-
អង្គការសិទ្ធិមនុស្សអន្តរជាតិស្នើកម្ពុជាលុបសេចក្ដីព្រាងច្បាប់គ្រប់គ្រងសមាគម-អង្គការ
- ថ្ងៃចេញផ្សាយ ៥-ឧសភា-២០១៥
អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) នៅថ្ងៃច័ន្ទ ទី២៧ ខែមេសា ស្នើឲ្យរដ្ឋាភិបាលកម្ពុជា ពិនិត្យឡើងវិញចំពោះសេចក្ដីព្រាងច្បាប់គ្រប់គ្រងសមាគម និងអង្គការក្រៅ រដ្ឋាភិបាល ដែលជាច្បាប់មួយអាចប៉ះពាល់យ៉ាងធ្ងន់ធ្ងរដល់សិទ្ធិសេរីភាពបំពេញការងាររបស់សមាគម និង អង្គការក្រៅរដ្ឋាភិបាល។សំណើរបស់អង្គការសិទ្ធិមនុស្សនេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន គ្រោងអនុម័តច្បាប់នេះនៅខែឧសភា ខាងមុខ។ កាលពីថ្ងៃទី៥ ខែមេសា លោក ហ៊ុន សែន អះអាងថា លោកនឹងប្រើប្រាស់ច្បាប់ថ្មីនេះ ដើម្បីដាក់ទោសទណ្ឌដល់មន្ត្រីអង្គការសង្គមស៊ីវិលណាដែលមិនគោរព និងធ្វើតាមច្បាប់។នាយកប្រតិបត្តិទទួលបន្ទុកកិច្ចការតំបន់អាស៊ីរបស់ យូមែន រ៉ៃត៍ វ៉ច្ឆ លោក ប្រ៊ែដ អាដាម (Brad Adams) បញ្ជាក់ក្នុងសេចក្ដីថ្លែងការណ៍នៅថ្ងៃច័ន្ទ នេះថា រដ្ឋាភិបាលត្រូវតែដាក់សេចក្ដីព្រាងច្បាប់ជា សាធារណៈ និងត្រូវពិភាក្សាជាមួយអង្គការសង្គមស៊ីវិល។ លោកក៏ស្នើឲ្យប្រទេសម្ចាស់ជំនួយត្រូវបញ្ជាក់ប្រាប់រដ្ឋាភិបាលកម្ពុជា ឲ្យច្បាស់លាស់ថា ម្ចាស់ជំនួយនឹងជំទាស់រាល់សកម្មភាពរបស់រដ្ឋាភិបាលដែលមានបំណងចង់លុបឈ្មោះអង្គការសង្គមស៊ីវិល និងទង្វើណាដែលធ្វើឲ្យប៉ះពាល់ដល់ សិទ្ធិសេរីភាពរបស់អង្គការសង្គមស៊ីវិល។លោក ប្រ៊ែដ អាដាម ក៏បានចោទជាសំណួរទៅលើវប្បធម៌សន្ទនារបស់លោក ហ៊ុន សែន ដោយសារតែលោក ហ៊ុន សែន បានលាក់បាំងព័ត៌មានសេចក្ដីព្រាងច្បាប់គ្រប់គ្រងសមាគម និងអង្គការក្រៅរដ្ឋាភិបាលមិនឲ្យមានការពិភាក្សាជាសាធារណៈ ហើយលោកមានបំណងចង់ប្រើប្រាស់ច្បាប់នេះដើម្បីបំបាត់សំឡេងប្រឆាំង៕ដកស្រង់ពីវិទ្យុអាស៊ីសេរី ចេញផ្សាយថ្ងៃទី ២៧ ខែ ឧសភា ឆ្នាំ ២០១៥ ។