អនុម័តច្បាប់អង្គការ៖ បក្សកាន់អំណាចអនុម័តតែម្នាក់ឯង បក្សប្រឆាំងពហិកា សង្គមស៊ិវិលធ្វើបាតុកម្ម

អនុម័តច្បាប់អង្គការ៖ បក្សកាន់អំណាចអនុម័តតែម្នាក់ឯង បក្សប្រឆាំងពហិកា សង្គមស៊ិវិលធ្វើបាតុកម្ម
- ថ្ងៃចេញផ្សាយ ១៤-កក្កដា-២០១៥
តាមការគ្រោងទុករដ្ឋសភាជាតិកម្ពុជានៅថ្ងៃចន្ទ ទី១៣ កក្កដា បានបើកកិច្ចប្រជុំអនុម័តច្បាប់អង្គការសង្គមស៊ីវិលដ៏ចម្រូងចម្រាស។ សមាជិកសភាគណបក្សសង្គ្រោះជាតិ មិនចូលរួមអនុម័តច្បាប់នេះទេ។ ដោយឡែកសង្គមស៊ីវិល វិញបានធ្វើបាតុកម្មប្រឆាំងនឹងច្បាប់ថ្មីនេះ។ យ៉ាងណាក៏ដោយនៅច្បាប់នេះត្រូវបានអនុម័តបញ្ចប់។ រដ្ឋសភាដែលមានតែគណបក្សប្រជាជនកម្ពុជា បានអនុម័តសេចក្តីព្រាងច្បាប់ស្តីពីអង្គកាតែម្នាក់ឯងដោយសំឡេង៦៨ លើ៦៨។ ជាការអនុម័តដ៏ចម្រូងចម្រាស់ព្រោះតែសមាជិកសភាគណបក្សសង្គ្រោះជាតិទាំង៥៥ រូប មិនបានចូលរួមប្រជុំ។ ដោយឡែកសង្គមស៊ីវិល និងសកម្មជនដីធ្លីលើកបដាតវ៉ាប្រឆាំងនឹងច្បាប់ថ្មីនៅក្រៅរដ្ឋសភា។លោក ស ខេង តំណាងឱ្យរដ្ឋាភិបាល បានឡើងការពារសេចក្តីព្រាងច្បាប់ថ្មីនេះ។ លោកបានលើកឡើងថា ច្បាប់ដែលមាន៩ជំពូក ៣៩ មាត្រា នឹងជួយឱ្យសង្គមស៊ីវិលនៅកម្ពុជា អាចដំណើរការបានស្របច្បាប់។ បន្ថែមពីលើនេះ ច្បាប់ដែលរដ្ឋាភិបាលកម្ពុជាបានផ្អឹបទុកប្រមាណជា២០ឆ្នាំ គឺមានលក្ខណៈល្អប្រសើរជាងបណ្តាប្រទេសមួយចំនួនថែមទៀតផង។ក្រៅពីការឡើងថ្លែងពីលោក ស ខេង រដ្ឋមន្ត្រីក្រសួងមហាផ្ទៃនោះ សមាជិកសភារបស់គណបក្សប្រជាជនកម្ពុជា ដូចជាលោក ជាម យៀប លោក ឈាង វ៉ុន និងលោក ហ៊ូ ស្រ៊ី រួមទាំងលោក ហ៊ុន ម៉ានីជាដើមបានឡើងបញ្ចេញមតិរៀងៗខ្លួន។សង្គមស៊ីវិល សកម្មជនដីធ្លី ដែលមានលោក វ៉ន ពៅ លោកស្រី ទេព វណ្ណី លោកស្រីយ៉ោម បុប្ផា និងតំណារាស្ត្រគណបក្សសង្គ្រោះជាតិ លោក រៀល ខេមរិន្ទ្រ តាំងពីម៉ោង៨ព្រឹក បានដឹកនាំបាតុកម្មតវ៉ានៅតាមបណ្តោយព្រះស៊ីសុវត្ថិ ដើម្បីប្រឆាំងនឹងការសម្រេចអនុម័តរបស់សមាជិកសភា។ ក្រុមអ្នកតវ៉ាដែលមានសញ្ញាថា «ទេ» ចំពោះច្បាប់អង្គការ បានស្រែកច្រៀងថា ច្បាប់ស្តីពីអង្គការសង្គមស៊ីវិលនេះ គឺរឹតត្បិតសិទ្ធសេរីភាពសង្គមស៊ីវិល និងអង្គការក្រៅរដ្ឋាភិបាល។មិនតែប៉ុណ្ណោះ សង្គមស៊ីវិល បានសព្រមានបោះឆ្នោតទម្លាក់សមាជិកសភាណាដែលហ៊ានបោះឆ្នោតលើកដៃអនុម័តច្បាប់សង្គមស៊ីវិលនេះថែមទៀតផង។ បើទោះបីជាមានការតវ៉ា ប្រឈមមុខគ្នារវាងកងកម្លាំងប៉ូលិស និងសន្តិសុខខណ្ឌដូនពេញជាមួយប្រជាពលរដ្ឋ សង្គមស៊ីវិល និងសកម្មជនដីធ្លីប៉ុន្តែមិនមានអំពើហិង្សាបានកើតឡើងទេ។យ៉ាងណាក៏ដោយ ច្បាប់អង្គការសង្គមស៊ីវិលដ៏ម្រូងចម្រាស់នេះ ត្រូវបានរដ្ឋសភាអនុម័តបញ្ចប់ហើយនៅថ្ងៃចន្ទទី១៣ កក្កដា។គណបក្សសង្គ្រោះជាតិ បានបង្ហាញការសោកស្តាយចំពោះការអនុម័តច្បាប់ថ្មីនេះ។ លោក យ៉ែម បុញ្ញឫទ្ធិបន្តថា គណបក្សប្រឆាំងនៅតែបន្តការតស៊ូមតិប្រឆាំង ហើយថា ខ្លួននឹងព្យួរច្បាប់នេះនៅពេលខ្លួនអាចមានឱកាសបានឡើងដឹកនាំប្រទេស។ ដោយឡែកលោក សឿង សារឿន បានបញ្ជាក់ថា ដៃគូម្ចាស់ជំនួយអន្តរជាតិ អាចសើរើមើលឡើងវិញពីកិច្ចសហការជាមួយរដ្ឋាភិបាលកម្ពុជាក្រោយការសម្រេចរបស់រដ្ឋសភា៕ដកស្រង់ពីវិទ្យុបារាំងអន្តរជាតិ ចេញផ្សាយថ្ងៃទី ១៣ ខែកក្កដា ឆ្នាំ២១០៥។