-
លោក ផៃ ស៊ីផាន លើកឡើងថា អ្នកលេងហ្វេសប៊ុកអាចប្រឈមនឹងការចោទប្រកាន់បទព្រហ្មទណ្ឌ
- ថ្ងៃចេញផ្សាយ ២១-ឧសភា-២០១៥
កាលពីម្សិលមិញ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានព្រមានចាត់វិធានការផ្លូវច្បាប់លើអ្នកលេងហ្វេសប៊ុកដែលបានប្រើពាក្យប្រមាថ និងបរិហារកេរ្តិ៍ថ្នាក់ដឹកនាំរដ្ឋាភិបាល ដោយទំនងជារំលោភលើ “វប្បធម៌នៃការសន្ទនា” ថ្មីរវាងគណបក្សកាន់អំណាច និងគណបក្សប្រឆាំង។លោក ផៃ ស៊ីផាន បានសរសេរនៅលើហ្វេសប៊ុករបស់លោកជាលក្ខណៈ “លិខិតចំហចំពោះជនអគតិ និងអសីលធម៌” ថា ក្នុងពេលថ្មីៗនេះ អ្នកលេងហ្វេសប៊ុកមួយចំនួនបានប្រើពាក្យរំលោភបំពានសិទ្ធិសេរីភាពនៃការបញ្ចេញមតិតាមអីុនធើណិត។លោក ផៃ ស៊ីផាន បានសរសេរនៅលើទំព័រហ្វេសប៊ុករបស់លោកថា “ក្នុងរយៈពេលថ្មីៗនេះ លោកបានសង្កេតឃើញថា ជនមួយចំនួនបានប្រើប្រាស់ប្រព័ន្ធព័ត៌មានសង្គមដើម្បីប្រើពាក្យអសុរោះ ប្រមាថមាក់ងាយ បំផ្លើស និងវាយប្រហារបរិហារបង្កាច់កេរ្តិ៍ដល់មន្ត្រីរាជការ និងថ្នាក់ដឹកនាំមួយចំនួន”។លោកបានសរសេរបន្តថា “ការប្រមាថ និងការបរិហារបង្កាច់កេរ្តិ៍ គឺមានចែងនៅក្នុងក្រមព្រហ្មទណ្ឌនៃព្រះរាជាណាចក្រកម្ពុជា និងមានទម្ងន់ទោសជាធរមានស្រាប់។ ការប្រមាថ និងការបរិហារបង្កាច់កេរ្តិ៍ គឺមិនស្ថិតនៅក្នុងសេរីភាពក្នុងការបញ្ចេញមតិយោបល់ឡើយ ក៏ប៉ុន្តែ វាជាការរំលោភសិទ្ធិនិងសេចក្តីថ្លៃថ្នូររបស់បុគ្គល ដែលត្រូវទទួលបានការគោរពរួមទាំងច្បាប់ជាតិ និងអន្តរជាតិ”។លោកបានសរសេរទៀតថា “យើងខ្ញុំនឹងចាត់វិធានការណាមួយទាំងផ្លូវបច្ចេកទេស និងផ្លូវច្បាប់ ដើម្បីរក្សាសេរីភាពក្នុងការប្រើប្រាស់Online”។នៅពេលទាក់ទងតាមទូរស័ព្ទ អ្នកនាំពាក្យទីស្តីការគណៈរដ្ឋមន្ត្រីរូបនេះបានលើកឡើងថា លោកមានការព្រួយបារម្ភជាពិសេសចំពោះការប្រើពាក្យប្រមាថដ៏អសុរោះ ពីអ្នកគាំទ្រគណបក្សប្រឆាំង ដែលជារឿយៗតែងតែចោទប្រកាន់រដ្ឋាភិបាលថា នៅតែបន្តបម្រើផលប្រយោជន៍វៀតណាមនោះ។លោក ផៃ ស៊ីផាន បានមានប្រសាសន៍ថា “ពួកគេបាននិយាយជាសាធារណៈថា លោកឧបនាយករដ្ឋមន្ត្រី ហោ ណាំហុង គឺជាវៀតណាម ហើយថា ស្ត្រីទី១ [លោកស្រី ប៊ុនរ៉ានី] គឺជាកូនស្រីនៃវៀតណាមខាងជើង ហើយសូម្បីតែខ្ញុំក៏ពួកគេលាបពណ៌ថាជាវៀតណាមដែរ”។លោកបានមានប្រសាសន៍បន្ថែមថា “យើងចង់ឲ្យប្រជាពលរដ្ឋប្រើពាក្យសមរម្យ ខណៈយើងកំពុងផ្សព្វផ្សាយវប្បធម៌នៃការសន្ទនា។ការដាក់ទោសទណ្ឌមានចែងរួចហើយនៅក្នុងក្រមព្រហ្មទណ្ឌ”។យោងតាមមាត្រា៣០៥ដល់៣០៨ នៃក្រុមព្រហ្មទណ្ឌ ការបរិហារកេរ្តិ៍ ឬការជេរប្រមាថត្រូវពិន័យជាប្រាក់ពី១០០.០០០រៀល ដល់១០.០០០.០០០រៀល ឬប្រហែល២៥ដុល្លារ ដល់២.៥០០ដុល្លារ។នៅពេលត្រូវបានសួរបន្ថែមថា តើរដ្ឋាភិបាលនឹងចាត់វិធានការ “បច្ចេកទេស” អ្វីចំពោះអ្នកដែលសរសេរពាក្យប្រមាថ និងអសុរោះតាមហ្វេសបុក លោក ផៃ ស៊ីផាន បានលើកឡើងថា រដ្ឋាភិបាល នឹងស្នើក្រុមហ៊ុនហ្វេសប៊ុកផ្ទាល់ឲ្យបិទគណនីដែលប្រើពាក្យមិនសមរម្យទាំងនេះ។លោកបានមានប្រសាសន៍ថា “យើងត្រូវតែនិយាយទៅកាន់ក្រុមហ៊ុនហ្វេសប៊ុកឲ្យលុបចោល ឬក៏បិទ អ្នកលេងហ្វេសប៊ុកណា ដែលប្រើពាក្យមិនសមរម្យ។ យើងបិទគណនីពួកគេរួចតាមរកម្ចាស់គណនី”។លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានបដិសេធមិនធ្វើអត្ថាធិប្បាយថា តើគណបក្សប្រឆាំងគាំទ្រការអំពាវនាវបែបនេះរបស់លោក ផៃ ស៊ីផាន ឬក៏អត់ឡើយ។លោកបានមានប្រសាសន៍ថា “ខ្ញុំមិនអាចធ្វើអត្ថាធិប្បាយបានទេ បើមិនបានឃើញខ្លឹមសារនោះ។ មានការសរសេរជាច្រើនតាមហ្វេសប៊ុក ខ្លះល្អ ខ្លះមិនល្អ។ តែទោះជាយ៉ាងណាប្រសិនបើការរិះគន់នោះគ្រាន់តែជាការរិះគន់ធម្មតា នេះហើយគឺសង្គមប្រជាធិបតេយ្យនោះ”។លោក ប៉ាង សុឃឿន ដែលជាអ្នកប្រើគណនីហ្វេសប៊ុកឈ្មោះថា “ខ្មែរសុវណ្ណភូមិ” បានការពារការប្រើពាក្យប្រមាថលើមេដឹកនាំរដ្ឋាភិបាល ហើយថា លោកសង្ស័យថា ការព្រមានរបស់លោក ផៃ ស៊ីផាន នឹងធ្វើឲ្យមានផលប៉ះពាល់កាន់តែខ្លាំងទៅវិញទេ។លោក សុឃឿន បាននិយាយដោយសំដៅដល់លិខិតក្នុងពេលថ្មីៗដែលលោក ហោ ណាំហុង បានលើកឡើងថា ដីមានវិវាទមួយកន្លែងនៅតាមព្រំដែនខេត្តត្បូងឃ្មុំជារបស់វៀតណាមនោះថា “គេដឹងថា លោក ហោ ណាំហុង គឺជានរណាហើយ ប៉ុន្តែ គេបានហៅលោកថា ជាវៀតណាមដោយសារសេចក្តីថ្លែងការណ៍ក្នុងពេលថ្មីៗរបស់លោក”។លោក សុឃឿន បាននិយាយបន្ថែមថា “វាដូចជាពាក្យដែលខ្មែរតែងតែប្រើចំពោះមន្ត្រីរដ្ឋាភិបាលណាមួយ ដែលមិនបម្រើផលប្រយោជន៍ជាតិ ប៉ុន្តែ បែរជាបម្រើផលប្រយោជន៍បរទេសទៅវិញអ៊ីចឹងដែរ”។លោកបាននិយាយបន្ថែមទៀតដោយសំដៅលើលិខិតរបស់លោក ផៃ ស៊ីផាន ថា “ការព្រមាន និងការគំរាមបែបនេះមិនអាចពន្លត់កំហឹងពលរដ្ឋ និងបញ្ឈប់ការប្រមាថលើកក្រោយៗទៀតបានឡើយ ប៉ុន្តែ វានឹងធ្វើឲ្យមានការឆេះកំហឹង និងធ្វើឲ្យមានការប្រមាថកាន់តែខ្លាំងឡើងទៅវិញទេ”៕ដកស្រង់ពីសារព័ត៍មានខេមបូឌាដេលី ចេញផ្សាយថ្ងៃទី២១ ខែឧសភា ឆ្នាំ២០១៥។