សមត្ថកិច្ចបំបែកមន្ត្រីសង្គមស៊ីវិល និងសាច់ញាតិអ្នកស្លាប់នៅផ្លូវវ៉េងស្រេងមិនឲ្យប្រមូលផ្កុំធ្វើពិធីបង្សុកូល

សមត្ថកិច្ចបំបែកមន្ត្រីសង្គមស៊ីវិល និងសាច់ញាតិអ្នកស្លាប់នៅផ្លូវវ៉េងស្រេងមិនឲ្យប្រមូលផ្កុំធ្វើពិធីបង្សុកូល
- ថ្ងៃចេញផ្សាយ ៤-មករា-២០១៦
សមត្ថកិច្ចបំបែកក្រុមប្រជាពលរដ្ឋ ព្រះសង្ឃ និងមន្ត្រីសង្គមស៊ីវិលមិនឲ្យប្រមូលផ្ដុំធ្វើពិធីបង្សុកូលរំឭកខួប២ឆ្នាំដល់អ្នកស្លាប់កាលពីឆ្នាំ២០១៤ សមត្ថកិច្ចរាប់រយនាក់ប្រដាប់ដោយខែល និងដំបងឆក់បានបំបែកក្រុមប្រជាពលរដ្ឋ ព្រះសង្ឃ មន្ត្រីសង្គមស៊ីវិល និងសាច់ញាតិអ្នកស្លាប់នៅផ្លូវវ៉េងស្រេងមិនឲ្យប្រមូលផ្ដុំគ្នាធ្វើពិធីបង្សុកូលរំឭកខួប២ឆ្នាំដល់អ្នកស្លាប់កាលពីឆ្នាំ២០១៤ ក្រោមហេតុផលថា ប៉ះពាល់សណ្ដាប់ធ្នាប់សាធារណៈ។នៅព្រឹកថ្ងៃអាទិត្យនេះ ក្រុមមន្ត្រីអង្គការសង្គមស៊ីវិល និងក្រុមគ្រួសារជនរងគ្រោះ គ្រោងរៀបចំធ្វើពិធីបង្សុកូលរំឭកវិញ្ញាណក្ខន្ធជនរងគ្រោះដោយការបង្ក្រាបដោយហិង្សានៅផ្លូវវ៉េងស្រេងកាលឆ្នាំ២០១៤នោះ ដើម្បីជំរុញឲ្យរដ្ឋាភិបាលទទួលខុសត្រូវ និងរកយុត្តិធម៌ជូនអ្នកស្លាប់ និងជនរងគ្រោះ។ ក៏ប៉ុន្តែ ការជួបជុំនេះត្រូវបានរារាំង និងបំបែកដោយកងកម្លាំងសមត្ថកិច្ចរាប់រយនាក់ដែលមានប្រដាប់ដោយខែល និងដំបងឆក់។ទោះយ៉ាងណាក៏ដោយ ពុំមានការប៉ះទង្គិចគ្នាបានកើតឡើងនោះទេ។អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្សរបស់អង្គការលីកាដូលោក អំ សំអាត ដែលបានចូលរួមពិធីរំឭកនេះមានប្រសាសន៍ថា ទង្វើរបស់អាជ្ញាធរគឺជាការបិទសិទ្ធិសេរីភាពរបស់ប្រជាពលរដ្ឋក្នុងការប្រមូលផ្ដុំ និងសេរីភាពក្នុងការគោរពសាសនា ផ្ទុយពីច្បាប់រដ្ឋធម្មនុញ្ញ។ លោកថា មូលហេតុដែលសមត្ថកិច្ចព្យាយាមបំបែកការប្រារព្ធពិធីនេះគឺដោយសារពួកគេចង់បំបាត់រឿងប្រវត្តិសាស្ត្រពីអតីតកាលមិនឲ្យមានការចោទប្រកាន់លើសមត្ថកិច្ចដែលបានបាញ់បង្ក្រាបលើកម្មករកាលពីកន្លងទៅ។យ៉ាងណាក៏ដោយ អ្នកនាំពាក្យសាលារាជធានីភ្នំពេញលោក ឡុងឌីម៉ង់ ច្រានចោលការចោទប្រកាន់នេះ ដោយលោកថា ក្រុមអង្គការសង្គមស៊ីវិលមិនបានដាក់ពាក្យសុំការអនុញ្ញាតដើម្បីរៀបចំពិធីនេះនោះទេ។ កាលពីថ្ងៃម្សិលមិញ អភិបាលរាជធានីភ្នំពេញ លោក ប៉ា សុជាតិវង្ស បានចេញលិខិតមួយច្បាប់ផ្ញើទៅ កាន់អភិបាលខណ្ឌមានជ័យ និងខណ្ឌពោធិ៍សែនជ័យ ដោយជូនដំណឹងថា សាលារាជធានីមិនអនុញ្ញាតឲ្យក្រុមអង្គការសង្គមស៊ីវិលធ្វើការជួបជុំគ្នានៅតាមបណ្តោយផ្លូវវ៉េងស្រេង ដើម្បីគោរពវិញ្ញាណក្ខន្ធដែលបានស្លាប់ក្នុងព្រឹត្តិការណ៍ប៉ះទង្គិចគ្នានៅផ្លូវវ៉េងស្រេងនោះទេ ដោយតម្រូវឲ្យទៅរៀបចំពិធីនេះនៅតាមទីវត្តអារ៉ាម និងនៅផ្ទះវិញ។សាលារាជធានីភ្នំពេញក៏បានព្រមានចាត់វិធានការផ្លូវច្បាប់ចំពោះជនណាដែលសាលារាជធានីចាត់ទុកថាបង្កឲ្យបាត់បង់សណ្ដាប់ធ្នាប់ និងសន្តិសុខសាធារណៈផងដែរ។គួររំឭកថា កាលពីថ្ងៃទី៣ ខែមករា ឆ្នាំ២០១៤ កងទ័ពឆ័ត្រយោង៩១១បានបាញ់បង្ក្រាបទៅលើក្រុមកម្មករដែលតវ៉ាទាមទារដំឡើងប្រាក់ខែគោល១៦០ដុល្លារក្នុងមួយខែ បណ្ដាលឲ្យមនុស្ស៥នាក់ស្លាប់នៅនឹងកន្លែង ម្នាក់បាត់ខ្លួន និងជិត៤០នាក់រងរបួស។ ម្នាក់ក្នុងចំណោមអ្នករងរបួសបានស្លាប់ នៅប៉ុន្មានខែក្រោយមក ចំណែកអ្នកផ្សេងទៀតត្រូវពិការមួយជីវិត៕ ដកស្រង់ចេញពីវិទ្យុសំលេងប្រជាធិបត្តេយ្យ VOD ចេញផ្សាយថ្ងៃទី៣ ខែមករា ឆ្នាំ២០១៦ ។