-
កម្មករជាង១ម៉ឺននាក់នឹងធ្វើយុទ្ធនាការជំរុញឲ្យចាប់ឣ្នកបាញ់សម្លាប់កម្មករ
- ថ្ងៃចេញផ្សាយ ៣០-មេសា-២០១៥
សហព័ន្ធសហជីពមួយចំនួនអះអាងថា កម្មករជាង១ម៉ឺននាក់នឹងធ្វើយុទ្ធនាការក្នុង រាជធានីភ្នំពេញនៅចុងសប្តាហ៍នេះ ដើម្បីជំរុញឲ្យរាជរដ្ឋាភិបាលចាប់ជនដៃដល់បាញ់កម្មករ មកផ្តន្ទាទោស និងទាមទារលក្ខខណ្ឌការងាមួយចំនួនទៀត ខណៈរដ្ឋាភិបាលប្រកាសបិទការស៊ើបអង្កេតករណីចាញ់ប្រហារនេះ ។ប្រធានសម្ព័ន្ធសហជីពចលនាកកម្មករ លោក ប៉ាវ ស៊ីណា ឲ្យ VOD ដឹងនៅថ្ងៃទី២៩ ខែមេសានេះថា កម្មករប្រមាណជា៤ពាន់នាក់ មកពីសហជីពជាដៃគូផ្សេងៗគ្នា នឹងជួបជុំគ្នានៅទីលានប្រជាធិបតេយ្យ ដើម្បីចូលរួមទិវាពលកម្មអន្តរជាតិ១ឧសភា ឆ្នាំ២០១៥នេះ ។ លោកថា ក្នុងពិធីនោះពួកគេនឹងត្រូវដង្ហែញត្តិទៅដាក់នៅរដ្ឋសភា ដើម្បីជំរុញឲ្យទម្លាក់ចោលបទចោទលើប្រធានសហជីព ធ្វើការលើកកម្ពស់សិទ្ធិកម្មករ ទាមទារដំឡើងប្រាក់ឈ្នួលបន្ថែមលើសពី១២៨ដុល្លារដែលមានស្រាប់ និងទាមទារឲ្យរដ្ឋាភិបាល ចាប់ជនដៃដល់ដែលបាញ់កម្មករនៅផ្លូវវ៉េងស្រេង កាលពីជាងមួយឆ្នាំមុនមកផ្តន្ទាទោស ដើម្បីរកយុត្តិធម៌ឲ្យអ្នកដែលបានស្លាប់ និងគ្រួសារជនរងគ្រោះ ។ លោកបញ្ជាក់ថា «យុទ្ធនាការយើងធ្វើដើម្បីជំរុញឲ្យគាត់ស្វែងរក បើយើងមិនធ្វើទេ គាត់អាចនឹងបំភ្លេចបញ្ហាហ្នឹងចោល» ។លោក សុខ ឈុនអឿង ដែលជាក្រុមការងាររបស់សហភាពការងារកម្ពុជាអះអាងថា កម្មករប្រមាណជា៧ពាន់នាក់ នឹងជួបជុំគ្នាមុខវត្តបទុម ជិតផ្ទះនាយករដ្ឋមន្ត្រី តាមការគ្រោងទុក បន្ទាប់មកនឹងហែញត្តិ ទៅដាក់នៅរដ្ឋសភា ទាមទារលក្ខខណ្ឌការងារ១៦ចំណុច ដូចជា រដ្ឋាភិបាលត្រូវ ពន្លឿនបង្កើតឲ្យមានតុលាការការងារ ទាមទារប្រាក់ឈ្នួលកម្មករដល់១៧៧ដុល្លារក្នុងមួយខែ លុបចោលច្បាប់រឹតបន្តឹងសេរីភាពសហជីព និងជំរុញឲ្យវែកមុខអ្នកបាញ់កម្មករមកផ្តន្ទាទោស ។ លោកថា«ខាងសាលាក្រុងអនុញ្ញាតឲ្យនៅសួន(ទីលាន)ប្រជាធិបតេយ្យ អត់ត្រូវគ្នាទេ អ៊ីចឹងដំណើររបស់យើងធ្វើរួមគ្នាឡើងទៅក្រសួងមហាផ្ទៃជាអ្នកសម្រេចចុងក្រោយ ប៉ុន្តែយើងដឹងចារិតខាងគាត់ហ្នឹងហើយ ហើយយើងក៏តាំងចិត្តខាងចារិតរបស់យើងថា មិនឲ្យក៏ធ្វើ ឲ្យក៏ធ្វើ» ។កាលពីថ្ងៃទី៣ ខែមករា ឆ្នាំ២០១៤ កម្មករយ៉ាងតិច៥នាក់ ត្រូវគេបាញ់ឲ្យស្លាប់ភ្លាមៗនៅផ្លូវវ៉េងស្រេង ក្នុងរាជធានីភ្នំពេញ ក្រោយមកក៏មានការស្លាប់បន្តបន្ទាប់ទៀត ខណៈជិត៤០នាក់ផ្សេងទៀតបានរបួស ។ ការបាញ់បង្ក្រាបដោយហិង្សានោះ ធ្វើឡើងពេលកម្មករតវ៉ាទាមទារដំឡើងប្រាក់ឈ្នួលដល់១៦០ដុល្លារ ។ អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ អះអាងថា ក្រុមកម្មករដែលដឹកនាំដោយលោក ប៉ាវ ស៊ីណា ត្រូវបានអនុញ្ញាតឲ្យជួបជុំនៅទីលានប្រជាធិបតេយ្យ ប៉ុន្តែអនុញ្ញតឲ្យហែក្បួនតែមនុស្សមួយក្រុមប៉ុណ្ណោះ ។ លោក ឡុង ឌីម៉ង់ ចំណែកការសុំទីតាំងជួបជុំនៅមុខវត្តបទុមវត្តី ស្ថិតក្នុងការពិចារណានៅឡើយ ។សារលិខិតរបស់លោកនាយករដ្ឋមន្ត្រី ក្នុងទិវាពលកម្មអន្តរជាតិឆ្នាំ២០១៥នេះ បានជំរុញឲ្យមន្ត្រីពាក់ព័ន្ធពន្លឿនការបង្កើតតុលាការការងារនេះ ដើម្បីផ្តល់ទំនុកចិត្តបន្ថែមទៀតដល់វិនិយោគទុន ព្រមទាំងបានសន្យាដំឡើងប្រាក់ឈ្នួលកម្មករ ដល់១៦០ដុល្លារក្នុងមួយខែ នៅឆ្នាំ២០១៨ ។ចំណែកព្រឹត្តិការណ៍នៅផ្លូវវ៉េងស្រេងវិញ មន្ត្រីរដ្ឋាភិបាលធ្លាប់អះអាងថា គណៈកម្មការចម្រុះបានបិទបញ្ចប់នៃការស៊ើបអង្កេតហើយ ។ ប៉ុន្តែមិនប្រកាសពីឈ្មោះជនដៃដល់ដែលបាញ់កម្មករទេ ៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី ២៩ ខែមេសា ឆ្នាំ២០១៥ ។