-
អង្គការពីរនៅព្រះវិហារប្រតិកម្មនឹងអាជ្ញាធរសង្ស័យថាពួកគេដឹកនាំសហគមន៍ដីធ្លីតវ៉ា
- ថ្ងៃចេញផ្សាយ ៩-មិថុនា-២០១៥
កាលពីថ្ងៃទី២ និងទី៣ មិថុនា កន្លងទៅ សហគមន៍ទំនាស់ដីធ្លីប្រមាណ ៣០០នាក់មកពី ៧ស្រុក បានលើកគ្នាទៅតវ៉ានៅទីរួមខេត្តព្រះវិហារ ដើម្បីទាមទារឲ្យអាជ្ញាធរដោះស្រាយ និងប្រគល់ដីស្រែចម្ការរាប់រយហិកតារដែលក្រុមហ៊ុនរំលោភយក មកឲ្យពួកគេវិញ។ការលើកគ្នាតវ៉ាជាទ្រង់ទ្រាយធំនេះ បានធ្វើឲ្យអាជ្ញាធរខេត្តព្រះវិហារ ងាកទៅដាក់ការសង្ស័យលើសមាគមការពារសិទ្ធិមនុស្សអាដហុក (adhoc) និងអង្គការពន្លកខ្មែរ ដែលមានការិយាល័យក្នុងខេត្តនោះ ថាជាអ្នកញុះញង់ និងដឹកនាំប្រជាពលរដ្ឋឲ្យឡើងមកតវ៉ាទៅវិញ។ ការដាក់ការសង្ស័យ បានធ្វើឡើងបន្ទាប់ពីអាជ្ញាធរខេត្តព្រះវិហារ បានដាក់ពង្រាយកម្លាំងប៉ូលិសនៅតាមដងផ្លូវជាច្រើនកំណាត់ ដើម្បីរារាំងប្រជាពលរដ្ឋកុំឲ្យចូលទៅប្រមូលផ្ដុំគ្នាតវ៉ានៅទីរួមខេត្ត ធ្វើឲ្យប្រជាពលរដ្ឋមកពីស្រុករវៀង ខ្លះមានការភ័យខ្លាច ហើយបើកគោយន្តរត់គេចបណ្ដាលឲ្យក្រឡាប់ស្លាប់ម្នាក់ និងរបួស ៦នាក់ផ្សេងទៀត។អង្គការសិទ្ធិមនុស្សមួយចំនួន បង្ហាញប្រតិកម្មយ៉ាងខ្លាំងក្លាឆ្លើយតបនឹងអាជ្ញាធរខេត្តព្រះវិហារ ដែលចោទប្រកាន់ទៅលើអង្គការពន្លកខ្មែរ និងសមាគមការពារសិទ្ធិមនុស្សអាដហុក ថាអាចជាអ្នកដឹកនាំក្រុមប្រជាពលរដ្ឋច្រើនរយនាក់ ឲ្យឡើងទៅតវ៉ារឿងដីធ្លីនៅទីរួមខេត្តព្រះវិហារ នោះ។ប្រតិកម្មរបស់អង្គការក្រៅរដ្ឋាភិបាល បានធ្វើឡើងបន្ទាប់ពីមន្ត្រីសាលាខេត្តព្រះវិហារ បានដាក់ការសង្ស័យដោយនិយាយចំឈ្មោះអង្គការពន្លកខ្មែរ និងសមាគមការពារសិទ្ធិមនុស្សអាដហុក ថាអាចជាអ្នកដឹកនាំ និងធ្វើញត្តិឲ្យប្រជាពលរដ្ឋដែលមានទំនាស់ដីធ្លីមកពី ៧ស្រុក នាំគ្នាឡើងទៅតវ៉ារឿងដីធ្លីរបស់ពួកគេមក។អភិបាលរងខេត្តព្រះវិហារ និងជាអ្នកនាំពាក្យសាលាខេត្តផង គឺលោក ស៊ូ សេរី។ លោកមានប្រសាសន៍កាលពីថ្ងៃទី៣ ខែមិថុនា កន្លងទៅថា ប្រជាពលរដ្ឋមានទំនាស់ដីធ្លីមកពី ៧ស្រុក ដែលនាំគ្នាតវ៉ានៅទីរួមខេត្តនោះ គឺអាចមានអ្នកញុះញង់ និងដឹកនាំ មិនមែនពួកគាត់សម្រេចចិត្តនាំគ្នាឡើងមកតវ៉ាដោយខ្លួនឯងនោះទេ។លោកអភិបាលរងខេត្តព្រះវិហារ ដដែលបញ្ជាក់ថា លោកសង្ស័យទៅលើអង្គការពន្លកខ្មែរ និងសមាគមការពារសិទ្ធិមនុស្ស ដែលមានទីស្នាក់ការនៅក្នុងខេត្តនេះ អាចជាដឹកនាំប្រជាពលរដ្ឋដែលមានទំនាស់ដីទាំងនោះ ពីព្រោះនៅក្នុងពេលដែលប្រជាពលរដ្ឋកំពុងប្រមូលផ្ដុំតវ៉ា គឺលោកបានហៅអង្គការទាំងពីរនេះឲ្យមកចូលរួមប្រជុំ ប៉ុន្តែពួកគេបដិសេធ៖ «ខ្ញុំមិនហ៊ានចោទគេត្រង់ទេ ប៉ុន្តែខ្ញុំឃើញសកម្មភាពមួយកាលពីម្សិលមិញនេះ គឺខ្ញុំចូលទៅកន្លែងអាដហុក ដូចជាគាត់មានការនិយាយអីមិនស្មោះត្រង់ជាមួយនឹងខ្ញុំ ប៉ុន្តែគាត់បានព័ត៌មានមកនិយាយចំៗ ដល់ពេលខ្ញុំទទួលញត្តិមកហាក់បីដូចជាគាត់បានទទួលមុនខ្ញុំទៅទៀត»។អាជ្ញាធរដាក់ការសង្ស័យទៅលើអង្គការក្រៅរដ្ឋាភិបាលចំនួនពីរនេះ ហាក់ដូចជាចង់ទម្លាក់ឲ្យទទួលខុសត្រូវលើហេតុការណ៍ក្រឡាប់គោយន្ត ១គ្រឿងនៅស្រុករវៀង ដែលបណ្ដាលឲ្យប្រជាពលរដ្ឋម្នាក់ស្លាប់ និង ៦នាក់ផ្សេងទៀតរងរបួស ដោយសារតែពួកគេភ័យខ្លាចនឹងកម្លាំងប៉ូលិសជាច្រើន ដែលដាក់ពង្រាយនៅលើដងផ្លូវជាច្រើនកំណាត់ ក្នុងបំណងរារាំងមិនឲ្យធ្វើដំណើរទៅកាន់ទីរួមខេត្តបាននោះ។ទោះយ៉ាងណា សង្គមស៊ីវិលបានចាត់ទុកការដាក់ការសង្ស័យនេះ ថាជាការលាបពណ៌មួយដ៏អាក្រក់ និងក៏ជាការគំរាមកំហែងទៅលើសកម្មជនអ្នកការពារសិទ្ធិមនុស្សក្រៅរដ្ឋាភិបាលដែរ។អ្នកសម្របសម្រួលសមាគមការពារសិទ្ធិមនុស្សអាដហុក ខេត្តព្រះវិហារ លោក ឡោ ចាន់ បានបដិសេធចោលការចោទប្រកាន់នោះ ថាអាដហុក មិនបានដឹកនាំសហគមន៍ទំនាស់ដីធ្លីមកពីស្រុកទាំង៧ ឲ្យឡើងមកតវ៉ានៅទីរួមខេត្តព្រះវិហារ ទេ។ លោក ឡោ ចាន់ បញ្ជាក់ថា តាមពិត គឺប្រជាពលរដ្ឋអ្នកមានទំនាស់ដីធ្លី បាននាំគ្នាឡើងមកតវ៉ាដោយខ្លួនឯង ដោយសារតែពួកគាត់ក្ដៅក្រហាយចំពោះការបាត់បង់ដីស្រែចម្ការ ហើយមិនមានការដោះស្រាយ។ លោក ឡោ ចាន់ បង្ហាញហេតុផលថា រឿងដែលអាជ្ញាធរខេត្តព្រះវិហារ ចោទប្រកាន់ថារូបលោក និងអង្គការពន្លកខ្មែរ ជាអ្នកដឹកនាំប្រជាពលរដ្ឋមកតវ៉ានោះ គឺគ្រាន់តែជាការបង្វែរបញ្ហាដើម្បីគេចចេញពីការដោះស្រាយ៖ «ការចោទរបស់អាជ្ញាធរខេត្ត គឺជាលេសមួយ បើយើងនិយាយឲ្យចំទៅ គឺស៊ីបាយខ្លួនឯងយកទៅលាបមាត់ពពែ»។ចំណែកមន្ត្រីផ្នែកតស៊ូមតិរបស់អង្គការពន្លកខ្មែរ លោក ប៉ិក សោភ័ណ មានប្រសាសន៍ថា អាជ្ញាធរខេត្តព្រះវិហារ ដែលដាក់ការសង្ស័យមកលើអង្គការរបស់លោក ជុំវិញការដឹកនាំប្រជាពលរដ្ឋទំនាស់ដីធ្លីឲ្យឡើងមកតវ៉ានៅទីរួមខេត្តនេះ គឺជារឿងគិតខុស។លោក ប៉ិក សោភ័ណ បញ្ជាក់បន្ថែមថា អាជ្ញាធរខេត្តព្រះវិហារ ដែលធ្លាប់តែគិតថា ជាច្រើនជំនាន់មកហើយ ប្រជាពលរដ្ឋគឺមិនដែលហ៊ានតវ៉ា ដោយសារតែភាពល្ងឹតល្ងង់នោះ គឺខេត្តទៅវិញទេដែលខ្វះការពិចារណា ពីព្រោះថាឥឡូវ គឺមានកូនចៅប្រជាពលរដ្ឋជាច្រើនបានក្លាយខ្លួនទៅជានិស្សិត បញ្ញវន្ត ហើយពួកគេទាំងនោះក៏អាចដឹកនាំការតវ៉ាដោយខ្លួនឯង មិនចាំបាច់មានអង្គការក្រៅរដ្ឋាភិបាលណាដឹកនាំទេ៖ «ជាការឈឺចាប់របស់ពលរដ្ឋចេញពីបេះដូង មិនចាំបាច់អង្គការណាទៅញុះញង់ទៅចាក់គាត់ទេ គាត់ឈឺឆ្អាល គាត់ចង់បានដីស្រែរបស់គាត់»។បើទោះបីជាអាជ្ញាធរខេត្តព្រះវិហារ បានដាក់ការសង្ស័យទៅលើអង្គការពន្លកខ្មែរ និងសមាគមការពារសិទ្ធិមនុស្សអាដហុក ថាអាចជាអ្នកញុះញង់ និងដឹកនាំប្រជាពលរដ្ឋដែលមានទំនាស់ដីធ្លី ៧ស្រុក ឲ្យឡើងមកតវ៉ានៅទីរួមខេត្តកាលពីថ្ងៃទី២ ទី៣ ខែមិថុនា កន្លងទៅក៏ដោយ ក៏រហូតមកដល់ពេលនេះ គេនៅមិនទាន់ឃើញអាជ្ញាធរខេត្ត ឬក៏ស្ថាប័នតុលាការ ចាត់វិធានការណាមួយទៅលើអង្គការក្រៅរដ្ឋាភិបាលទាំងពីរនោះនៅឡើយទេ។អង្គការសិទ្ធិមនុស្សលីកាដូ (LICADHO) បានរិះគន់ទៅលើអាជ្ញាធរខេត្តព្រះវិហារ ដែលដាក់ការសង្ស័យទៅលើអង្គការពន្លកខ្មែរ និងសមាគមការពារសិទ្ធិមនុស្សអាដហុក នោះថាគឺជាចរិតខ្វះការទទួលខុសត្រូវ និងមិនទទួលស្គាល់ការពិតមួយរបស់មន្ត្រីរដ្ឋាភិបាល។មន្ត្រីជាន់ខ្ពស់ផ្នែកស៊ើបអង្កេតនៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា រូបលោកក៏ដូចជាអង្គការជាច្រើនទៀត មិនអាចទទួលយកបានចំពោះការចោទប្រកាន់ដែលគ្មានភស្តុតាងបែបនេះទេ។ លោកចាត់ទុកការចោទប្រកាន់របស់អាជ្ញាធរខេត្តព្រះវិហារ នោះ គឺគ្រាន់តែការដោះសាយករួចខ្លួនឯង ហើយលាបពណ៌ទៅលើអ្នកដទៃប៉ុណ្ណោះ៖ «វាគ្រាន់តែជាការលាបពណ៌ ដើម្បីគេចពីការទទួលខុសត្រូវរបស់ខ្លួន ដែលធ្វើឲ្យអង្គការសង្គមស៊ីវិលពិបាកក្នុងការបំពេញការងារជួយប្រជាពលរដ្ឋប៉ុណ្ណោះ»។ក្រុមអង្គការសិទ្ធិមនុស្សក្រៅរដ្ឋាភិបាលមួយចំនួនយល់ឃើញថា បច្ចុប្បន្ន រដ្ឋាភិបាលកម្ពុជា មិនត្រឹមតែព្យាយាមគាបសង្កត់គំរាមកំហែងទៅលើប្រជាពលរដ្ឋប៉ុណ្ណោះទេ គឺថែមទាំងព្យាយាមគំរាមកំហែង និងគាបសង្កត់ទៅលើក្រុមអ្នកការពារសិទ្ធិមនុស្សក្រៅរដ្ឋាភិបាលទៀតផង។ក្រុមអង្គការក្រៅរដ្ឋាភិបាលបង្ហាញហេតុផលថា ដោយសារតែរដ្ឋាភិបាលចង់ដាក់ការគាបសង្កត់ទៅលើសង្គមស៊ីវិល ដែលជ្រោមជ្រែងលើដំណើរការប្រជាធិបតេយ្យ ការគោរពសិទ្ធិមនុស្ស និងការអនុវត្តច្បាប់ គឺថ្មីៗនេះ រដ្ឋាភិបាលនៅតែជំរុញឲ្យមានការអនុម័តសេចក្តីព្រាងច្បាប់ស្ដីពីការគ្រប់គ្រងសមាគម និងអង្គការក្រៅរដ្ឋាភិបាល ឲ្យចេញជាច្បាប់ បើទោះបីជាសេចក្តីព្រាងនេះមានការចម្រូងចម្រាសពីបណ្ដាប្រទេសម្ចាស់ជំនួយ និងអង្គការក្រៅរដ្ឋាភិបាលយ៉ាងណាក៏ដោយ៕ដកស្រង់ពីវិទ្យុអាស៊ីសេរី ចេញផ្សាយថ្ងៃទី០៨ ខែ មិថុនា ឆ្នាំ២០១៥។