-
លោកអ៊ុំ សំអាន៖ពេលCNRPជាប់ឆ្នោតនឹងធ្វើវិសោធនកម្មច្បាប់NGOឡើងវិញ
- ថ្ងៃចេញផ្សាយ ២-កក្កដា-២០១៥
ច្បាប់សមាគម និងអង្គការក្រៅរដ្ឋាភិបាល ត្រូវបានលោកឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ព័ត៌មាន និងឃោសនាការរបស់រដ្ឋសភាបានមានប្រសាសន៍ឲ្យដឹងថា ច្បាប់គ្រប់គ្រងសមាគម និងអង្គការក្រៅរដ្ឋាភិបាល ត្រូវតែអនុម័តជាដាច់ខាត ទោះមានការរារាំង រឺប្រឆាំងក៏ដោយ។ទោះបីជាមន្ត្រីរដ្ឋាភិបាលរូបនេះប្រកាសត្រូវតែអនុម័តច្បាប់នេះដាច់ខាតក៏ដោយ បើមើលនៅក្នុងយុទ្ធនាការប្រឆាំងការអនុម័តសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល របស់ក្រុមអង្គការសង្គមស៊ីវិល និងប្រជាពលរដ្ឋ កាលពីថ្ងៃទី៣០មិថុនា នៅមុខរដ្ឋសភា លោកអ៊ុំ សំអាន តំណាងរាស្ត្រគណបក្សសង្គ្រោះជាតិ បានថ្លែងមិនគាំទ្រសេចក្តីព្រាងច្បាប់នេះឡើយ។ មិនគាំទ្រ នៅពេលដែលច្បាប់នេះចូលទៅសភាពេញអង្គ ហើយនៅពេលអនុម័ត គឺតំណាងរាស្ត្រគណបក្សសង្គ្រោះជាតិនឹងមិនលើកដៃគាំទ្រនោះទេ។តំណាងរាស្ត្រគណបក្សសង្គ្រោះជាតិមណ្ឌលសៀមរាមរូបនេះបានបន្តថា “ ប្រសិនជាសភាអនុម័តច្បាប់នេះនាពេលខាងមុខក៏ដោយ នៅពេលអនាគតគណបក្សសង្គ្រោះជាតិជាប់ឆ្នោត យើងនឹងធ្វើវិសោធនកម្មច្បាប់នេះឡើងវិញ ព្រោះវាជាច្បាប់ដែលបំបិទមានសង្គមសង្គមស៊ីវិល ”។ចំពោះការថ្លែងរបស់មន្ត្រីគណបក្សសង្គ្រោះជាតិ ជុំវិញការធ្វើវិសោធនកម្មច្បាប់ដ៏ចម្រូងចម្រាស់មួយនេះឡើងវិញ នៅពេលគណបក្សខ្លួនជាប់ឆ្នោតនោះ ត្រូវបានលោកកែម ឡី អ្នកតាមដានស្ថានការណ៍សង្គមកម្ពុជាមើលឃើញថា ការធ្វើវិសោធនកម្មច្បាប់សមាគម និងអង្គការក្រៅរដ្ឋាភិបាលឡើងវិញបាន ឬមិនបាននោះ គឺអាស្រ័យទៅលើរដ្ឋាភិបាលថ្មីមួយនោះ ប្រកាន់ភ្ជាប់នូវលិទ្ធិប្រជាធិបតេយ្យពិតប្រាកដ។ជាការកត់សម្គាល់ រយៈពេលចុងក្រោយដែលរដ្ឋាភិបាលបានចេញសេចក្តីព្រាងច្បាប់សមាគម និងអង្គការមិនមែនរដ្ឋាភិបាល ត្រូវបានក្រុមសមាគម អង្គការមួយចំនួន និងគណបក្សប្រឆាំងបានសម្តែងនូវការមិនគាំទ្រជាខ្លាំង។ តែទោះជាយ៉ាងណាក៏ដោយ ក៏មន្ត្រីរដ្ឋាភិបាលនៅតែអះអាងថា សេចក្តីព្រាងច្បាប់ ស្តីពីសមាគម និងអង្គការក្រៅរដ្ឋាភិបាល មានគោលបំណងពង្រឹងតួនាទីរបស់សមាគម និងអង្គការក្រៅរដ្ឋាភិបាលឱ្យទៅជាដៃគូអភិវឌ្ឍន៍ល្អរបស់កម្ពុជា៕ដកស្រង់ពីវិទ្យុវាយោ ចេញផ្សាយថ្ងៃទី ០១ ខែ កក្កដា ឆ្នាំ២០១៥។