្ឌ និងដាក់កម្រិតចំពោះការបញ្ចេញមតិ ព្រមទាំងការកំណត់សិទ្ធិរបស់សាធារណជនក្នុងការធ្វើយុទ្ធនាការប្រមូលផ្ដុំនានា។បើតាមលោក Brad Adams នៅក្នុងសេចក្ដីព្រាងច្បាប់ថ្មីនេះ គ្មានអ្វីដែលអាចរារាំងមិនឲ្យគណបក្សកាន់អំណាច រៀបចំចាត់ចែងម៉ាស៊ីនបោះឆ្នោតនាពេលខាងមុខ ឲ្យបានតិចជាងអំឡុងពេលបោះឆ្នោតកាលពីឆ្នាំ២០១៣នោះឡើយ។ ហើយគណបក្សសង្គ្រោះជាតិ ដែលធ្លាប់តែបានប្ដេជ្ញាចិត្តគោរពស្តង់ដារសិទ្ធិមនុស្សអន្ដរជាតិ បានគាំទ្រច្បាប់ដែលអនុញ្ញាតឲ្យគណបក្សកាន់អំណាច បន្តរៀបចំការបោះឆ្នោតក្លែងក្លាយ និងបង្ខូចលទ្ធផលបោះឆ្នោតតទៅទៀត។ នេះបើតាមលោក BradAdams។គួរជម្រាបជូនថា សេចក្ដីថ្លែងការណ៍របស់អង្គការឃ្លាំមើលសិទ្ធិមនុស្សអន្ដរជាតិនាពេលនេះ ចេញផ្សាយតែប៉ុន្មានថ្ងៃប៉ុណ្ណោះ មុនពេលដែលសេចក្ដីព្រាងសេចក្ដីស្នើច្បាប់បោះឆ្នោត នឹងត្រូវបញ្ជូនទៅរដ្ឋសភាអនុម័តនៅថ្ងៃទី១៩ខែមីនាខាងមុខ។ អង្គការសង្គមស៊ីវិលដែលធ្វើការលើការបោះឆ្នោតនៅកម្ពុជា ក៏បានសម្ដែងការមិនពេញចិត្តចំពោះសេចក្ដីព្រាងច្បាប់ទាំងពីរនេះដែរ ដោយអះអាងថា ច្បាប់បោះឆ្នោតថ្មីនោះ បម្រើប្រយោជន៍គណបក្សជាប់ឆ្នោតទាំងពីរ ច្រើនជាងប្រយោជន៍ប្រជាពលរដ្ឋទូទៅ៕ដកស្រង់ចេញពីវិទ្យុបារាំង ចេញផ្សាយថ្ងៃទី ១៧ ខែ មីនា ឆ្នាំ ២០១៥