-
អាជ្ញាធរខេត្តស្ទឹងត្រែងរារាំងក្រុមយុវជនមិនឲ្យចូលមើលស្ថានភាពព្រៃឡង់
- ថ្ងៃចេញផ្សាយ ១៨-ឧសភា-២០១៥
អ្នកដឹកនាំក្រុមយុវជន ទៅពិនិត្យមើលស្ថានភាពបទល្មើសព្រៃឈើនៅតំបន់ព្រៃឡង់ ខេត្តស្ទឹងត្រែង បានចោទអាជ្ញាធរខេត្តនេះ ថារារាំងពួកគេមិនឲ្យចូលតំបន់នោះ និងហៅទង្វើរបស់អាជ្ញាធរថាខុសច្បាប់រដ្ឋធម្មនុញ្ញ ។អ្នកស្រាវជ្រាវពីការអភិវឌ្ឍន៍សង្គម លោក កែម ឡី ដែលដឹកនាំក្រុមយុវជន ព្រះសង្ឃ មន្ត្រីសង្គមស៊ីវិលប្រមាណ៥០នាក់ បានប្រាប់VODនៅថ្ងៃព្រហស្បតិ៍នេះថា កាលពីល្ងាចថ្ងៃពុធម្សិលមិញ នៅពេលគាត់ និងក្រុមយុវជនធ្វើដំណើរចូលទៅដល់ស្រុក ថាឡាបរិវ៉ាត់ ខេត្តស្ទឹងត្រែង អាជ្ញាធរបានចេញមករារាំងពួកគាត់ មិនឲ្យធ្វើដំណើរបន្តទៅតំបន់ព្រៃឡង់នោះទេ ក្រោមហេតុផល ជាបញ្ជារបស់ថ្នាក់លើ ។ លោក កែម ឡី ហៅចំណាត់ការរបស់អាជ្ញាធរទាំងនោះថា ធ្វើខុសច្បាប់ និងទំនងជាមានអាថ៌កំបាំងកាប់បំផ្លាញព្រៃឈើនៅតំបន់ព្រៃឡង់នោះ ។លោក កែម ឡី បន្តថា «ខកតែស្ទឹងត្រែងហ្នឹងទេ ខេត្តផ្សេងៗឲ្យចូលអញ្ចឹងណា៎ ប្រហែលជាស្ទឹងត្រែងហ្នឹងមានរឿងរសើបច្រើនទាក់ទងនឹងបទល្មើសព្រៃឈើ ឬមួយក៏ដីសម្បទានសង្គមកិច្ច» ។VOD មិនអាចសុំការបំភ្លឺពីអភិបាលខេត្តស្ទឹងត្រែង លោក កុល សំអុល ពាក់ព័ន្ធនឹងការរារាំងក្រុមយុវជននេះបានទេ ។ ចំណែកអភិបាលស្រុកថាឡាបរិវ៉ាត់លោក ថោង សារ៉ាន់ ជាអ្នកដឹកនាំសមត្ថកិច្ចទៅរារាំងក្រុមយុវជននោះ ក៏VODមិនអាចទាក់ទងបានដែរ ។ រីឯស្នងការនគរបាលខេត្តស្ទឹងត្រែង លោក ម៉ៅ តារា សុំមិនអត្ថាធិប្បាយដោយលោកអះអាងថា ជាប់រវល់ប្រជុំ ។ទោះយ៉ាងណា បើតាមសារព័ត៌មានឌឺខេមបូឌាដេលីចុះផ្សាយនៅថ្ងៃទី១៤ ឧសភានេះ បានស្រង់សម្តីរបស់អភិបាលរងខេត្តស្ទឹងត្រែង លោក ដួង ពៅ មកចុះផ្សាយថា «លោកមិនបានអនុញ្ញាតឲ្យអ្នកទាំងនោះចូលទៅក្នុងព្រៃឡង់ ពីព្រោះពួកគេបានមកទីនេះដោយមិនមានការអនុញ្ញាត និងមិនបានជូនដំណឹងដល់អាជ្ញាធរ អំពីគោលបំណងរបស់ពួកគេ» ។ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុកលោក នី ចរិយា យល់ថា បើក្រុមយុវជនទាំងនោះគ្រាន់តែមានបំណងពិនិត្យស្ថានភាពព្រៃឈើ និងជួយការពារធនធានធម្មជាតិ ហើយអាជ្ញាធររដ្ឋាភិបាលរារាំងបែបនេះ ជាការរំលោភលើសិទ្ធិមនុស្សយ៉ាងធ្ងន់ធ្ងរ និងធ្វើឲ្យរដ្ឋាភិបាលបាត់បង់ប្រជាប្រិយភាពនៅអាណត្តិក្រោយនេះ ។ លោកបន្តថា «អ្វីដែលមន្ត្រីថ្នាក់ក្រោមឱវាទធ្វើឲ្យប៉ះពាល់ទៅដល់ការចូលរួមថែរក្សារបស់ប្រជាជនអញ្ចឹង ខ្ញុំគិតថាជាផ្នែកមួយដែរដែលធ្វើឲ្យប៉ះពាល់ទៅដល់ជាពិសេសគណបក្សកាន់អំណាចក្នុងការយកនូវប្រជាប្រិយភាពក្នុងការបោះឆ្នោតខាងមុខនេះ» ។បើតាមលោក កែម ឡី ឲ្យដឹងថា តាមគម្រោងក្រុមយុវជនទាំងនោះនឹងចុះទៅពិនិត្យមើលស្ថានភាពព្រៃឡង់ចំនួន៤ខេត្ត គឺខេត្តស្ទឹងត្រែង ក្រចេះ កំពង់ធំ និងខេត្តព្រះវិហារ ។ទាក់ទងនឹងបញ្ហាឃ្លាំមើលការកាប់បំផ្លាញព្រៃឈើនេះដែរ ប្រធានសមាគមការពារព្រៃឈើមួយឈ្មោះថា ចលនា មាតាធម្មជាតិ លោក អាឡិច ដែលជាជនជាតិអេស្ប៉ាញ ត្រូវបានអាជ្ញាធរកម្ពុជាបណ្តេញចេញពីកម្ពុជា កាលពីថ្ងៃទី២៣ ខែកុម្ភៈ ឆ្នាំ២០១៥ ក្រោមហេតុផលទិដ្ឋាការរបស់លោកបានផុតកំណត់ ។ ចំណែកឯលោក ឈុត វុទ្ធី អតីតប្រធានអង្គការអភិរក្សធនធានធម្មជាតិ ត្រូវបានកងកម្លាំងរដ្ឋាភិបាលបាញ់សម្លាប់ ខណៈលោកបានដឹកនាំអ្នកកាសែតចុះថតរូបភាពកាប់បំផ្លាញព្រៃឈើ ។ដកស្រង់ពីសារព័ត៍មានសម្លេងប្រជាធិបតេយ្យ ចេញផ្សាយថ្ងៃទី១៤ ខែឧសភា ឆ្នាំ២០១៥។