-
ប្រជាពលរដ្ឋរងគ្រោះដោយសារសង់ផ្លូវរថភ្លើងបន្តតវ៉ា
- ថ្ងៃចេញផ្សាយ ១៦-ធ្នូ-២០១៥
បន្ទាយមានជ័យៈ អ្នកតវ៉ាប្រមាណជាង ១០០ នាក់បានប្រមូលផ្តុំគ្នានៅមុខសាលាដំបូងខេត្តបន្ទាយមានជ័យកាលពីម្សិលមិញដើម្បីទាមទារឲ្យដោះលែងអ្នករៀបចំការតវ៉ាម្នាក់ដែលត្រូវបានចាប់ឃុំខ្លួនកាលពីថ្ងៃចន្ទបន្ទាប់ពីបាតុករបានដុតរូបទីងមោងតំណាងមន្ត្រីពុករលួយ និងអូសរូបនោះនៅតាមផ្លូវខណៈសហគមន៍របស់ពួកគេប្រឈមនឹងការបណ្តេញចេញពីផ្ទះរបស់ខ្លួនដោយសារគម្រោងផ្លូវដែក និងខណៈអ្នកតវ៉ា ៥ នាក់ទៀតត្រូវបានកោះហៅទៅស្នងការខេត្តសាកសួរ។ លោក វ៉ន វ៉ាន់ អាយុ ៣៦ ឆ្នាំដែលជាបាតុករម្នាក់នៅក្នុងចំណោមបាតុករទាំងនោះបានថ្លែងថាអ្នកតវ៉ាប្រមាណ ១០០ នាក់កំពុងតវ៉ានៅមុខតុលាការខេត្តកាលពីរសៀលម្សិលមិញដើម្បីទាមទារឲ្យដោះលែងលោក ឆេង ប៊ុនហាក់ ដែលត្រូវបានចាប់ឃុំខ្លួនកាលពីថ្ងៃចន្ទ។លោកបានថ្លែងថា៖ «យើងចង់ឲ្យតុលាការដោះលែងលោក ហាក់»។ «ឥឡូវនេះយើងសូមយកឯកសារពាក់ព័ន្ធការតវ៉ាមកបង្ហាញអាជ្ញាធរ»។កាលពីថ្ងៃចន្ទក្រុមអ្នកតវ៉ាប្រមាណ ៥០ នាក់បានហែក្បួនតាមផ្លូវក្នុងក្រុងប៉ោយប៉ែតដោយអូសរូបទីងម៉ោងដែលប្រឡាក់ជាមួយឈាមក្លែងក្លាយជាមួយនឹងការសរសេរពាក្យថា «មន្ត្រីពុករលួយរំលោភបំពានលើប្រជាពលរដ្ឋ និងបង្កើតអយុត្តិធម៌ក្នុងសង្គម»។ បន្ទាប់ពីការហែក្បួនចប់លោក ឆេង ប៊ុនហាក់ ដែលជាអ្នករៀបចំការតវ៉ានេះត្រូវបាននគរបាលចាប់ខ្លួន។លោក អាត់ ខែម ស្នងការនគរបាលខេត្តបន្ទាយមានជ័យបានបដិសេធធ្វើអធិប្បាយដោយថ្លែងថាលោកជាប់រវល់ធ្វើការងារលើករណីនេះ។លោក ស៊ុំ ចន្ទគា អ្នកសម្របសម្រួលអង្គការសិទ្ធិមនុស្សអាដហុកប្រចាំខេត្តបានថ្លែងថាអ្នកតវ៉ា ៥ នាក់ក្នុងចំណោមអ្នកតវ៉ាទាំងនោះត្រូវបានកោះហៅសាកសួរនៅស្នងការនគរបាលខេត្ត។លោកបានថ្លែងថាការឃុំខ្លួននេះគឺជាការវាយប្រហារទៅលើសេរីភាពនៃការបញ្ចេញមតិ និងជាប្រភេទនៃការគំរាមកំហែងអ្នកតវ៉ា។លោកថា៖ «នេះជាប្រទេសប្រជាធិបតេយ្យពលរដ្ឋមានសិទ្ធិតវ៉ាដើម្បីបង្ហាញពីអ្វីដែលប៉ះពាល់ដល់ពួកគេទៅអាជ្ញាធរ»។ «ប៉ុន្តែអាជ្ញាធរបែរជាប្រើកម្លាំងបង្ក្រាបខណៈពលរដ្ឋកំពុងឈឺចាប់បាត់បង់ដី និងផ្ទះរបស់ខ្លួន»៕ដកស្រង់ពីសារព័ត៌មានភ្នំពេញប៉ុស្តិ៍ ចេញផ្សាយថ្ងៃទី១៦ ខែធ្នូ ឆ្នាំ២០១៥។