-
ពលរដ្ឋនៅកំពង់ស្ពឺចោទក្រុមហ៊ុនស្ករស លី យ៉ុងផាត់ បង្ហូរកាកសំណល់ចូលស្ទឹង
- ថ្ងៃចេញផ្សាយ ២៧-មីនា-២០១៥
ប្រជាពលរដ្ឋនៅស្រុកថ្ពង់ ខេត្តកំពង់ស្ពឺ ចោទប្រកាន់ក្រុមហ៊ុនផលិតស្ករសរបស់លោកឧកញ៉ា លី យ៉ុងផាត់ ថាបានបង្ហូរសារធាតុនៃកាកសំណល់ចេញពីរោងចក្រចូលទឹកស្ទឹង និងអូរធម្មជាតិ ដែលអ្នកស្រុកតែងប្រើប្រាស់ប្រចាំថ្ងៃ។ចំណែកភាគីតំណាងក្រុមហ៊ុនស្ករស លោក លី យ៉ុងផាត់ វិញបញ្ជាក់ថា សារធាតុដែលបែកធ្លាយចេញពីធុងនោះ គឺមានជាតិស្ករសុទ្ធ ពុំបណ្ដាលឲ្យមានផលប៉ះពាល់សុខភាពទេ។ប្រជាពលរដ្ឋអះអាងថា គិតមកដល់ពេលនេះ ទឹកនៅតាមដងអូរធម្មជាតិ និងនៅតាមស្ទឹង បានប្រែពណ៌ពីថ្លាទៅជាខ្មៅ បណ្ដាលឲ្យត្រីងាប់ជាបន្តបន្ទាប់ ចំណែកមនុស្ស និងសត្វ ប្រើប្រាស់ទឹកនោះលែងកើត។អ្នកភូមិរស់នៅភូមិតាកោង ឃុំអមលាំង លោកស្រី គឹម ចេង ឲ្យដឹងនៅថ្ងៃទី២៥ ខែមីនា ថា ចាប់តាំងពីក្រុមហ៊ុនស្ករសរបស់ លោក លី យ៉ុងផាត់ បានបញ្ចេញកាកសំណល់នៃអំពៅដែលផលិតចេញពីរោងចក្ររួច ធ្វើឲ្យទឹកដែលប្រជាពលរដ្ឋតែងប្រើប្រចាំថ្ងៃ គឺមានជាតិពុល ប្រើលែងបាន។ លោកស្រីបន្តថា ឥឡូវនេះដោយសារទឹកស្ទឹងប្រើពុំកើត ប្រជាពលរដ្ឋដែលរស់នៅក្រោមខ្សែទឹករាប់ពាន់គ្រួសារ កំពុងប្រឈមខ្វះទឹកប្រើប្រាស់។ បញ្ហាដែលកំពុងប្រឈមចំពោះមុខនៅពេលនេះ នូវមិនគិតពីសត្វគោ ក្របី និងការផ្គត់ផ្គង់បន្លែផ្លែឈើនៅឡើយផង៖ «សំឡេង»។ប្រជាពលរដ្ឋនិយាយថា បញ្ហានេះមានស្ថានភាពធ្ងន់ធ្ងរឡើងៗចាប់តាំងពីថ្ងៃទី១៣ មីនា ក្រោយពីកើតហេតុកាលពីដើមខែនេះរួចមក។ មានភូមិចំនួន៨ ក្នុងឃុំអមលាំង នៅក្រោមខ្សែទឹក កំពុងរងផលប៉ះពាល់ខ្លាំង ដែលមានពលរដ្ឋរាប់ម៉ឺនគ្រួសារ។ ទន្ទឹមនេះនៅមានស្រុកចំនួន៤ ផ្សេងទៀត រួមមានស្រុកថ្ពង់ និងស្រុកឧត្តុង្គ ក្នុងខេត្តកំពង់ស្ពឺ ស្រុកកំពង់ត្រឡាច និងស្រុកសាមគ្គីមានជ័យ ខេត្តកំពង់ឆ្នាំង ក៏កំពុងប្រឈមណាស់ដែរ។ លើសពីនេះទៀត អ្នកដែលយកត្រីពីក្នុងស្ទឹងមកហូប បង្កឲ្យរាករូសធ្ងន់ធ្ងរក្នុងដំណាក់កាលចុងក្រោយនេះ។មេឃុំអមលាំង កញ្ញា តឹក នីម មកពីគណបក្ស សម រង្ស៊ី ទទួលស្គាល់ថា ពិតជាមានសារធាតុគីមីដែលបង្ហូរចេញពីរោងចក្ររបស់លោកឧកញ៉ា លី យ៉ុងផាត់ ពិតមែន។ កញ្ញាបន្តថា ក្រោយពីមានប្រតិកម្មរបស់ប្រជាពលរដ្ឋ អាជ្ញាធរមូលដ្ឋានបានអន្តរាគមន៍ម្ដងរួចមកហើយ ក៏ប៉ុន្តែបញ្ហានៅតែកើតមានដដែល៖ «សំឡេង»។រស់នៅភូមិគោក ឃុំអមលាំង លោក ចាន់ សុខឿន បញ្ជាក់ថា សារធាតុដែលហូរចេញពីក្រុមហ៊ុនស្ករសរបស់ លោក លី យ៉ុងផាត់ នេះ បានធ្វើឲ្យប៉ះពាល់យ៉ាងខ្លាំងចំពោះអ្នករស់នៅក្រោមខ្សែទឹក។លោកបន្ថែមថា ត្រីងាប់ជាបន្តបន្ទាប់ ទឹកប្រែពណ៌ខ្មៅ ដោយឡែកមនុស្សកើតកមរមាស និងចុងក្រោយនេះ គោ និងសត្វពាហនៈផ្សេងទៀតដែលផឹកទឹកនេះ បានពុលងាប់ជាហូរហែ។ ជាងនេះទៀត ទឹកមានធុំក្លិនស្អុយភាយចេញពីទឹក បង្កឲ្យអ្នករស់នៅក្បែរស្ទឹងពិបាកទ្រាំ និងប៉ះពាល់ដល់ប្រព័ន្ធផ្លូវដង្ហើម។វិទ្យុអាស៊ីសេរី ពុំអាចសុំការបំភ្លឺបន្ថែមពីអភិបាលរងស្រុកថ្ពង់ លោក គាវ លាងគា បានទេ ដោយទូរស័ព្ទចូល តែលោកព្យាយាមផ្ដាច់ជាច្រើនដងនៅថ្ងៃទី២៥ ខែមីនា។ភាគីតំណាងក្រុមហ៊ុនស្ករសរបស់ លោក លី យ៉ុងផាត់ លោក ស៊ិន សត្ថា ទទួលស្គាល់ថា ពិតជាមានបញ្ហាកើតឡើងយ៉ាងដូច្នេះមែន ក៏ប៉ុន្តែលោកបញ្ជាក់ថា សារធាតុនេះវាពុំមែនបង្កប់ដោយជាតិគីមីទេ។ ផ្ទុយទៅវិញ មូលហេតុដែលនាំឲ្យជះឥទ្ធិពលអាក្រក់នៅក្នុងទឹក ដោយសារតែជាតិស្ករហូរចេញពីធុងវាមានកម្ដៅខ្លាំង។ លោកបដិសេធទៀតថា ក្រុមហ៊ុនពុំមានចេតនាធ្វើបាបពលរដ្ឋទេ វាគឺជាកំហុសបច្ចេកទេសសុទ្ធសាធ៖ «សំឡេង»។លោក អំ សំអាត មន្ត្រីជាន់ខ្ពស់អង្គការលីកាដូ (Licadho) យល់ឃើញថា ក្រុមហ៊ុនត្រូវហ៊ានទទួលខុសត្រូវចំពោះមុខ បើទោះហេតុការណ៍កើតឡើងនោះវាជាកំហុសបច្ចេកទេស ឬជាកំហុសចេតនាក៏ដោយ៖ «សំឡេង»។តំណាងភាគីក្រុមហ៊ុនផលិតស្ករសរបស់ លោក លី យ៉ុងផាត់ អះអាងថា នៅពេលនេះភាគីក្រុមហ៊ុនបានដោះស្រាយបញ្ចប់បញ្ហានេះរួចរាល់ហើយ។ ដោយឡែកកិច្ចការដែលនៅសេសសល់ គឺកំពុងសហការជាមួយអាជ្ញាធរ បើកទឹកពីប្រភពផ្សេងដើម្បីបោសសម្អាតអ្វីដែលបង្កឲ្យមានបញ្ហាចេញ៕ដកស្រង់ចេញពីវិទ្យុអាស៊ីសេរី ចេញផ្សាយថ្ងៃទី ២៦ ខែមីនា ឆ្នាំ២០១៥ ។