-
លោក ឈាង វុន លើកឡើងថាខ្លឹមសារនៃសេចក្តីព្រាងច្បាប់អង្គការនៅរក្សាដដែល
- ថ្ងៃចេញផ្សាយ ១-កក្កដា-២០១៥
អ្នកនាំពាក្យរដ្ឋសភា លោក ឈាង វុន ឲ្យដឹងថាគណៈកម្មការទាំងបីនៃរដ្ឋសភាដែលទទួលបន្ទុកពិនិត្យមើលសេចក្តីព្រាងច្បាប់អង្គការ បានសម្រេចរក្សាខ្លឹមសារនៃសេចក្តីព្រាងច្បាប់នេះឲ្យនៅដដែល ដោយមិនមានការកែប្រែអ្វីនោះទេ។នៅព្រឹកថ្ងៃពុធនេះ គណៈកម្មការទី៥(គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន) គណៈកម្មការទី៤ (គណៈកម្មការមហាផ្ទៃ ការពារជាតិ និងកិច្ចការសាធារណៈ) និងគណៈកម្មការទី៦ (គណៈកម្មការនីតិកម្ម និងយុត្តិធម៌) បានជួបពិភាក្សាគ្នាលើសេចក្តីព្រាងច្បាប់អង្គការនេះ។ ប្រធាននៃគណៈកម្មការទាំង៣នេះមកពីគណបក្សប្រជាជនកម្ពុជា។ក្រោយពីការពិភាក្សាជាមួយគណៈកម្មការបីនៃរដ្ឋសភា លោក ឈាង វុន បានលើកឡើងថាជារួមគណៈកម្មការទាំងបីបានរក្សាខ្លឹមសារនៅដដែល។លោកបញ្ជាក់ថា«ខ្លឹមសារ គណៈកម្មការទាំងបីសម្រេចតម្កល់ទុកនៅដដែល» ដោយស្នើឲ្យកែសម្រួលនូវអក្ខរាវិរុទ្ធមួយចំនួន។ លោកបន្តថាជារួមគណៈការទាំងបី បានសម្រេចថាសេចក្តីព្រាងច្បាប់នេះត្រូវធ្វើនៅពេលនេះ។លោក ឈាង វុន បន្តទៀតថានៅថ្ងៃទី០៦ ខែមិថុនា គណៈកម្មការនឹងជួបជាមួយមន្ត្រីរដ្ឋាភិបាល ដើម្បីស្នើឲ្យកែលម្អអក្ខរាវិរុទ្ធមួយចំនួន ហើយនៅថ្ងៃទី០៨ ខែមិថុនា នឹងបើកឲ្យមានការពិភាក្សាជាមួយសង្គមស៊ីវិលជាតិ អន្តរជាតិ និងអង្គទូតនានា។សេចក្តីព្រាងច្បាប់ចុងក្រោយ ដែលរដ្ឋាភិបាលបានដាក់ទៅរដ្ឋសភា មាន៩ជំពូក និងមាន៣៩មាត្រា។ មាត្រា២៤នៃសេចក្តីព្រាងច្បាប់នេះបានចែងថា« អង្គការមិនមែនរដ្ឋាភិបាលក្នុងស្រុក អង្គការមិនមែនរដ្ឋាភិបាលបរទេស ឬសមាគមបរទេស ត្រូវប្រកាន់ជំហរអព្យាក្រឹតចំពោះគ្រប់គណបក្សនយោបាយនៅ ព្រះរាជាណាចក្រកម្ពុជា»។ មាត្រា១០នៃសេចក្តីព្រាងច្បាប់នេះចែងថា សមាគម និងអង្គការមិនមែនរដ្ឋាភិបាល ត្រូវជូនដំណឹងជាលាយលក្ខណ៍អក្សរអំពីព័ត៌មានរាល់គណនីដែលត្រូវ បើកសម្រាប់កិច្ចប្រតិបត្តិការរបស់ខ្លួននៅធនាគារក្នុង ព្រះរាជាណាចក្រកម្ពុជា។ មាត្រា២៥ចែងថាសមាគម និងអង្គការមិនមែនរដ្ឋាភិបាល ត្រូវផ្ញើបាយការណ៍បូកសរុបសកម្មភាពការងារ និងរបាយការណ៍ហិរញ្ញវត្ថុប្រចាំឆ្នាំទៅក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ។ មាត្រា២៥ បន្តថាក្នុងករណីចំបាច់ ក្រសួងមហាផ្ទៃ អាចស្នើសុំរបាយការណ៍ស្តីពីសកម្មភាព និងនយោបាយហិរញ្ញវត្ថុប្រចាំឆ្នាំរបស់សមាគម។ករណីដែលសមាគម និងអង្គការមិនមែនរដ្ឋាភិបាល មិនអនុវត្តតាមមាត្រា១០ មាត្រា២៤ និងមាត្រា២៥ ក្រសួងមហាផ្ទៃត្រូវជូនដំណឹងជាលាយលក្ខណ៍អក្សរដោយទុករយៈពេលយ៉ាង យូរ៣០ថ្ងៃ ថ្ងៃនៃថ្ងៃធ្វើការ។ ករណីមិនអនុវត្តតាម ក្រសួងនឹងជូនដំណឹងជាលាយលក្ខណ៍អក្សរផ្អាកសកម្មភាពបណ្តោះអាសន្ន រយៈពេលយ៉ាងយូរ៩០ថ្ងៃ។ ក្នុងករណីនៅតែមិនព្រមអនុវត្ត ក្រសួងមហាផ្ទៃត្រូវសម្រេចជាលាយលក្ខណ៍អក្សរលុបឈ្មោះចេញពីបញ្ជី៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី ០១ ខែ កក្កដា ឆ្នាំ២០១៥។