-
លោក នី ចរិយា ថាមន្រី្តតុលាការខេត្តសៀមរាបប្តឹងរូបលោក ដោយគ្មានភស្តុតាង
- ថ្ងៃចេញផ្សាយ ១៤-កក្កដា-២០១៥
មន្ត្រីសិទ្ធិមនុស្សក្នុងស្រុកមួយ បានច្រានចោលការចោទប្រកាន់របស់ចៅក្រុមស៊ើបសួរ និងព្រះរាជអាជ្ញារងតុលាការខេត្តសៀមរាប ដែលប្តឹងរូបលោកកន្លងមកនោះថា ជាការចោទប្រកាន់គ្មានភស្តុតាងច្បាស់លាស់ និងគ្មានធាតុផ្សំផ្លូវច្បាប់។ការច្រានចោលនេះ ខណៈលោក នី ចរិយា ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក បានចូលបំភ្លឺនៅសាលាដំបូងរាជធានីភ្នំពេញនៅថ្ងៃចន្ទនេះ តាមណ្តឹងរបស់មន្ត្រីតុលាការខេត្តសៀមរាបពីរនាក់ ដែលប្តឹងលោកពីបទបរិហារបង្កាច់កេរិ៍្ត បរិហារកេរ្តិ៍ជាសាធារណៈ និងបទផ្សព្វផ្សាយនូវការអត្ថាធិប្បាយដើម្បីដាក់សម្ពាធលើយុត្តាធិការ ទាក់ទងនឹងរឿងជម្លោះដីធ្លី។ ស្របពេលកំពុងសាកសួរនោះ ប្រជាពលរដ្ឋមកពីស្រុកមេមត់ ខេត្តត្បូងឃ្មុំ ប្រមាណប្រមាណ៣០នាក់ បានប្រមូលផ្តុំនៅមុខតុលាការដោយបារម្ភខ្លាច ចៅក្រមឃុំខ្លួនលោក នី ចរិយា។បន្ទាប់ពីការសាកសួរយៈពេលជាង១ម៉ោង លោក នី ចរិយា ថ្លែងប្រាប់អ្នកសារព័ត៌មានថា ចៅក្រមមិនទាន់សម្រេចយ៉ាងណាចំពោះករណីនេះទេ ដោយរង់ចាំលទ្ធផលនៅពេលក្រោយ។ តែលោកថា ភស្តុតាងដាក់បន្ទុកដែលចៅក្រមស៊ើបសួរ និងព្រះរាជអាជ្ញារងខេត្តសៀមរាប ដាក់ជូនសាលាដំបូងរាជធានីភ្នំពេញ គ្មានធាតុផ្សំផ្លូវច្បាប់ទេ។លោកបញ្ជាក់ថា៖ «ខ្ញុំមិនដឹងទេ ព្រោះអាស្រ័យលើការសន្និដ្ឋានរបស់តំណាងអយ្យការនៅក្នុងសាលាដំបូងរាជធានីភ្នំពេញ ក៏ប៉ុន្តែអ្វីដែលយើងបានដាក់ទៅ គឺគ្មានធាតុផ្សំទាល់តែសោះ ដែលយកមកចោទខ្ញុំថា ទៅបរិហារកេរ្តិ៍ បង្កាច់កេរ្តិ៍ ទម្លាក់កំហុសដាក់សម្ពាធលើយុត្តាធិការរបស់តុលាការ គឺថា អ្វីខ្ញុំដាក់ភស្តុតាងគឺគ្មានហេតុផលទាល់តែសោះ ដែលអាចមកធ្វើការចោទប្រកាន់ខ្ញុំ»។ទោះជាយ៉ាងណា លោក នី ចរិយា អះអាងនៅចំពោះមុខពលរដ្ឋដែលឡើងមកគាំទ្រលោកថា លោកនៅតែរក្សាជំហរការពារប្រជាពលរដ្ឋដែលរងគ្រោះដោយសារដីធ្លី និងរឿងអយុត្តិធម៌សង្គមបន្តទៀត។ បើតាមមន្ត្រីសិទ្ធិមនុស្សរូបនេះ លោកនឹងដាក់ភស្តុតាងដោះបន្ទុកបន្ថែមទៀតតាមរយៈមេធាវី ដើម្បីការពារខ្លួន។អ្នកមានជម្លោះដីធ្លីមកពីខេត្តត្បូងឃ្មុំ អ្នកស្រី អ៊ុន ស៊ូចេង ថ្លែងទាំងទឹកភ្នែករលីងរលោងថា កន្លងទៅមន្ត្រីសិទ្ធិមនុស្សរូបនេះបានជួយការពារសិទ្ធិជូនពលរដ្ឋក្រីក្រ និងអ្នករងគ្រោះដោយអយុត្តិធម៌ជាច្រើន ដែលកើតមាននៅក្នុងសង្គមខ្មែរ ។ អ្នកស្រីបញ្ជាក់ថា៖ «ខ្ញុំយល់ថា គាត់ជាមនុស្សម្នាក់ដែលមានទឹកចិត្តស្នេហាជាតិ គាត់ធ្វើអ្វីៗដើម្បីយុត្តិធម៌សង្គម។ អ៊ីចឹងតុលាការហៅគាត់មកសួរហ្នឹង ពួកយើងត្រូវតែមកគាំទ្រគាត់ យើងអត់មាននីតិវិធីអីសម្រាប់ដោះស្រាយអីជូនគាត់ទេ ព្រោះយើងជាប្រជាពលរដ្ឋទេ យើងគ្រាន់តែមកគាំទ្រ លើកទឹកចិត្តគាត់ ក្នុងនាមគាត់ម្នាក់ដែលធ្វើអ្វីដើម្បីយុត្តិធម៌សង្គម។ ដូចថាកន្លែងណាមានការជិះជាន់កៀបសង្កត់ គាត់ជាអ្នកចេះច្បាប់អ៊ីចឹង គាត់ជួយបំភ្លឺពលរដ្ឋឲ្យយល់ដឹងពីផ្លូវច្បាប់»។ទាក់ទងនឹងករណីនេះ អង្គការអន្តរជាតិមួយ ដែលមានមូលដ្ឋាននៅក្នុងទីក្រុង Dublin ប្រទេសអៀរឡង់ (Ireland) ជំរុញឲ្យតុលាការកម្ពុជាទម្លាក់ចោលបទចោទប្រកាន់លើប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក លោក នី ចរិយា។ អង្គការនេះចាត់ទុកការប្តឹងដោយមន្ត្រីតុលាការនោះថាជាចេតនាមួយក្នុងការបំបិទមាត់អ្នកការពារសិទ្ធិមនុស្សនៅកម្ពុជា និងរារាំងពួកគេក្នុងការគាំទ្រផ្នែកច្បាប់ដល់ជនរងគ្រោះដោយការរំលោភបំពានសិទ្ធិ។គួរបញ្ជាក់ថា ការកោះហៅលោក នី ចរិយា ធ្វើឡើងបន្ទាប់ពីលោកបានធ្វើសន្និសីទសារព័ត៌មានមួយកាលពីខែមិថុនា ដោយចោទប្រកាន់ព្រះរាជអាជ្ញារង លោក សុខ កែវបណ្ឌិត និងចៅក្រមស៊ើបសួរនៃសាលាដំបូងខេត្តសៀមាប លោក គី ឬទ្ធី បានឃុបឃិតគ្នាប្រព្រឹត្ដអំពើពុករលួយ យកដីពលរដ្ឋខ្មែរប្រគល់ឲ្យសហគមន៍ជនជាតិវៀតណាម ហើយបានចាប់ខ្លួនពលរដ្ឋខ្មែរពីរនាក់ ដោយធ្វើឡើងខុសនីតិវិធីច្បាប់។ ករណីនេះ សមាគមអាដហុកក៏បានដាក់ពាក្យប្ដឹងទៅឧត្តមក្រុមប្រឹក្សានៃអង្គចៅក្រម ក្រសួងយុត្ដិធម៌ និងសាលាឧទ្ធរណ៍ ដើម្បីកោះហៅមន្ដ្រីតុលាការទាំងនោះទៅបំភ្លឺ តែរហូតមកទល់ពេលនេះ មិនទាន់ឃើញមានចំណាត់ការនៅឡើយទេ។ ប៉ុន្តែនៅពេលមន្ត្រីតុលាការប្តឹងបកវិញ សាលាដំបូងរាជធានីភ្នំពេញបានចាត់ការលើបណ្តឹងនោះ៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី ១៣ ខែកក្កដា ឆ្នាំ២០១៥។