-
សមត្ថកិច្ចនឹងចរចារកដំណោះស្រាយរឿងកម្មករតវ៉ានៅក្រុងបាវិត
- ថ្ងៃចេញផ្សាយ ២២-ធ្នូ-២០១៥
កម្មកររោងចក្រនៅក្រុងបាវិតដែលតវ៉ាបានបំបែកគ្នាអស់ហើយ ខណៈដែលភាគីអាជ្ញាធរមានសមត្ថកិច្ច តំណាងក្រុមហ៊ុន និងតំណាងសហជីពនឹងចរចារកដំណោះស្រាយធំមួយ នារសៀលម៉ោង២ ថ្ងៃទី២២ ធ្នូ នៅសាលាខេត្តស្វាយរៀង បន្ទាប់ពីកម្មករបន្តតវ៉ាជាង១សប្ដាហ៍។កាលពីមិញមានការប៉ះទង្គិចគ្នាសាជាថ្មី រវាងសមត្ថកិច្ចនិងកម្មកររោងចក្រក្នុងតំបន់សេដ្ឋកិច្ចពិសេសមេហាតធេន(Manhattan) នៃក្រុងបាវិត ខេត្តស្វាយរៀង។ ក្នុងព្រឹត្តិការណ៍នេះមានកម្មកររាប់ពាន់នាក់ បាននាំគ្នាវាយ និងគប់រថយន្តបាញ់ទឹក១គ្រឿង របស់សមត្ថកិច្ចឲ្យខូចខាតស្ទើរតែទាំងស្រុង ខណៈដែលសមត្ថកិច្ចព្យាយាមវាយបំបែកក្រុមបាតុករដែលកំពុងតវ៉ា។ក្នុងពេលប្រទូស្តរាយគ្នា មានកម្មករ និងសមត្ថកិច្ចមួយចំនួនបានរងរបួស។កាលពីព្រឹកថ្ងៃទី២១ ធ្នូ ក៏មានកម្មករជិត៦០នាក់ ត្រូវអាជ្ញាធរប្រើឡានបាញ់ទឹកបួនគ្រឿងបំបែកកម្មករ និងឈានដល់ចាប់ខ្លួន ក្នុងពេលតវ៉ា តែពួកគេត្រូវបានដោះលែងវិញ នាល្ងាចថ្ងៃទី២១ ធ្នូ ដោយភ្ជាប់កិច្ចសន្យាឲ្យពួកគេឈប់តវ៉ា។កម្មកររោងចក្ររាប់ម៉ឺននាក់នៅតំបន់សេដ្ឋកិច្ចពិសេសមេនហាតធេន (Manhattan) និងតាយសេង(Tai Seng) ក្នុងក្រុងបាវិត បានចេញតវ៉ាទាមទារប្រាក់ឈ្នួល ២០ដុល្លារបន្ថែម តាំងពីថ្ងៃទី១៦ ធ្នូ មក ហើយមកទល់ពេលនេះ នៅមិនទាន់ទទួលបានដំណោះស្រាយនៅឡើយ។រហូតមកដល់ពេលនេះមានកម្មករ ៤នាក់ហើយ កំពុងត្រូវបានឃុំខ្លួនក្នុងពន្ធនាគារ ដោយចោទពីបទបំផ្លិចបំផ្លាញទ្រព្យសម្បត្តិអ្នកដទៃ និងញុះញង់ឲ្យមានការតវ៉ាហិង្សា។ដកស្រង់ចេញពីវិទ្យុអាស៊ីសេរី ចេញផ្សាយថ្ងៃទី២២ ខែធ្នូ ឆ្នាំ២០១៥។