-
អាដហុកប្តឹងចៅក្រម និងព្រះរាជអាជ្ញារងដែលឃុំខ្លួនពលរដ្ឋក្នុងជម្លោះដីធ្លី
- ថ្ងៃចេញផ្សាយ ២១-ឧសភា-២០១៥
នៅក្នុងសន្និសីទនៅថ្ងៃពុធនេះ សមាគមអាដហុកបានប្រកាសប្តឹងព្រះរាជអាជ្ញារង លោក សុខ កែវបណ្ឌិត និងចៅក្រមសាលាដំបូងខេត្តសៀមរាប លោក គី ឫទ្ធី ទៅក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម អគ្គព្រះរាជអាជ្ញានៃមហាអយ្យការអមសាលាសាលឧទ្ធរណ៍ ប្រធានតុលាការកំពូល និងក្រសួងយុត្តិធម៌ជាដើម ។ប្រធានផ្នែកសិទ្ធិមនុស្សនៃសមាគមការពារសិទ្ធិមនុស្សអាដហុក លោក នី ចរិយា ថ្លែងថា ការចាប់ឃុំខ្លួនប្រជាពលរដ្ឋពីរនាក់ទាក់ទងរឿងដីធ្លី កន្លងមក គឺចៅក្រម និងព្រះរាជអាជ្ញារងខេត្តសៀមរាប គឺធ្វើខុសនីតិវិធីច្បាប់ ជាពិសេសរំលោភលើវិជ្ជាជីវៈរបស់ខ្លួន ។ លោកបន្តថា ស្ថាប័នពាក់ព័ន្ធគួរពិនិត្យឡើងវិញអំពីភាពខុសឆ្គងរបស់ចៅក្រមស៊ើបអង្កេត និងព្រះរាជអាជ្ញារងដើម្បីដាក់ពិន័យ ។ លោកមានប្រសាសន៍ថា «យើងអត់អាចប្រើប្រាស់ប្រព័ន្ធធ្វើបដិវត្តន៍ទេ កុំឲ្យយើងច្រឡំថា បើស្ថាប័នហ្នឹងមានភាពលម្អៀង យើងយល់ថា ស្ថាប័នហ្នឹងវាលម្អៀង វាមិនឯករាជ្យ យើងនៅតែប្តឹង ដោយសារអី ដោយសារច្បាប់តម្រូវឲ្យយើងប្តឹង ក៏ប៉ុន្តែប្រសិនជាលោកលម្អៀង លោកមិនគោរពតាមវិជ្ជាជីវៈ អាហ្នឹងយើងនឹងបង្ហាញជូនសាធារណជនទៀតថា ស្ថាប័នតុលាការនេះមិនឯករាជ្យទេ លម្អៀងត្រង់នេះ លម្អៀងត្រង់នោះ អានេះយើងនឹងបង្ហាញជូនទៀត ។ ប៉ុន្តែនៅពេលយើងមិនទាន់ដាក់ពាក្យប្តឹងផង យើងមិនអាចចោទថា ស្ថាប័នហ្នឹងលម្អៀង ឬមិនលម្អៀង មិនធ្វើការ យើងមិនអាចសន្និដ្ឋានបានទេ សំខាន់គឺយើងដាក់ជូនកិច្ចការឲ្យគាត់សិន បើគាត់មិនធ្វើឬគាត់ចាត់តាំង ចាត់ចែងទៅវាខុសនីតិវិធី រំលោភនីតិវិធី រំលោភច្បាប់ អាហ្នឹងចាំយើងនិយាយទៀត ប៉ុន្តែជាបឋមយើងមិនអាចចោទបានទេ» ។លោក នី ចរិយា បន្ថែមថា តាមការស៊ើបអង្កេត និងការសាកសួរប្រជាពលរដ្ឋដែលរងការចាប់ខ្លួន ឲ្យដឹងថា សហគមន៍តាខ្មៅ ឬសហគមន៍វៀតណាមនោះបានឈូសឆាយចូលដីប្រជាពលរដ្ឋខ្មែរដែលរស់នៅភូមិជប់រំដេង ឃុំកន្តួត ស្រុកស្វាយលើ ខេត្តសៀមរាប ហួសព្រំដែនដែលអាជ្ញាធរខេត្តនេះអនុញ្ញាតឲ្យសហគមន៍វៀតណាមអភិវឌ្ឍត្រឹមផ្ទៃដីទំហំ៤១៩ហិកតាប៉ុណ្ណោះ ។ ចំណែកមេធាវីការពារក្តីពលរដ្ឋពីររូបនោះគឺ កញ្ញា ពូក យ៉ារ៉ាន់ មានប្រសាសន៍ថា ចៅក្រម និងព្រះរាជអាជ្ញារងខេត្តសៀមរាប គ្មានមូលដ្ឋានច្បាប់ក្នុងការចាប់កូនក្តីរបស់ខ្លួនឡើយ ។ យ៉ាងណាក៏ដោយ កញ្ញា នឹងដាក់ពាក្យបណ្តឹងឲ្យកូនក្តីរបស់គាត់បាននៅក្រៅឃុំ ។ កញ្ញាបន្ថែមថា «ខ្ញុំយល់ថា គឺគ្មានមូលដ្ឋានផ្លូវច្បាប់ក្នុងការចោទប្រកាន់កូនក្តីខ្ញុំ ទី១ ។ ទី២ គ្មានភស្តុតាងណាមួយដែលបញ្ជាក់ថា កូនក្តីនាងខ្ញុំ បានប្រព្រឹត្តដូចការចោទប្រកាន់ ។ ខ្ញុំនឹងដាក់ពាក្យធានានៅក្រៅឃុំបន្តទៀត ។ ខ្ញុំអត់អាចកំណត់បានទេ» ។VOD មិនអាចសុំការឆ្លើយតបពីព្រះរាជអាជ្ញារង លោក សុខ កែវបណ្ឌិត បាននៅឡើយទេដោយទូរសព្ទចូលគ្មានអ្នកទទួល ។ ចំណែកចៅក្រមស៊ើបសួរ លោក គី ឫទ្ធី ទូរសព្ទរបស់លោកមិនអាចហៅចូលបាន ។យ៉ាងណាក៏ដោយ លិខិតបំភ្លឺកម្រាស់៥ទំព័រ របស់អយ្យការអមសាលាដំបូងខេត្ដសៀមរាប ចុះថ្ងៃទី១៥ ខែឧសភានេះឲ្យដឹងថា ការចាប់ខ្លួនពលរដ្ឋស្រុកស្វាយលើពីរនាក់ដាក់ពន្ធនាគារ កាលពីខែមករា ឆ្នាំ២០១៥កន្លងមកនោះ ធ្វើឡើងទៅតាមនីតិវិធីច្បាប់ ដោយមិនមានការប្រព្រឹត្តអំពើពុករលួយ ឃុបឃិតគ្នាយកដីពលរដ្ឋខ្មែរ ប្រគល់ឲ្យជនជាតិវៀតណាមនោះឡើយ ។ លិខិតបានចាត់ទុកថា ការលើកឡើងរបស់សមាគមការពារសិទ្ធិមនុស្សអាដហុក ក្នុងសន្និសីទសារព័ត៌មាន កាលពីថ្ងៃទី១២ ខែឧសភារបស់លោក នី ចរិយា ជារូបភាពមួយលាបពណ៌គ្នា និងមានចរិតញុះញង់ឲ្យមានការរើសអើសពូជសាសន៍ ដែលធ្វើឲ្យការផ្សព្វផ្សាយព័ត៌មាន មានការយល់ច្រឡំធ្ងន់ធ្ងរទៅលើស្ថាប័នអនុវត្ដច្បាប់ ៕ដកស្រង់ពីសារព័ត៍មានសម្លេងប្រជាធិបតេយ្យ ចេញផ្សាយថ្ងៃទី២០ ខែឧសភា ឆ្នាំ២០១៥។