-
UNស្នើទៅរដ្ឋាភិបាលបើកការពិភាក្សាឲ្យបានទូលាយលើច្បាប់អង្គការមិនមែនរដ្ឋាភិបាល
- ថ្ងៃចេញផ្សាយ ២៥-ឧសភា-២០១៥
អង្គការសហប្រជាជាតិ(UN)អំពាវនាវទៅរដ្ឋាភិបាលកម្ពុជាអនុញាតឲ្យសង្គមស៊ីវិលចូលរួមតាក់តែង សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល ដើម្បីឲ្យច្បាប់នោះមាន “តម្លាភាព និងគណនេយ្យភាព” ស្របតាមសង្គមប្រជាធិបតេយ្យ ។សេចក្តីថ្លែងការណ៍របស់អង្គការសហប្រជាជាតិដែលVODទទួលបាននៅថ្ងៃអាទិត្យទី២៤ ខែឧសភានេះ បានដកស្រង់សម្តីរបស់អ្នកជំនាញសិទ្ធិមនុស្សអង្គការសហប្រជាជាតិលោក ម៉ៃ ណាគីអៃ មានខ្លឹមសារថា រដ្ឋាភិបាលគួរតែអនុញាតឲ្យសង្គមស៊ីវិលចូលរួមផ្តល់យោបល់បន្ថែមលើសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល មុននឹងដាក់ទៅសភាអនុម័យនៅចុងខែឧសភានេះ ។សេចក្តីថ្លែងការណ៍ឲ្យដឹងទៀតថា បើរដ្ឋាភិបាលមិនព្រមឲ្យសង្គមស៊ីវិលចូលរួមតាក់តែងច្បាប់នេះទេ ពេលសភាអនុម័តឲ្យប្រើប្រាស់ជាផ្លូវការ នឹងនាំឲ្យប៉ះពាល់ដល់សិទ្ធិសេរីភាពក្នុងការបំពេញការងាររបស់ស្ថាប័នអង្គការក្រៅរដ្ឋាភិបាលនោះ ។ទាក់ទិននឹងករណីនេះដែរ សភាយុវជនត្រាប់ចាប់ផ្តើមពិភាក្សាពីសេចក្តីព្រាងច្បាប់ស្តីពី អង្គការ សាគមមិនមែនរដ្ឋាភិបាល នៅព្រឹកថ្ងៃអាទិត្យនេះ ដែលមានយុវជន១២៣រូបចូលរួម និងមានតំណាងអង្គការជាតិ និងអន្តរជាតិឃ្លាំមើលផងដែរ ។ ចំណែកតំណាងក្រសួងអប់រំ និងក្រសួងមហាផ្ទៃមិនមានវត្តមានទេ បើទោះជាមានការអញ្ជើញពីអ្នករៀបចំកម្មវិធីក៏ដោយក៏មិនមានការឆ្លើយតប ។ថ្មីៗនេះ លោកនាយករដ្ឋមន្ត្រី ហ៊ុន សែន បានថ្លែងថាច្បាប់ស្តីពីការគ្រប់គ្រងអង្គការក្រៅរដ្ឋាភិបាលនឹង ត្រូវឆ្លងគណៈរដ្ឋមន្ត្រី ក្នុងខែឧសភា ឆ្នាំ២០១៥នេះ ដោយលោកអំពាវនាវឲ្យមានការផ្តល់យោបល់ជាជាងការរារាំងកុំឲ្យមានការអនុម័តច្បាប់នេះ ។ លោកនាយករដ្ឋមន្ត្រីបានរិះគន់អង្គការក្រៅរដ្ឋាភិបាលមួយចំនួនដែល បានយកលុយពីបរទេស ដើម្បីនិយាយអាក្រក់ពីរដ្ឋាភិបាល ។ លោកបន្តថាការបង្កើតច្បាប់នេះ គឺដើម្បីការគ្រប់គ្រងមួយ មិនមែនដើម្បីរារាំងសកម្មភាពរបស់អង្គការក្រៅរដ្ឋាភិបាលនោះទេ ។ លោកនាយករដ្ឋមន្ត្រីបានបញ្ជាក់ថា «អង្គការក្រៅរដ្ឋាភិបាល កុំជ្រួលជ្រើមពេក ល្មមៗបានហើយ អស់លោកមិនទាន់មានសិទ្ធិអនុម័តនោះទេ ។ លោកចង់និយាយក៏និយាយទៅចុះ ក៏ប៉ុន្តែសិទ្ធិរបស់រាជរដ្ឋាភិបាល សិទ្ធិរបស់សភា គឺអនុម័តហើយ…ប្រហែលចាប់ពីខែ៥(ឧសភា)ហ្នឹងទៅ គឺប្រជុំដាក់ចូលគណៈរដ្ឋមន្ត្រីហើយចង់នរណាគាំទ្រឬមិនគាំទ្រ សំឡេងរបស់សមាជិកសភាដែលមានសិទ្ធិអនុម័ត៥០បូក១គឺគ្រប់គ្រាន់ដើម្បីនឹង អនុម័ត។ យល់ល្អផ្តល់មតិវិញ ជៀសវាងទប់ស្កាត់មិនឲ្យចេញ» ។ឆ្លើយតបនឹងករណីនេះ អង្គការសង្គមស៊ីវិលជាង២៥០ ធ្លាប់ទាមទារឲ្យរដ្ឋាភិបាលកម្ពុជាបញ្ឈប់ការអនុម័តពង្រាងច្បាប់សមាគម និងអង្គការមិនមែនរដ្ឋាភិបាល ដោយស្នើឲ្យរដ្ឋាភិបាលបញ្ចេញសេចក្តីព្រាងជាសាធារណៈសម្រាប់ការពិគ្រោះយោបល់ ដើម្បីកុំឲ្យច្បាប់នោះអនុម័តចេញមក ធ្វើឲ្យប៉ះពាល់ដល់សេរីភាពក្នុងការបំពេញការងាររបស់សង្គមស៊ីវិល ៕ដកស្រង់ពីសារព័ត៍មានសម្លេងប្រជាធិបតេយ្យ ចេញផ្សាយថ្ងៃទី២៤ ខែឧសភា ឆ្នាំ២០១៥។