-
CCHR អំពាវនាវឲ្យច្រានចោលច្បាប់អង្គការដោយគ្មានលក្ខខណ្ឌ ខណៈសភាគ្រោងពិភាក្សាអនុម័តច្បាប់នេះនៅថ្ងៃស្អែក
- ថ្ងៃចេញផ្សាយ ១៤-កក្កដា-២០១៥
ខណៈដែលរដ្ឋសភានឹងបើកកិច្ចប្រជុំពិភាក្សាអនុម័តច្បាប់អង្គការនៅថ្ងៃស្អែក មជ្ឈមណ្ឌលសិទ្ធិមនុស្សកម្ពុជាបានអំពាវនាវជាថ្មី ឲ្យច្រានចោលច្បាប់អង្គគារសមាគម ដោយគ្មានលក្ខខណ្ឌ។ បើតាមមជ្ឈមណ្ឌលសិទ្ធិមនុស្សកម្ពុជា សេចក្ដីព្រាងច្បាប់អង្គការសមាគមនេះ មិនអាចទទួលយកបានទេ។ នៅក្នុងសេចក្ដីថ្លែងការណ៍ចុះថ្ងៃទី១២កក្កដានេះ មជ្ឈមណ្ឌលសិទ្ធិមនុស្សកម្ពុជា CCHR បានបន្តបរិហាររិះគន់សេចក្ដីព្រាងច្បាប់ស្ដីពីសមាគមនិងអង្គការក្រៅរដ្ឋាភិបាល។ បើតាម CCHR ច្បាប់អង្គការសមាគមនេះ បានប្រគល់អំណាចដ៏ទូលំទូលាយដល់រដ្ឋាភិបាល ដែលនឹងប៉ះពាល់យ៉ាងធ្ងន់ធ្ងរដល់សកម្មភាពអង្គការសង្គមស៊ីវិលជាតិ និងអន្ដរជាតិ។CCHR ថា សេចក្ដីព្រាងច្បាប់ចុងក្រោយ ផ្ទុយស្រឡះនឹងការធានាដោយរដ្ឋធម្មនុញ្ញកម្ពុជា និងកតិកាសញ្ញាអន្ដរជាតិស្ដីពីសិទ្ធិពលរដ្ឋ និងសិទ្ធិនយោបាយ។ ហើយប្រសិនបើច្បាប់នេះត្រូវបានអនុម័ត វានឹងនាំឲ្យមានការរឹតបន្តឹងយ៉ាងធ្ងន់ធ្ងរទៅលើសេរីភាពខាងសមាគម សេរីភាពខាងការបញ្ចេញមតិ និងខាងការជួបជុំ ព្រមទាំងសិទ្ធិក្នុងការចូលរួមក្នុងជីវភាពសារធារណៈ ក៏ដូចជារឹតបន្តឹងទៅលើមតិប្រឆាំងផងដែរ។ នេះបើតាម CCHR ។ទន្ទឹមនឹងការរិះគន់ទៅលើសេចក្ដីព្រាងច្បាប់ នាយកប្រតិបត្តិមជ្ឈមណ្ឌលសិទ្ធិមនុស្សកម្ពុជា CCHR លោកស្រី ចក់ សុភាព ក៏បានអំពាវនាវឲ្យច្រានចោលសេចក្ដីព្រាងច្បាប់អង្គការនេះ ដោយគ្មានលក្ខខណ្ឌផងដែរ។ បើតាមនាយិកាប្រតិបត្តិអង្គការ CCHR រូបនេះ នេះគឺជាពេលវេលាដែលរដ្ឋសភាត្រូវតែច្រានចោលសេចក្ដីព្រាងច្បាប់នេះ ដោយសារតែវាមិនអនុលោមទៅតាមរដ្ឋធម្មនុញ្ញ និងលិខិតូបករណ៍អន្ដរជាតិនានា ដែលកម្ពុជាបានចុះសច្ចាប័ន។គួរជម្រាបជូនថា ការអំពាវនាវរបស់មជ្ឈមណ្ឌលសិទ្ធិមនុស្សនាពេលនេះ ធ្វើឡើងខណៈដែលរដ្ឋសភានឹងបើកកិច្ចប្រជុំពិភាក្សាអនុម័តសេចក្ដីព្រាងច្បាប់អង្គការនៅថ្ងៃស្អែក។ មុននឹងឈានមកដល់ការពិភាក្សាអនុម័តនេះ អគ្គលេខាធិការរដ្ឋសភាជាតិ បានរៀបចំសិក្សាសាលាពិគ្រោះយោបល់ស្ដីពីច្បាប់អង្គការជាសាធារណៈម្ដងហើយ កាលពីថ្ងៃទី៨កក្កដាកន្លងទៅ។ ប៉ុន្តែយ៉ាងណាក៏ដោយ សិក្ខាសាលាពិគ្រោះយោបល់នោះ មិនអាចធ្វើឲ្យសង្គមស៊ីវិលសប្បាយចិត្តទេ។ សង្គមស៊ីវិលហៅសិក្ខាសាលានោះថា ជាការរៀបចំបង្គ្រប់កិច្ច ដែលមិនបានដោះស្រាយបញ្ហាព្រួយបារម្ភសំខាន់ៗ ពាក់ព័ន្ធនឹងសេចក្ដីព្រាងច្បាប់អង្គការដ៏ចម្រូងចម្រាស់នោះទេ៕ដកស្រង់ពីវិទ្យុបារាំងអន្តរជាតិ ចេញផ្សាយថ្ងៃទី ១៣ ខែកក្កដា ឆ្នាំ២០១៥។