-
អាជ្ញាធរខេត្តស្វាយរៀងរារាំងរថយន្តសហជីពដែលគ្រោងមកតវ៉ានៅភ្នំពេញ
- ថ្ងៃចេញផ្សាយ ១០-ឧសភា-២០១៥
រថយន្តដែលដឹកមន្ត្រីសហជីពសម្ព័ន្ធសហជីពចលនាកម្មករខេត្តស្វាយរៀងចំនួន៩នាក់ ត្រូវបានកម្លាំងនគរបាលខេត្តស្វាយរៀងឃាត់ទុក នៅព្រឹកថ្ងៃព្រហស្បតិ៍នេះ ដោយមន្ត្រីសហជីពអះអាងថាជាការរារាំងពួកគាត់មិនឲ្យមករាជធានីភ្នំពេញដើម្បីតវ៉ា។លោក ជា ឧត្តម មន្ត្រីសម្ព័ន្ធសហជីពចលនាកម្មករប្រចាំខេត្តស្វាយរៀង មានប្រសាសន៍ថារថយន្តត្រូវឃាត់ទុកនៅម៉ោង៥និង៥០នាទីទៀបភ្លឺ នៅពេលពួកគាត់កំពុងប្រមូលគ្នាដើម្បីឡើងមកដាក់ញត្តិនៅក្រសួងការងារ និងស្ថានទូតជប៉ុន ប្រឆាំងនឹងរោងចក្រមួយឈ្មោះ Nissey។ លោកបន្តថារថយន្តត្រូវបានបញ្ជូនទៅគយស្នងការពន្ធដារខេត្ត ដោយកម្លាំងនគរបាលអះអាងថាអ្នកបញ្ជារថយន្តមិនមានប័ណ្ណបើកបរត្រឹមត្រូវ។ បើតាមលោក ជា ឧត្តម ក្នុងពេលឃាត់រថយន្តនោះ មន្ត្រីសហជីព១នាក់ និងអ្នកបើកបរត្រូវបាននាំមកសាកសួរ។ លោកបន្តថារហូតមកដល់ពេលនេះ មន្ត្រីសហជីពត្រូវបានឲ្យមកផ្ទះវិញ នៅសល់តែអ្នកបញ្ជារថយន្តតែប៉ុណ្ណោះ។ លោក ជា ឧត្តម ឲ្យដឹងទៀតថារហូតមកដល់ពេលនេះ កម្មករប្រមាណ៥០០នាក់កំពុងតវ៉ាទាមទារឲ្យដោះលែងអ្នកបើកបរថយន្តមកវិញ។ កន្លងទៅ កម្មកររោងចក្រផលិតនាឡិកា Nissey នៅក្រុងបាវិត បានចេញមុខតវ៉ាដោយស្នើឲ្យអភិបាលខេត្តជំរុញទៅថៅកែរោងចក្រធានាសុវត្តិភាពការងារ និងផ្ដល់លក្ខខណ្ឌការងារមួយចំនួន ដូចជាផ្ដល់ប្រាក់៥០ភាគរយឲ្យស្ត្រីសម្រាលកូន បញ្ឈប់ការគាបសង្កត់ និងលក្ខខណ្ឌមួយចំនួនទៀត។ កម្មករអះអាង ថា ថៅកែរោងចក្រមិនបានគោរពតាមច្បាប់ការងារ ហើយតែងតែបង្ខំកម្មករឲ្យធ្វើការថែមម៉ោង និងបញ្ឈប់កម្មករគ្មានមូលហេតុ។VODមិនទាន់អាចសុំការបញ្ជាក់ពីភាគីរោងចក្រ និងស្នងការនគរបាលខេត្តស្វាយរៀងបាននៅឡើយទេ។គួរបញ្ជាក់ថារោងចក្រNissey ស្ថិតក្នុងភូមិព្រៃទុប ឃុំព្រៃអង្គុញ ក្រុងបាវិត ខេត្តស្វាយរៀង។ កម្មករបាននាំគ្នាតវ៉ាចាប់ពីថ្ងៃទី១៨ ខែមេសា ឆ្នាំ២០១៥មក៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី ០៧ ខែ ឧសភា ឆ្នាំ២០១៥។