-
UNនិងEUថាច្បាប់អង្គការនឹងរឹតត្បិតសេរីភាពអង្គការនិងប៉ះពាល់ការអភិវឌ្ឍនៅកម្ពុជា
- ថ្ងៃចេញផ្សាយ ១៦-កក្កដា-២០១៥
មន្ត្រីអង្គការសហប្រជាជាតិទទួលបន្ទុកសិទ្ធិសេរីភាពក្នុងការជួបប្រជុំដោយសន្តិវិធីនិងសេរីភាពក្នុងការបង្កើតសមាគម លោកMaina Kiai និងមន្ត្រីសហភាពអឺរ៉ុប បានអះអាងថាច្បាប់អង្គការដែលរដ្ឋសភាទើបតែអនុម័ត នឹងរឹតត្បិតសេរីភាពអង្គការ និងប៉ះពាល់ការអភិវឌ្ឍនៅកម្ពុជា។ លោកMaina Kiai បានលើកឡើងនៅសេចក្ដីថ្លែងការណ៍មួយកាលពីថ្ងៃពុធថា៖«ប្រសិនបើសេចក្តីព្រាងច្បាប់នោះត្រូវគេអនុម័ត ក្រុមអ្នកតស៊ូមតិដើម្បីសិទ្ធិមនុស្ស សេរីភាពជាមូលដ្ឋាន និងអភិបាលកិច្ចល្អ អាចនឹងត្រូវបានគេបិទអង្គការ និងត្រូវជាប់បទល្មើសព្រហ្មទណ្ឌ»។ លោកបន្តថា៖«ចុងក្រោយវានឹងនាំមកនូវឥទ្ធិពលអវិជ្ជមានយ៉ាងខ្លាំងដល់ការចូលរួមបែបប្រជាធិបតេយ្យរបស់ប្រជាជនកម្ពុជា ក្នុងការអភិវឌ្ឍប្រទេសរបស់ពួកគេ»។លោកMaina Kiai បានអំពាវនាវឲ្យព្រឹទ្ធសភាបដិសេធចោលទាំងស្រុងនូវច្បាប់ស្តីពីសមាគមនិងអង្គការមិនមែនរដ្ឋាភិបាលនេះ ដោយចាត់ទុកថាច្បាប់នេះមិនស្របតាមគោលការណ៍សិទ្ធិមនុស្សលើសេរីភាពនៃការប្រមូលផ្តុំ។ចំណែកសេចក្តីថ្លែងការណ៍របស់អ្នកនាំពាក្យសហភាពអឺរ៉ុបចេញផ្សាយនៅថ្ងៃព្រហស្បតិ៍នេះ ឲ្យដឹងច្បាប់នេះប៉ះលើបញ្ហារសើបជាច្រើនដែលទាមទារឲ្យមានការពិគ្រោះយោបល់ឲ្យបានស៊ីជម្រៅជាមួយអ្នកពាក់ព័ន្ធទាំងអស់។ សេចក្តីថ្លែងការណ៍បញ្ជាក់ថា៖«គួរឲ្យសោកស្ដាយបញ្ហាព្រួយបារម្ភសំខាន់ៗមួយចំនួនមិនត្រូវបានយកមកពិចារណាឲ្យបានគ្រប់គ្រាន់ឡើយ។ ច្បាប់នេះមានសក្តានុពលភាពយ៉ាងធំធេងក្នុងការដាក់កំហិតដល់សកម្មភាពរបស់អង្គការក្រៅរដ្ឋាភិបាល»។ សេចក្តីថ្លែងការណ៍របស់សហភាពអឺរ៉ុបបញ្ជាក់ថា៖«កិច្ចសហប្រតិបត្តិការអភិវឌ្ឍរវាងសហភាពអឺរ៉ុបនិងកម្ពុជាពឹងផ្អែកក្នុងកម្រិតដ៏ធំមួយលើអង្គការក្រៅរដ្ឋាភិបាល។ ការគោរពដោយពេញលេញចំពោះបញ្ញត្តិរដ្ឋធម្មនុញ្ញស្តីពីពហុភាពនិងសេរីភាពនៃសមាគមនិង សេរីភាពនៃការបញ្ចេញមតិត្រូវតែបានលើកតម្កើង»។អ្នកនាំពាក្យព្រឹទ្ធសភា លោក ម៉ម ប៊ុននាង មានប្រសាសន៍ថាព្រឹទ្ធសភាមិនទាន់សម្រេចយ៉ាងណាលើច្បាប់អង្គការនេះនៅឡើយទេ។ លោកបន្តថាលោកអាចបញ្ចេញយោបល់បាន នៅពេលមានកិច្ចប្រជុំពេញអង្គនៃព្រឹទ្ធសភាលើច្បាប់នេះជាមុនសិន។គួររំឭកថា កាលពីថ្ងៃទី១៣ ខែកក្កដានេះ សេចក្តីព្រាងច្បាប់គ្រប់គ្រងអង្គការត្រូវបានរដ្ឋសភាអនុម័តដែលមានតែតំណាងរាស្ត្រគណបក្សប្រជាជនកម្ពុជា៦៨រូប ដោយតំណាងរាស្ត្រគណបក្សប្រឆាំងធ្វើពហិការមិនចូលរួមអនុម័តច្បាប់មួយនេះ។សង្គមស៊ីវិលរកឃើញថាក្នុងចំណោម៣៩មាត្រា គឺយ៉ាងតិចមាន២៥ភាត្រាមានខ្លឹមសារកម្រិតសិទ្ធិធ្វើសកម្មភាពរបស់សង្គមស៊ីវិលនិងរំលោភសិទ្ធិមនុស្ស ដែលផ្ទុយពីរដ្ឋធម្មនុញ្ញនិងច្បាប់អន្តរជាតិ។ សង្គមស៊ីវិលបារម្ភថាតាមអំណាចនៃច្បាប់នោះនឹងធ្វើឲ្យដំណើរការលទ្ធិប្រជាធិបតេយ្យនៅកម្ពុជាដើរថយក្រោយ៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី ១៦ ខែ កក្កដា ឆ្នាំ២០១៥។