-
សកម្មជនបក្សប្រឆាំងថាតុលាការកោះហៅពួកលោកពេលណាកម្ដៅនយោបាយកើនឡើង
- ថ្ងៃចេញផ្សាយ ៩-កក្កដា-២០១៥
សកម្មជនគណបក្សសង្គ្រោះជាតិ ដែលសាលាដំបូងរាជធានីភ្នំពេញកោះហៅឲ្យចូលរួមសវនាការនៅពាក់កណ្តាលខែកក្កដានេះ លើកឡើងថាតុលាការតែងតែកោះហៅពួកគេឲ្យចូលសវនាការនៅពេលដែលស្ថានភាពនយោបាយមានការឡើងកម្ដៅម្តងៗ។កាលពីថ្ងៃទី០១ ខែកក្កដា លោក កែវ សុជាតិ ព្រះរាជអាជ្ញារងអមសាលាដំបូងរាជធានីភ្នំពេញបានចេញដីកា ឲ្យសម្មជនគណបក្សសង្គ្រោះជាតិ១១រូបចូលរួមសវនាការ នៅថ្ងៃទី១៤ ខែកក្កដា វេលាម៉ោង៨ព្រឹក ដែលក្នុងដីកានោះបញ្ជាក់ថា ចោទប្រកាន់ពីបទដឹកនាំកុបកម្ម និងចូលរួមក្នុងចលនាកុបកម្ម។ សកម្មជនគណបក្សសង្គ្រោះជាតិ លោក អ៊ុក ពេជ្រសំណាង លើកឡើងថាលោកមើលឃើញ ថារាល់ពេលដែលស្ថានភាពនយោបាយរវាងគណបក្សទាំងពីរមានភាពតានតឹងគឺតុលាការតែងតែងធ្វើការកោះហៅពួកលោក។ លោកថាការដោះលែងឲ្យពួកលោកនៅក្រៅឃុំនោះ គឺកើតឡើងពីការចរចាផ្នែកនយោបាយរវាងគណបក្សទាំងពីរតែប៉ុណ្ណោះ។ លោកបន្តថាការធ្វើដូច្នេះគឺជារឿងឆោតល្ងង់របស់អ្នកនយោបាយ។ លោកបន្ថែមថា៖«យើងនិយាយនេះមិនទាន់មានភស្តុតាងមែន តែយើងឃើញជាតម្រុយ អ្នកនយោបាយបើកាលណាឡើងកម្ដៅយកយើងទៅញាត់គុក បើកាលណាកម្តៅហ្នឹងវារាងខ្សោយ មិនមានកម្តៅអីពូកយើងនៅតែក្រៅឃុំអញ្ចឹង...ការដោះលែងទៅតាមការសន្ទនា អានេះជារឿងមួយដ៏ល្ងង់ខ្លៅរបស់អ្នកនយោបាយ របស់តុលាការ ឬរបស់អ្នកដឹកនាំរដ្ឋ»។លោក អ៊ុក ពេជ្រសំណាង បន្តទៀតថា តុលាការធ្វើបែបនេះក៏ជាការរារាំងដល់ការធ្វើសកម្មភាពនានារបស់លោក ក្នុងការតស៊ូមតិដើម្បីសេរីភាព និងយុត្តិធម៌សង្គមជាដើម។សកម្មជនរបស់គណបក្សសង្គ្រោះជាតិម្នាក់ទៀត លោក នាង សុឃុន លើកឡើងស្រដៀងគ្នាដែរថា តុលាការតែងតែកោះហៅពួកលោក នៅពេលដែលលោកចាប់ផ្តើមធ្វើសកម្មភាពផ្សេងៗជាមួយគណបក្សសង្គ្រោះជាតិ។ លោកថាដីកាកោះហៅបានចេញមកស្របពេលដែលលោកកំពុងរៀបចំគម្រោងចុះពិនិត្យព្រំដែនជាមួយតំណាងរាស្ត្រគណបក្សសង្គ្រោះជាតិ។ លោកបន្ថែមថា៖«តុលាការកំពុងតែធ្វើឲ្យយុវជនភ័យខ្លាចចំពោះប្រព័ន្ធច្បាប់នៅក្នុងកម្ពុជា ដែលអ្នកនយោបាយចាប់យកធ្វើជាទុនរបស់ខ្លួន ហើយខ្ញុំសង្ឃឹមថា អ្នកនយោបាយឈប់ប្រើល្បិចហ្នឹងទៀតទៅ ឈប់ប្រើនយោបាយហ្នឹងទៀតទៅ»។មេធាវីការពារក្តីឲ្យសកម្មជនទាំង១១រូបរបស់គណបក្សសង្គ្រោះជាតិ លោក ជួង ជូងី បញ្ជាក់ថា ដីកាកោះឲ្យចូលសវនាការនេះ គឺជានីតិវិធីរបស់តុលាការ ដែលតម្រូវឲ្យពួកគាត់ចូលរួមស្តាប់ការឆ្លើយបំភ្លឺរបស់ដើមបណ្តឹងទាំង៣៦រូប។ លោកបន្ថែមថា៖«ពីព្រោះថាឥឡូវនេះនីតិវិធីសាកសួរទៅលើខាងដើមបណ្តឹង ដូច្នេះយើងមិនដឹងថាដើមបណ្តឹងឆ្លើយមកយ៉ាងម៉េច ហើយពេលដែលដើមបណ្តឹងគាត់ផ្តល់ចម្លើយមក បានយើងអ្នកចូលរួមនីតិវិធីសាកសួរដេញដោលទៅតាមភាពជាក់ស្តែង ប្រែប្រួលទៅតាមចម្លើយហ្នឹងឯង»។បើតាមលោក ជួង ជូងី សកម្មកជនទាំង១១រូបនោះនឹងចូលទៅតាមដីកាកោះរបស់តុលាការ ដោយលោកថា លោក មាជ សុវណ្ណារ៉ា ដែលពេលនេះកំពុងស្នាក់នៅសហរដ្ឋអាមេរិកនោះក៏នឹងមកចូលរួមផងដែរ។គួរបញ្ជាក់ថា កាលពីថ្ងៃទី១០ ខែមិថុនា ឆ្នាំ២០១៥ តុលាការបានបញ្ចប់ការសាកសួរទៅលើសកម្មជនទាំង១១រូបរបស់គណបក្សសង្គ្រោះជាតិនេះ។ មន្ត្រីជាន់ខ្ពស់របស់គណបក្សសង្គ្រោះជាតិលោក មាជ សុវណ្ណារ៉ា និងសកម្មជនគណបក្សមួយចំនួនទៀតត្រូវបានអាជ្ញាធរចាប់ខ្លួន ក្នុងករណីហិង្សាលើសន្តិសុខខណ្ឌដូនពេញ នៅជិតទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤ កន្លងទៅ។ នៅថ្ងៃទី១៣ ខែមេសា ឆ្នាំ២០១៥ ពួកគេព្រមទាំងព្រះសង្ឃ៣អង្គ ត្រូវបានដោះលែងឲ្យនៅក្រៅឃុំបណ្តោះអាសន្ន៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី ០៩ ខែ កក្កដា ឆ្នាំ២០១៥។