-
UNស្នើឲ្យរដ្ឋាភិបាលរៀបចំផែនការជាតិប្រឆាំងការរើសអើងជាតិសាសន៍
- ថ្ងៃចេញផ្សាយ ៩-មេសា-២០១៥
គណៈកម្មាធិការសិទ្ធិមនុស្សរបស់អង្គការសហប្រជាជាតិដែលមាន ទីតាំងនៅទីក្រុង ហ្សឺណែវ ប្រទេសស្វ៊ីស ស្នើឲ្យរដ្ឋាភិបាលកម្ពុជាពិចារណាក្នុងការរៀបចំជាផែនការសកម្មភាពថ្នាក់ជាតិប្រឆាំងនឹងការរើសអើងជាតិសាសន៍ ។ក្រោយពេលដែលគណៈកម្មាធិការសិទ្ធិមនុស្សរបស់អង្គការសហប្រជាជាតិបានត្រួតពិនិត្យលើកទី២ ស្តីពីរបាយការណ៍សិទ្ធិមនុស្សនៅកម្ពុជានៅក្នុងសម័យប្រជុំប្រចាំឆ្នាំរបស់ខ្លួន កាលពីថ្ងៃទី១៧ និង១៨ ខែមីនា គណៈកម្មាធិការនេះបានចេញផ្សាយរបាយការណ៍មួយកាលពីថ្ងៃម្សិលមិញ ស្ដីពីស្ថានភាពសិទ្ធិមនុស្សនៅក្នុងប្រទេសកម្ពុជា ។នៅក្នុងរបាយការណ៍នោះ គណៈកម្មាធិការបានលើកឡើងថា បើទោះបីជាភាគីកម្ពុជាបានអះអាងថា កម្ពុជាពុំមានការរើសអើងប្រឆាំងអ្នកណាម្នាក់ក៏ដោយ ក៏របាយការណ៍ស្ដីពីការរើសអើង និងអំពើហិង្សាប្រឆាំងនឹងជនជាតិវៀតណាមនៅតែជាកង្វល់ ។របាយការណ៍បន្តថា «ភាគីរដ្ឋ [កម្ពុជា] គួរតែពង្រឹងកិច្ចខិតខំប្រឹងប្រែងរបស់ខ្លួនក្នុងការប្រយុទ្ធប្រឆាំងនឹងការវាយប្រហារប្រកាន់ជាតិសាសន៍ប្រឆាំងជនជាតិវៀតណាម ។ ភាគីរដ្ឋក៏គួរតែពិចារណាការរៀបចំផែនការសកម្មភាពជាតិប្រឆាំងនឹងការរើសអើងជាតិសាសន៍ផងដែរ» ។គួររំឮកថា មុនបញ្ចប់បេសកកម្ម៦ឆ្នាំនៅកម្ពុជា អ្នករាយការណ៍ពិសេសអង្គការសហប្រជាជាតិទទួលបន្ទុកផ្នែកសិទ្ធិមនុស្សនៅកម្ពុជា លោក សូរិយា ប្រាសាទស៊ូប៊ែឌី កាលពីចុងខែមករា បានសម្ដែងការព្រួយបារម្ភពីភាពតានតឹងរវាងជាតិសាសន៍ផ្សេងគ្នានៅកម្ពុជា ដែលលោកថាអាចកើតមាននាពេលអនាគត ។ឆ្លើយតបនឹងការលើកឡើងរបស់លោក ស៊ូប៊ែឌី អនុប្រធានទី១នៃរដ្ឋសភា និងជាអនុប្រធានគណបក្សសង្គ្រោះជាតិ លោក កឹម សុខា បានមានប្រសាសន៍ថា លោកយល់ថា បញ្ហាភាពតានតឹងរវាងជាតិសាសន៍មិនអាចកើតមានឡើងនៅប្រទេសកម្ពុជានោះទេ ដោយលោកថា ប្រជាជនកម្ពុជាជាពូជសាសន៍មួយដែលមានចិត្តទូលាយ និងការគោរព ។ចំណែកសាស្ត្រាចារ្យវិទ្យាសាស្ត្រនយោបាយ លោក សុខ ទូច បានលើកឡើងថា លោកមិនមានការព្រួយបារម្ភពីបញ្ហានេះទេ ដោយលោកលើកឡើងថា ប្រទេសកម្ពុជាមានជាតិសាសន៍ច្រើនរស់នៅរួមគ្នាយូរយារណាស់មកហើយ ៕ដកស្រង់ពីវិទ្យុអាស៊ីសេរី ចេញផ្សាយថ្ងៃទី ០៣ ខែ មេសា ឆ្នាំ ២០១៥ ។