-
មេធាវីអាមេរិកាំងស្ម័គ្រចិត្តជួយផ្នែកច្បាប់ស្វែងរកការដោះលែងលោក មាជ សុវណ្ណារ៉ា
- ថ្ងៃចេញផ្សាយ ១-តុលា-២០១៥
គ្រួសាររបស់សកម្មជនគណបក្សប្រឆាំង ឲ្យដឹងថា មេធាវីអាមេរិកាំង បានស្ម័គ្រចិត្តចេញមុខតវ៉ាផ្លូវតុលាការ ដើម្បីរកវិធីដោះលែងអ្នកទោសនយោបាយនៅកម្ពុជា ឲ្យមានសេរីភាព។អ្នកស្រី ជែមី មាជ (Jamie Meach) ភរិយារបស់ លោក មាជ សុវណ្ណារ៉ា ប្រធាននាយកដ្ឋានព័ត៌មាន និងប្រព័ន្ធផ្សព្វផ្សាយ នៃគណបក្សសង្គ្រោះជាតិ បានប្រាប់វិទ្យុអាស៊ីសេរី តាមទូរស័ព្ទថា មេធាវីអាមេរិកាំង លោក មូរតុន ក្លា (Morton Sklar) នឹងប្ដឹងទៅតុលាការរបស់រដ្ឋកាលីហ្វ័រញ៉ា (California) ដើម្បីស្វែងរកជំនួយផ្លូវច្បាប់ក្នុងការដោះលែង លោក មាជ សុវណ្ណារ៉ា ដែលតុលាការទីក្រុងភ្នំពេញ បានកាត់ឲ្យជាប់ទោស ២០ឆ្នាំ និងសកម្មជននយោបាយជាង ១០នាក់ផ្សេងទៀត៖ «គាត់ថាគេអាចមានច្បាប់ជួយ ដូចថានៅក្រៅប្រទេសអ៊ីចឹង គេអាចជួយបាន ដូច្នេះហើយបានជាខ្ញុំដាក់ពាក្យបណ្ដឹងនៅកាលីហ្វ័រញ៉ា ហ្នឹង គឺក្រុមមេធាវីម៉ាក្រុម មិនមែនមានតែគាត់ម្នាក់ឯងទេ។ ចា៎! គាត់ដាក់នៅកាលីហ្វ័រញ៉ា ហ្នឹងតែម្តង ព្រោះគ្រួសារខ្ញុំគាត់រស់នៅក្នុងរដ្ឋនេះ»។លោក មូរតុន ក្លា ក៏ជាមេធាវីអន្តរជាតិដែលប្ដឹង លោក ហ៊ុន សែន ពីបទឧក្រិដ្ឋកម្មប្រឆាំងមនុស្សជាតិ ទៅតុលាការព្រហ្មទណ្ឌអន្តរជាតិ (ICC) ដែរ។វិទ្យុអាស៊ីសេរី មិនទាន់អាចសុំសេចក្តីអត្ថាធិប្បាយពីមន្ត្រីរដ្ឋាភិបាលកម្ពុជា បានទេជុំវិញបញ្ហានេះ។លោក មាជ សុវណ្ណារ៉ា ជាពលរដ្ឋខ្មែរ-អាមេរិកាំង ត្រូវបានតុលាការកម្ពុជា កាត់ឲ្យជាប់គុករយៈពេល ២០ឆ្នាំ ពីបទដឹកនាំកុបកម្មនៅក្បែរទីលានប្រជាធិបតេយ្យ ហើយសកម្មជន ១០នាក់ទៀតត្រូវបានកាត់ឲ្យជាប់ទោសក្នុងម្នាក់ៗ ៧ឆ្នាំ។ជុំវិញការស្វែងរកអន្តរាគមន៍ផ្លូវច្បាប់ ដើម្បីដោះលែង លោក មាជ សុវណ្ណារ៉ា និងសកម្មជននយោបាយជាង ១០នាក់ផ្សេងទៀតពីសំណាក់ក្រុមមេធាវីអាមេរិកាំង នោះ អ្នកស្រី ជែមី មាជ ថ្លែងថា ប្រធានគណៈកម្មាធិការទទួលបន្ទុកកិច្ចការបរទេស នៃរដ្ឋសភាសហរដ្ឋអាមេរិក លោក អេដ រ៉យស៍ (Ed Royce) ក៏កំពុងខិតខំប្រឹងលើកិច្ចការទាំងនេះដែរ៖ «លោក អេដ រ៉យស៍ ទាំងអស់ហ្នឹង គឺគេអាណិត ហើយគេផ្ដោតខ្លាំងជាងគេហ្នឹង គឺគេអាណិតក្មេងដែលឃើញកូនស្រីខ្ញុំទាំងបីដែលនៅតូចៗ ហើយគាត់ថាគាត់ត្រូវឲ្យ មាជ សុវណ្ណារ៉ា ហ្នឹងចេញមកឲ្យលឿង ព្រោះជាគ្រួសារក្មេង ហើយគាត់ឃើញកូនហ្នឹងរហូតដល់គាត់យំ។ សំខាន់បំផុតនៅសហរដ្ឋអាមេរិក គឺគេផ្ដោតទៅលើក្មេង។ ខ្ញុំបាននិយាយប្រាប់គាត់ដែរថា កូនស្រីខ្ញុំអាទីបីហ្នឹង រៀនអត់កើតដូចថាសតិអារម្មណ៍គាត់ផ្ដោតមនោសញ្ចេតនាទៅលើប៉ាគេច្រើន។ រៀននៅសាលាអី គឺរៀនអត់កើត សឹងថាហ្សេរ៉ូតែម្តង»។នៅក្នុងសវនាការស្តីអំពីសិទ្ធិកាន់កាប់ដីធ្លី និងការអភិវឌ្ឍនៅអាស៊ីអាគ្នេយ៍ កាលពីថ្ងៃទី២១ ខែសីហា ក្នុងរដ្ឋកាលីហ្វ័រញ៉ា លោក អេដ រ៉យស៍ មានប្រសាសន៍ថា សភាសហរដ្ឋអាមេរិក នឹងសហការជាមួយរដ្ឋាភិបាលក្រុងវ៉ាស៊ីនតោន (Washington) ធ្វើយ៉ាងណាដើម្បីដោះលែងពលរដ្ឋអាមេរិកាំង ពីការឃុំឃាំងផ្នែកនយោបាយរបស់រដ្ឋាភិបាលបរទេស៖ «គាត់កំពុងស្ថិតក្នុងការឃុំឃាំង ហើយយើងនឹងជជែកអំពីបញ្ហានេះជាមួយក្រសួងការបរទេសសហរដ្ឋអាមេរិក ម្តងទៀតក្នុងការធ្វើអ្វីៗគ្រប់បែបយ៉ាង ដើម្បីយកពលរដ្ឋអាមេរិកាំង ដែលកំពុងជាប់ឃុំឃាំងនៅបរទេស ដោយសារតែការបញ្ចេញមតិអំពីការរំលោភសិទ្ធិដីធ្លី សិទ្ធសេរីភាព និងសេចក្តីថ្លៃថ្នូររបស់មនុស្សរូបនោះមកវិញ»។កាលពីថ្ងៃទី១០ ខែកញ្ញា វិទ្យុអាស៊ីសេរី បានទទួលសារអ៊ីមែលពី អ្នកស្រី អានា រីចឈី អាលែន (Anna Richey-Allen) អ្នកនាំពាក្យរបស់ការិយាល័យទទួលបន្ទុកកិច្ចការតំបន់អាស៊ី-ប៉ាស៊ីហ្វិក នៃក្រសួងការបរទេសសហរដ្ឋអាមេរិក ថា សហរដ្ឋអាមេរិក មានការបារម្ភជាខ្លាំង ចំពោះការឃុំឃាំងមន្ត្រីគណបក្សសង្គ្រោះជាតិ ដែលក្នុងនោះមានពលរដ្ឋអាមេរិកាំង។ក្រសួងការបរទេស ក៏បានស្នើឲ្យមានការកាត់ក្តីឡើងវិញ ដោយសារការកាត់ក្តីកន្លងមកមានភាពមិនប្រក្រតី គ្មានយុត្តិធម៌ និងគ្មានតម្លាភាព ដែលមិនអាចទទួលយកបាន ហើយក្រសួងការបរទេសសហរដ្ឋអាមេរិក នឹងប្រើកាតព្វកិច្ចរបស់ខ្លួនយ៉ាងម៉ឺងម៉ាត់ ក្នុងការជួយដល់ពលរដ្ឋអាមេរិកាំង នៅបរទេសដែលកំពុងស្ថិតក្នុងការឃុំឃាំង៕ដកស្រង់ពីវិទ្យុអាស៊ីសេរី ចេញផ្សាយថ្ងៃទី ៣០ ខែកញ្ញា ឆ្នាំ២០១៥។