-
រដ្ឋមន្ត្រីក្រសួងព័ត៌មាន៖ គ្មានគម្រោងរៀបចំច្បាប់គ្រប់គ្រងអ៊ីនធឺណិត នោះទេ
- ថ្ងៃចេញផ្សាយ ២១-កញ្ញា-២០១៥
រាជធានីភ្នំពេញ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានមាន ប្រសាសន៍ថា រាជរដ្ឋាភិបាលគ្មានគម្រោងរៀបចំច្បាប់ គ្រប់គ្រង អ៊ីនធឺណិត និងបណ្តាញទំនាក់ទំនងសង្គមនោះទេ។លោកបន្តទៀតថា បច្ចុប្បន្ននៅក្នុងពិភពលោក មានអ្នកប្រើប្រាស់ Facebook ជាង ១ពាន់លាននាក់ ដោយឡែកនៅកម្ពុជាមានអ្នកប្រើប្រាស់ Facebook ជាង ៥លាននាក់។ ដូច្នេះការប្រើប្រាស់ Facebook បានធ្វើឱ្យយុវជនកម្ពុជាយើងជាច្រើន បានបង្ហាញពីមុខមាត់ និងអត្តសញ្ញាណ ចរិតលក្ខណៈ តាមរយៈការសរសេរ និងបង្ហោះរូបភាព ផ្សេងៗនៅលើទំព័រ Facebook របស់ពួកគេ ដែលអាច បញ្ជាក់បាននូវលក្ខណៈសម្បត្តិ ប្រកប ដោយសីលធម៌ សុជីវធម៌ក្នុងកម្រិតណាខ្លះ។លោករដ្ឋមន្ត្រីក៏បានបញ្ជាក់ផងដែរថា អ្នកដែលប្រើប្រាស់ Facebook មិនមានឈ្មោះពិតប្រាកដ ហើយធ្វើការ វាយប្រហារទៅលើបុគ្គលឬលើស្ថាប័នណាមួយដែលបង្កឱ្យមានផលប៉ះពាល់ដល់សង្គមយ៉ាងធ្ងន់ធ្ងរ ហើយគិតថាមិន មាននរណាស្គាល់ ឬរកឃើញខ្លួនឡើយ នោះគឺជាការយល់ច្រឡំហើយ ពីព្រោះគេអាចស្រាវជ្រាវ និងតាមដានរកឃើញ និងអាចចាប់យកមកប្រឈមមុខនឹងផ្លូវច្បាប់នូវអ្វីដែលខ្លួនបានធ្វើ។លោក ខៀវ កាញារីទ្ធ រដ្ឋមន្ត្រីក្រសួងព័ត៌មានលើកឡើងបែបនេះ នៅក្នុងសិក្ខាសាលា អប់រំ ស្តីពីសីលធម៌ និងសុជីវធម៌សង្គម សម្រាប់អ្នកប្រើប្រាស់បណ្តាញ ទំនាក់ទំនងសង្គម កាលពីព្រឹកថ្ងៃទី២០ ខែកញ្ញា ឆ្នាំ២០១៥ ដែលរៀបចំ ឡើងដោយសភាយុវ ពាណិជ្ជករ អន្តរជាតិកម្ពុជា (JCI Cambodia) នៅរាជធានីភ្នំពេញ៕ដកស្រង់ពីសារព័ត៌មានសម្លេងសារព័ត៌មានសេរី ចេញផ្សាយថ្ងៃទី ២១ ខែកញ្ញា ឆ្នាំ២០១៥៕