-
សង្គមស៊ីវិលស្នើឲ្យបញ្ឈប់ការរឹតត្បិតសេរីភាពលើប្រព័ន្ធអ៊ីនធើណែត
- ថ្ងៃចេញផ្សាយ ២៦-សីហា-២០១៥
អង្គការសង្គមស៊ីវិល បានស្នើឲ្យរាជរដ្ឋាភិបាលធ្វើសកម្មភាពជាបន្ទាន់ ដើម្បីការពារសិទ្ធិមនុស្ស និងបញ្ចប់ការរឹតត្បិតលើប្រព័ន្ធអ៊ីនធើណែត ក្រោយពីមានការចាប់ខ្លួនអ្នកប្រើប្រាស់ហេ្វសប៊ុកជាបន្តបន្ទាប់។ប្រតិកម្មនេះកើតឡើង ក្រោយពីសមត្ថកិច្ចបានចាប់ខ្លួនយុវជន គង់ រ៉ៃយ៉ា វ័យ២៥ឆ្នាំ ជានិស្សិតនៅសាកលវិទ្យាល័យខេមរៈកាលពីថ្ងៃសុក្រ ទី២១ ខែសីហា ពីបទញ៉ុះញង់ធ្វើ[បដិវត្តន៍ពណ៌]តាមរយៈសារនៅលើទំព័រហ្វេសប៊ុក។ នៅក្នុងសេចក្តីប្រកាសព័ត៌មានចេញផ្សាយកាលពីថ្ងៃទី២៤ ខែសីហា មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ(CCIM) បានហៅការចាប់ខ្លួនយុវជន គង់ រ៉ៃយ៉ា នោះថាបានបញ្ជាក់ឲ្យឃើញច្បាស់ពីការរឹតត្បិតរបស់រដ្ឋាភិបាលទៅលើសេរីភាពបញ្ចេញមតិលើប្រព័ន្ធអ៊ីនធើណែត។នាយកប្រត្តិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ(CCIM)លោក ប៉ា ងួនទៀង មានប្រសាសន៍ថា ការបង្ក្រាបលើការបញ្ចេញមតិលើប្រព័ន្ធអ៊ីនធើណែតនេះ បង្កើតឲ្យមានរូបភាពមិនល្អចំពោះអនាគតនៃសេរីភាពលើប្រព័ន្ធអ៊ីនធើណែត នៅក្នុងប្រទេសកម្ពុជា។ លោកមានប្រសាសន៍ថា៖ “ចំណុចនេះ បើទោះជារដ្ឋាភិបាល ដឹងថាសេរីភាពលើប្រព័ន្ធអ៊ីនធើណែត និងតាមរយៈប្រព័ន្ធផ្សេងៗហ្នឹង វាជាការធានា វាជាសេរីភាពឬសិទ្ធិ ដែលធានាដោយរដ្ឋធម្មនុញ្ញនៃប្រទេសកម្ពុជា ធានាដោយច្បាប់សិទ្ធិមនុស្សអន្តរជាតិ ដែលប្រទេសកម្ពុជា ជាហត្ថលេខីក៏ដោយ ប៉ុន្តែរដ្ឋាភិបាលលែងខ្វល់នឹងគោលការណ៍ នឹងកាតព្វកិច្ចរបស់ខ្លួនហើយ គឺធ្វើតាមអ្វីដែលខ្លួនចង់ធ្វើ ដែលជាសញ្ញាដែលរដ្ឋាភិបាលដើរទៅរកផ្លូវផ្តាច់ការ”។សម្រាប់នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព ការចាប់ចង និងឃុំខ្លួនយុវជនដោយសម្អាងលើការបង្ហោះសារលើហ្វេសប៊ុកនេះ ហាក់ដូចជាធ្ងន់ធ្ងរពេក។ អ្នកស្រីពន្យល់ថា ករណីនេះ គឺគួរតែហៅយុវជននោះមកធ្វើការណែនាំ និងព្រមានដើម្បីផ្តល់ឱកាសឲ្យគាត់កែខ្លួនវិញ។នៅក្នុងរយៈពេលចុងក្រោយនេះ មានការចាប់ខ្លួនសមាជិកព្រឹទ្ធសភា គណបក្ស សម រង្ស៊ី លោក ហុង សុខហួរ បន្ទាប់ពីលោកនិយាយពីសន្ធិសញ្ញាព្រំដែនកម្ពុជា និងវៀតណាម ហើយត្រូវបានផ្សព្វផ្សាយនៅលើបណ្តាញហ្វេសប៊ុក។ ចំណាត់ការនេះ គឺបន្ទាប់ពីតំណាងរាស្ត្រគណបក្សសង្គ្រោះជាតិ លោក អ៊ុំ សំអាន ត្រូវបានតំណាងរាស្ត្រគណបក្សប្រជាជនកម្ពុជាចោទថា សរសេរតាមហ្វេសប៊ុក ប្រមាថ លោក ហេង សំរិន ប្រធានរដ្ឋសភា ហើយរដ្ឋសភាបានពិន័យដោយកាត់ប្រាក់ខែ និងមិនឲ្យចូលរដ្ឋសភាមួយរយៈ។លោកស្រី ចក់ សុភាព បានឲ្យដឹងថា បើទោះជាមានការគាបសង្កត់លើប្រព័ន្ធផ្សព្វផ្សាយដូចជា កាសែត វិទ្យុ ទូរទស្សន៍ក្តី ក៏សេរីភាពនៅលើបណ្តាញអ៊ីនធើណែត ហាក់ដូចជាមានភាពល្អប្រសើរ។ ក៏ប៉ុន្តែ លោកស្រី ការចាប់ចងប្រជាជនលើករណីបង្ហោះសារលើហ្វេសប៊ុក ដែលរដ្ឋាភិបាលអះអាងថា បានធ្វើឲ្យប៉ះពាល់ដល់សង្គមជាតិ ត្រូវបានអ្នកស្រី ចក់ សុភាព ហៅថាជាសញ្ញាមួយដែលបង្ហាញថា សេរីភាពលើបណ្តាញទំនាក់ទំនងសង្គម មានភាពចង្អៀត ដែលបង្ខំឲ្យអ្នកប្រើប្រាស់ចាប់ពិរុទ្ធខ្លួនឯង ហើយត្រូវការបង្កើនការប្រុងប្រយ័ត្នជាងមុន។ លោកស្រីបញ្ជាក់ថា៖ “រដ្ឋធម្មនុញ្ញយើង បានធានានូវសិទ្ធិរបស់ពលរដ្ឋក្នុងការចូលរួមដោយសកម្ម ក្នុងសកម្មភាពសេដ្ឋកិច្ច សង្គម និងនយោបាយ។ ប្រសិនបើយើង ចាប់ផ្តើមឡើង ដោយចាប់ចង ចោទប្រកាន់ដាក់ទៅតុលាការ វាជាសញ្ញាមួយ បំបាក់ដល់យុវជនដទៃ ដែលគាត់ចង់ចូលរួមជាបន្តបន្ទាប់”។សេចក្តីថ្លែងការណ៍រួមរបស់សង្គមស៊ីវិល ដែលបានដាក់ជូនឧត្តមស្នងការអង្គការសហប្រជាជាតិទទួលបន្ទុកផ្នែកសិទ្ធិមនុស្ស កាលពីថ្ងៃទី២០ ខែសីហា ស្តីពីស្ថានភាពសិទ្ធមនុស្សនៅក្នុងប្រទេសកម្ពុជា បានឲ្យដឹងថា រដ្ឋាភិបាលកម្ពុជាបានធ្វើសេចក្តីព្រាងច្បាប់ប្រឆាំងឧក្រិដ្ឋកម្មលើប្រព័ន្ធអ៊ីនធើណែត និងច្បាប់ស្តីពីសារគមនាគមន៍។សេចក្តីថ្លែងការណ៍នេះ បានអះអាងថា ប្រសិនបើច្បាប់ទាំងនេះត្រូវបានអនុម័ត នោះរដ្ឋាភិបាលនឹងមានសិទ្ធិក្នុងការតាមដាននូវរាល់សកម្មភាពរបស់អ្នកប្រើប្រាស់អ៊ីនធើណែត។ ជាអ្វីដែលសង្គមស៊ីវិល ព្រួយបារម្ភថា នឹងរឹតត្បិតដល់សេរីភាពបញ្ចេញមតិរបស់ប្រជាជន៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី ២៥ ខែ សីហា ឆ្នាំ២០១៥៕