-
អង្គការអន្តរជាតិថាសេរីភាពបញ្ចេញមតិនៅកម្ពុជាត្រូវបានរឹតត្បិតនៅ២ឆ្នាំចុងក្រោយ
- ថ្ងៃចេញផ្សាយ ៤-មិថុនា-២០១៥
របាយការណ៍របស់អង្គការលើកលែងទោសអន្តរជាតិ(Amnesty International) ដែលមានមូលដ្ឋាននៅប្រទេសអង់គ្លេសបង្ហាញថា ក្នុងរយៈពេល២ឆ្នាំចុងក្រោយនេះ សេរីភាពនៃការបញ្ចេញមតិ និងការប្រមូលផ្តុំ ត្រូវបានរឹតត្បិតយ៉ាងខ្លាំងពីសំណាក់អាជ្ញាធរកម្ពុជា ។របាយការណ៍របស់ Amnesty International ដែលមានកម្រាស១២៤ទំព័រ ចេញផ្សាយនៅក្នុងអំឡុងខែមិថុនា ឆ្នាំ២០១៥នេះរកឃើញថា រាល់ការបញ្ចេញមតិ និងប្រមូលផ្តុំតែងតែមានការរឹតបន្តឹង និងការយាយីពីសំណាក់អាជ្ញាធរ ។ របាយការណ៍បន្តថា ជាងនេះទៅទៀត នៅពេលប្រជាពលរដ្ឋ ឬកម្មករចេញតវ៉ារឿងអយុត្តិធម៌ក្នុងសង្គម រដ្ឋាភិបាលតែងតែប្រើកម្លាំងហួសហេតុ មិនសមាមាត្រទៅស្ថានការណ៍ជាក់ស្តែង ។ របាយការណ៍ដដែលសង្កត់ធ្ងន់ថា ជាក់ស្តែងយ៉ាងតិចណាស់ កម្មករប្រមាណ៦នាក់បានស្លាប់ និងអ្នកផ្សេងជាច្រើនអ្នកទៀតរងរបួស ក្នុងអំឡុងពេលតវ៉ាតម្លើងប្រាក់ឈ្នួលកាលពីដើមឆ្នាំ២០១៤ តែរហូតទល់ពេលនេះ រដ្ឋាភិបាលមិនទាន់ស្វែងរកយុត្តិធម៌ជូនជនរងគ្រោះនៅឡើយទេ ។ របាយការណ៍បន្តទៀត ជាពិសេសអ្នកសារព័ត៌មាន និងអ្នកឃ្លាំមើលការរំលោភសិទ្ធិមនុស្ស ជាគោលដៅរបស់អាជ្ញាធរ ក្នុងការហាមឃាត់មិនឲ្យទៅយកព័ត៌មានពីព្រឹត្តិការណ៍មួយចំនួន ។ ទោះជាយ៉ាងណា ប្រធានគណៈកម្មាធិការសិទ្ធិមនុស្សកម្ពុជារបស់រដ្ឋាភិបាល លោក ម៉ក់ សម្បត្តិ មានប្រសាសន៍ថា លោកពុំទាន់ទទួលបានរបាយការណ៍នោះនៅឡើយទេ ។ តែលោកថា កន្លងរដ្ឋាភិបាលកម្ពុជាអនុវត្តទៅតាមច្បាប់ដែលមានចែងក្នុងរដ្ឋធម្មនុញ្ញ ។ លោកបន្តថា រាល់ការបង្ក្រាបកន្លងមក គឺដើម្បីរក្សាសន្តិសុខសណ្ដាប់ធ្នាប់សង្គម ។ លោកថា «យើងអនុវត្តតាមច្បាប់ ព្រោះអីសេរីភាពនៃការបញ្ចេញមតិ វាត្រូវកំណត់នៃច្បាប់មួយ ដែលកំណត់នៅក្នុងរដ្ឋធម្មនុញ្ញ ហើយច្បាប់ស្តីពីបាតុកម្ម ។ ដូច្នេះអ្វីដែលជាបាតុភាពអនាធិតេយ្យ រាជរដ្ឋាភិបាលប្រទេសណាក៏ដោយ គេមិនដែរទុកឲ្យវារញ៉េរញ៉ៃ អនាធិបតេយ្យពេញប្រទេសទេ គេត្រូវមានវិធានការធ្វើម៉េច រដ្ឋាភិបាលធានាឲ្យបានសន្តិសុខសណ្តាប់ធ្នាក់សង្គម ដើម្បីជីវភាពរស់នៅរបស់ប្រជាពលរដ្ឋយើង» ។ប៉ុន្តែប្រធានផ្នែកសិទ្ធិមនុស្សនៃសមាគមការពារសិទ្ធិមនុស្សអាដហុក លោក នី ចរិយា យល់ថា របាយការណ៍របស់អង្គការអន្តរជាតិមួយនេះ គឺឆ្លុះបញ្ចាំងពីភាពជាក់ស្តែងក្នុងប្រទេសកម្ពុជា ដែលលោកយល់ថា មិនទាន់ធានានូវការគោរព្វសិទ្ធិមនុស្ស ។ លោកបន្តថា ជាក់ស្តែងរាល់ការប្រមូលផ្តុំដោយសន្តិវិធី ដើម្បីបញ្ចេញមតិតែងតែមានការការបង្ក្រាបដោយហិង្សាពីសំណាក់អាជ្ញាធរ។ លោកថា «ជាការពិតហើយ យើងឃើញការបាញ់បង្ក្រាបទៅលើក្រុមកម្មករដៃទទេ ដោយគ្មានអាវុធទាល់តែសោះ ហើយធ្វើឲ្យកម្មករស្លាប់៦ទៅ៧នាក់នៅលើផ្លូវវ៉េងស្រេង នេះគឺជាភស្តុតាងបញ្ជាក់យ៉ាងច្បាស់ហើយ ។ ចំណុចទី២ ដូចជារឿងការចាប់លោក វន់ ពៅ ដោយប្រើទាហានដែលមិនមែនជាសមត្ថកិច្ចក្នុងការគ្រប់គ្រងបាតុកម្ម ដោយសន្តិវិធីសោះ ហើយយើងទៅប្រើប្រាស់ដូចជាសឹកសង្គ្រាមអ៊ីចឹង ហើយហ្នឹងដែលជាហេតុផលធ្វើឲ្យអ្នកដែលគេសរសេររបាយការណ៍ហ្នឹង អាចលើកយកជាទឡ្ហីករបានក្នុងការធ្វើការវាយតម្លៃទៅលើស្ថានភាពក្នុងការសម្តែងមតិហ្នឹង» ។លោក នី ចរិយា មើលឃើញថា កន្លងមករដ្ឋាភិបាលមិនបានយកច្បាប់មកអនុវត្តនោះទេ គឺអនុវត្តដោយផ្អែកលើស្ថានភាពនយោបាយទៅវិញ ។របាយការណ៍របស់ Amnesty International បញ្ជាក់ថា កម្ពុជាមិនបានគោរពសិទ្ធិមនុស្សទៅតាមបទដ្ឋានអន្តរជាតិ ដែលក្នុងកម្ពុជាជាភាគីហត្ថលេខីនៅអង្គការសហប្រជាជាតិ ក្នុងការធានាសេរីភាពបញ្ចេញមតិ និងការជួបប្រជុំជាដើម ។អង្គការលើកលែងទោសអន្តរជាតិ បានអំពាវនាវឲ្យរដ្ឋាភិបាលកម្ពុជា ត្រូវធានាការគោរពសិទ្ធិមនុស្សក្នុងការប្រមូលផ្តុំដោយសន្តិវិធី និងការអនុវត្តច្បាប់ឲ្យមានប្រសិទ្ធភាព ។ បញ្ចប់នូវការប្រើកម្លាំងហួសហេតុក្នុងការបង្ក្រាបរាល់ការប្រមូលផ្តុំ ធានាប្រព័ន្ធតុលាការឯករាជ្យ បញ្ចប់និទណ្ឌភាព ដើម្បីស្របតាមស្តង់ដាសិទ្ធិមនុស្សអន្តរជាតិ ៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី០៤ ខែមិថុនា ឆ្នាំ២០១៥។